عمرکوٹ / تھرپارکر : پاکستان سمیت دنیا بھرمیں بسنے والی ہندو برادری نے "دیوالی”کاتہوار بھرپور جوش جذبے اور خوشیوں کےساتھ منایا، اس موقع پرخصوصی پوجا پاٹ کی گئی اور کشمیرکی آزادی کے حوالےسےخصوصی دعائیں بھی کی گئیں۔
تفصیلات کے مطابق آج ہندو برادری نے اپنا مذہبی تہوار دیوالی مذہبی آزادی کے ساتھ جوش اور جذبے سے منایا، بچوں، بڑوں سمیت خواتین سب نے مل کر مندروں میں پوجا پاٹ کی اور ساتھ میں کشمیر کی آزادی کیلئے دعائیں اور مقبوضہ کشمیر کی عوام سے اظہارِ یکجہتی بھی کیا۔
وطن عزیز پاکستان میں آباد ہر مذہب سے تعلق رکھنے والے افراد کو مذہبی آزادی کا حق حاصل ہے، یہی وجہ ہے کہ کئی دہائیوں کی طرح آج بھی ہندو برادری اپنا مذہبی تہوار دیوالی پر جوش انداز میں مذہبی آزادی کے ساتھ منا رہی ہے۔
دیوالی تہوار پر سب خریداری کرتے ہیں نئے کپڑے، نئے چپل اور گھڑیاں خریدی جاتی ہیں، مارکیٹ میں جگہ جگہ پٹاخوں کے اسٹال سجائے جاتے ہیں، گھروں میں دیئے جلائے جاتے ہیں اور مزے مزے کے پکوان تیار ہوتے ہیں جس پر عزیز و اقارب کو مدعو کیا جاتا ہے، اس تہوار پر گھروں اور مندروں میں آرتی بھی اتاری جاتی ہے. نوجوان نسل سج سنور کے ڈھول کی تھاپ پر رقص کرکے خوشی کا اظہار بھی کرتی ہے۔
ہندو دھرم کے مطابق دیوالی کا سب سے بڑا مفہوم یہ ہے کہ ماں باپ کی فرمانبرداری اور عزت نفس کی حفاظت کے لیے لڑنا پڑے تولڑا جائے، جیسے رانی سیتا کو راجہ راون نے اغوا کرکے قید کیا تو رام نے جنگ کرکے سیتا کو راجہ راون سےآزاد کرایا۔
یہ کہانی ایودھیا کے شہزادے رام اور ان کی شریک حیات رانی سیتا کی 14 سال کی جلا وطنی کے بعد ایودھیا لوٹنے کی ہے جب سارا شہر ان کے استقبال کے لیے امڈ پڑا تھا اور ایودھیا کے چپے چپے سے روشنی کی کرنیں پھوٹ رہی تھیں، اسی یاد کی خوشی میں پٹاخے چھوڑکر خوشی کا اظہارکیا جاتا ہے۔
آج بھی لوگ رام کی اس واپسی کا جشن دل کھول کر مناتے ہیں، ہندو دھرم کے مطابق ایک دیوتا وشنو نے بھگوان کرشن کا روپ دھارکر دیوالی کے دن دنیا کو ظالم راجہ سے نجات دلائی تھی ۔
دیوالی کی سب سے اہم بات لکشمی دیوی اور بھگوان وشنو کا ملاپ ہے لکشمی، پیار محبت، دولت و ثروت، خوش نصیبی اور خوشحالی کی دیوی ہے اور اسی لیے لوگ اس دن ان کی پوجا کرتے ہیں تاکہ دیوی سال بھر ان پر مہربان رہے۔
