کراچی: مطالعے کے شوقین افراد کے لیے خوشخبری ہے کہ شہر قائد میں واقع حسرت موہانی لائبریری کو عوام کے لیے کھول دیا گیا۔
تفصیلات کے مطابق کراچی کے علاقے نارتھ ناظم آباد بلاک اے میں واقع حسرت موہانی میموریل ہال میں موجود لائبریری کو عوام کے لیے کھول دیا گیا۔
لائبریری میں مختلف مضامین اور موضوعات کی 10 ہزار سے زائد کتابیں (میڈیکل، اکاؤنٹنگ، کمپیوٹر، ادب) وغیرہ موجود ہیں ، یہاں 50 افراد بیک وقت مطالعہ کرسکتے ہیں جبکہ ہال میں 400 افراد کی گنجائش ہے۔
حسرت موہانی لائبریری کے دروازے ویسے بھی مطالعے کے شوقین افراد کے لیے کھلے ہوئے تھے تاہم انتظامیہ نے مرمت کے بعد اسے عوام کے لیے کھولا۔
انتظامیہ نے لائبریری آنے والے افراد کے لیے گاڑی کھڑی کرنے کے لیے پارکنگ کی خصوصی جگہ بھی بنائی، پیر تا ہفتہ لائبریری شام 5 بجے سے رات 5 بجے تک کھلی رہے گی۔ میموریل ہال کے گراؤنڈ فلور پر لائبریری جبکہ بالائی منزل پر لیکچر ہال موجود ہے۔
واضح رہے کہ حسرت موہانی ہال کا سنگ بنیاد 1985 میں میئر کراچی عبدالستار افغانی نے رکھا تھا، اس کی تعمیر میں حسرت موہانی کے خاندان کے کئی لوگ نے حصہ لیا اور اس کا افتتاح 1991 میں کیا گیا۔
