اسلام آباد: جناح ہاؤس لاہور حملے کا ایک اور مرکزی شر پسند بے نقاب ہو گیا، جس نے حیران کُن انکشافات اور اعترافات کر لیے ہیں۔
تفصیلات کے مطابق نو مئی کو جناح ہاؤس لاہور پر حملے کا ایک اور مرکزی ملزم شر پسند حاشر خان درانی بے نقاب ہو گیا ہے، حاشر خان سیاسی جماعت کے یوتھ ونگ لاہور کا انفارمیشن سیکریٹری ہے۔
حاشر خان دورانِ حملہ چیخ چیخ کر انقلاب کے نعرہ لگاتا رہا ’’لوگوں انقلاب مبارک ہو، ہم فوجیوں سے جان چھڑائیں گے‘‘ ’’اس ملک کا فیصلہ چار جرنیل نہیں کر سکتے۔‘‘
حاشر خان درانی نے انکشاف کیا کہ کور کمانڈر ہاؤس پر حملے کی منصوبہ بندی پہلے سے زمان پارک میں کی گئی تھی، پارٹی کی قیادت نے یہ منصوبہ بنایا، اس کی لیڈر شپ میں ڈاکٹر یاسمین راشد، میاں محمود الرشید اور شیخ امتیاز شامل تھے۔
حاشر خان نے بتایا کہ پہلے سے پلاننگ کے تحت ہم نے حملہ کیا یہ حملہ اس بیانیے کی عکاسی تھا جو چیئرمین نے فوج کے خلاف ہمارے زہنوں میں بھرا تھا اور وہی اثر انداز ہوا۔
حاشر نے کہا میں بھی حملہ کے وقت وہاں موجود تھا، میں نے بھی ویڈیو بنائی، لوگوں کو اُکسایا کہ لوگوں انقلاب آ گیا اور جھنڈا لہرا کر کہا کہ یہ کور کمانڈر ہاؤس نہیں بلکہ خان ہاؤس ہے، اس سب عمل کے دوران فوج کا رویہ بہت مثبت تھا، ہماری فوج نے کسی عام شہری کو تنکے کا بھی نقصان نہیں پہنچایا۔
