کراچی : مسلح ڈاکوؤں نے امریکا سے آنے والے خاندان کو لوٹ لیا، ملزمان خود کو سرکاری اہلکار ظاہر کررہے تھے، واردات کے بعد ملزمان فرار ہونے میں کامیاب ہوگئے۔
تفصیلات کے مطابق کراچی میں ڈاکوؤں نے بیرون ملک سے آئے ہوئے خاندان کو بھی نہ بخشا اور امریکا پلٹ خاندان سے قیمتی اشیاء اور نقدی لوٹ کر فرار ہوگئے۔
مذکورہ خاندان جامعہ بنوریہ میں بیٹے کی دستاربندی میں شرکت کیلئے امریکا سے آیاتھا کہ ملزمان نے ایئرپورٹ سے ہی ان کا پیچھا کرنا شروع کردیا تھا۔
متاثرہ خاندان نے بتایا کہ صبح فجر کے وقت لیاقت آباد دس نمبر سے تھوڑا غریب آباد پہنچنے پر ملزمان نے گاڑی رکوائی اور خود کو سرکاری اہلکار ظاہر کرتے ہوئے شناختی دستاویزات طلب کیں۔
ملزمان نے گاڑی میں موجود افراد سے ان کا سامان لیا اور پاسپورٹ واپس کرکے دیگر قیمتی سامان اور نقدی لے کر لے کر فرار ہونے میں کامیاب ہوگئے۔
پولیس نے واقعے کا مقدمہ درج کرکے تحقیقات کا آغاز کردیا ہے، مدعی مقدمہ کے مطابق پرس میں 25ہزار امریکی ڈالر، موبائل فون اور دیگر قیمتی سامان موجود تھا۔
واضح رہے کہ بیرون ملک سے آنے والے مسافروں کو لوٹنے کی وارداتوں میں مسلسل اضافہ ہورہا ہے اور مسافروں کے سامان کی معلومات سوائے ائیرپورٹ عملے کے کسی اور کو نہیں ہوتی۔
