فیصل آباد: صوبہ پنجاب کے ضلع فیصل آباد کے ہوٹل میں خاتون کی پر اسرار موت واقع ہوئی ہے۔
پولیس ذرائع کے مطابق مدینہ ٹاؤن میں واقع ہوٹل سے لاہور کی رہائشی خاتون کی لاش ملی ہے، جس کی شناخت علیشا ارشد کے نام سے کی گئی ہے۔
واقعے سے متعلق پولیس نے بتایا کہ تیس سالہ علیشا ارشد گذشتہ رات ہوٹل کے کمرہ نمبر ایک سو چودہ میں ٹہری تھی، جہاں رات گئے نثار کالونی کے رہائشی شاہد نامی شخص نے متقولہ سے ملاقات کی تھی، پولیس کے مطابق شاہد مقتولہ کا کزن ہے۔
پولیس ذرائع کے مطابق صبح ہوٹل کا عملہ ناشتہ دینے گیا تو کمرے سے لاش ملی، مقتولہ کےجسم پر تشدد یا زخم کا نشان نہیں پایاگیا، کمرے سے مقتولہ کا موبائل فون اور پرس غائب ہے۔
یہ بھی پڑھیں: ماڈل نایاب کیس : قتل کو زیادتی کا رنگ دینے کی کوشش کا انکشاف
پولیس نے ابتدائی تحقیقات کے دوران ہوٹل مینجر کو حراست میں لیتے ہوئے کیس کی تفتیش کا باقاعدہ آغاز کردیا ہے، پولیس کا کہنا ہے کہ جو بھی اس واقعے میں ملوث ہوا، اسے گرفتار کرلیں گے۔
پنجاب میں دو روز کے دوران خاتون کے قتل کا یہ دوسرا واقعہ ہے، گذشتہ روز لاہور کے پوش علاقے ڈیفنس فیز فائیو میں نامعلوم افراد نے گھر میں گھس کر خاتون کو تشدد کا نشانہ بنانے کے بعد قتل کردیا،خاتون کی شناخت نایاب کے نام سے کی گئی تھی، مقتولہ نایاب کا تعلق شوبز سے تھا جو کہ چند عرصے قبل شوبز سے کنارہ کشی اختیار کرچکی تھی۔
