اسلام آباد : کالعدم تحریک طالبان پاکستان ( ٹی ٹی پی) کیلئے بھتہ لینے والے سرگرم گروہ کو گرفتار کرلیا گیا، گرفتار ملزموں نے ہوشربا انکشافات کرتے ہوئے کمانڈرز کی افغانستان میں موجودگی کی بھی تصدیق کی۔
تفصیلات کے مطابق سیکیورٹی اداروں نے کالعدم تحریک طالبان پاکستان ( ٹی ٹی پی) کیلئے بھتہ لینے والے سرگرم ارکان کو گرفتار کرلیا۔
سرگرم ارکان کو خفیہ اطلاعات کی بنیاد پر گرفتار کیا گیا ، دوران تفتیش گرفتارارکان نے بھتہ لینے کے طریقہ کار کے حوالے سے بڑے انکشافات کئے۔
گرفتار ارکان مختلف طریقوں سے کالعدم ٹی ٹی پی کو بھتہ خوری میں معاونت فراہم کر رہے تھے۔
گرفتار ملزمان نے کالعدم ٹی ٹی پی کے کمانڈرز کی افغانستان میں موجودگی کی بھی تصدیق کرتے ہوئے کہا کہ کالعدم ٹی ٹی پی کمانڈرعبدالرازق اس وقت افغانستان میں ہے اور واٹس ایپ کے ذریعے ہدایات دیتا تھا۔
گرفتار ملزم کا کہنا تھا کہ کالعدم ٹی ٹی پی کمانڈرعبدالرازق لوگوں کےگھروں اوردکانوں کی ویڈیوز منگوا کر ان کو بھتے کیلئے افغانستان سے کالز کرتا تھا اور بھتہ نہ ملنے یاتاخیر کی صورت میں جان سے مارنے یا اغواکی دھمکیاں دیتا تھا۔
قانون نافذکرنے والے ادارے عوام کے تحفظ کیلئے بھرپور اقدامات اٹھا رہے ہیں اور سیکیورٹی فورسزکو کالعدم ٹی ٹی پی کے سرغنہ گروہ کا قلع قمع کرنے اور بھتہ مافیا کے خلاف بھی کریک ڈاؤن میں خاطر خواہ کامیابیاں مل رہی ہیں۔
