لاہور: پنجاب کے مختلف علاقوں میں شدید دھند کے باعث موٹر وے کو متعدد مقامات پر آمدورفت کے لئے بند کردیا گیا ہے، شدید دھند کے باعث اسلام آباد انٹرنیشنل ایئرپورٹ پر پروازوں کاشیڈول بھی متاثر ہوگیا۔
اے آر وائی نیوز کے مطابق شدید دھند کے باعث اسلام آباد انٹرنیشنل ایئرپورٹ سے 5 پروازیں تاخیر کا شکار جبکہ 2 منسوخ کردی گئیں۔
ترجمان موٹر وے پولیس کے مطابق موٹروے ایم 1 دھند کی وجہ سے بند کردی گئی ہے، جبکہ موٹروے ایم 3 دھند کے باعث بند ہے۔ موٹروے ایم 4، موٹروے ایم5، موٹروے ایم 14 ہکلا تایارک تک دھند کی وجہ سے بند کردی گئی ہے۔
فورٹ عباس شہر اور گردونواح میں شدید دھند ہے، حدنگاہ انتہائی کم، ٹریفک کی روانی شدید متاثر ہے، جلالپور بھٹیاں شہر اورگردونواح میں دھندکاراج ہے، جس کے باعث سردی میں اضافہ ہوگیا ہے۔
ترجمان موٹروے پولیس کے مطابق موٹروے بند کرنے کا مقصد حادثات سے بچاؤ اور موٹروے استعمال کرنے والوں کے جان و مال کا تحفظ ہے، شہریوں سے درخواست ہے کہ دھند کہ اوقات میں غیر ضروری سفر سے گریز کریں۔
اپنا سفر دن کی روشنی میں مکمل کر کے دھند کے آغاز سے پہلے اپنے منزل مقصود تک پہنچ جائیں – گاڑیوں میں فوگ لائٹس کا استعمال کریں، تیز رفتاری سے گریز کریں اور اگلی گاڑی سے مناسب فاصلہ معمول سے زیادہ رکھیں۔
بجلی صارفین کےلیے ایک اور بُری خبر
ترجمان موٹروے پولیس کا کہنا ہے کہ سفر شروع کرنے سے پہلے موٹروے پولیس ہیلپ لائن 130 یا نیشنل ہائی ویز اینڈ موٹروے پولیس کے آفیشل سوشل میڈیا اکاؤنٹ سے بھی تازہ ترین معلومات ضرور حاصل کرلیں۔
