کراچی : فیڈرل بورڈ آف ریونیو نے کلیئرنگ ایجنٹس کے خلاف ٹیکس چوری و منی لانڈرنگ کا ایک اور مقدمہ درج کرلیا، عدالت نے ملزمان کے مزید 14بینک اکاؤنٹس بھی منجمد کر دیے۔
تفصیلات کے مطابق ٹیکس چوری و منی لانڈرنگ کیخلاف ایف بی آر کراچی نے ایک اوربڑی کارروائی کی ہے، کلیئرنگ ایجنٹس محمد منشا اور کرامت علی کے خلاف ایک اور مقدمہ درج کیا گیا ہے۔
اس حوالے سے ایف بی آر کے ذرائع کا کہنا ہے کہ ملزمان کے خلاف26کروڑ ٹیکس چوری اور منی لانڈرنگ کا مقدمہ درج کیا گیا، عدالت نے ملزمان کے مزید 14 بینک اکاؤنٹس بھی منجمد کر دیئے۔
ملزمان کے 20 لاکھ روپے کے عوض قابل ضمانت وارنٹ گرفتاری بھی جاری کردیئے گئے ہیں، ایف آئی آر کے متن میں لکھا ہے کہ ملزمان میسرز ملک برادرز لاجسٹکس کے ڈائریکٹرز ہیں، ملزمان ٹیکس چوری اورمنی لانڈرنگ میں ملوث ہیں۔
ذرائع کے مطابق ملزمان کے بینک اکاؤنٹس میں کروڑوں روپے منتقل ہوئے، مقدمہ انٹیلی جنس اینڈ انویسٹی گیشن ان لینڈ ریونیو ایف بی آر نے درج کروایا۔
