اسلام آباد : اسلام آباد ہائیکورٹ نے پولیس اور ایف آئی اے کو شیر افضل مروت کے خلاف تادیبی کاروائی سے روک دیا ۔
تفصیلات کے مطابق اسلام آباد ہائی کورٹ میں پی ٹی آئی رہنما شیر افضل مروت کی مقدمات کی تفصیلات فراہمی اور ہراساں نہ کرنے کی درخواست پر سماعت ہوئی۔
اسلام آباد ہائیکورٹ کی جسٹس ثمن رفعت امتیاز نےدرخواست پر سماعت کی، شیر افضل مروت عدالت میں پیش ہوئے۔
شیر افضل مروت نے بتایا کہ احتجاج اور ریلی نکالی جس کے بعد میرے گھر چھاپہ مارا گیا ، رات ایک بجےمیرے گھر کا دروازہ توڑاگیا، ہراساں کیا گیا ، فریقین کو نوٹس جاری کرکے کیسوں کی تفصیلات مانگی جائیں۔
رہنما پی ٹی آئی کا کہنا تھا کہ ایک ایف آئی آر کا مجھے پتہ ہے جس میں کل ضمانت کروائی ہے، انھوں نےنیا کام پکڑا ہوا ہے اپوزیشن رہنماؤں پرکیسز درج کرلیتے ہیں۔
شیر افضل مروت نے استدعا کی عدالت پولیس ، ایف آئی اے سے کیسوں کی تفصیل منگوالے ، جس پر جسٹس ثمن رفعت امتیاز کا کہنا تھا کہ پہلے نوٹس کرکے جواب مانگ لیتےہیں تو رہنما پی ٹی آئی نے کہا کہ پولیس،ایف آئی اےسے کوئی توقع نہیں ہے ، ہراساں نہ کرنے ، بغیر وارنٹ گھر میں نہ گھسنے کابھی حکم دیں۔
عدالت نے فریقین کو شیر افضل مروت کے خلاف تادیبی کاروائی سے روک دیا اور فریقین کو نوٹس جاری کرتے ہوئے 26 فروری تک رپورٹ طلب کرلی اور کہا شیر افضل مروت کے خلاف کتنے کیسز درج ہیں 26 فروری تک بتایاجائے۔
