فیڈرل انویسٹی گیشن ایجنسی (ایف آئی اے) نے اسرائیل میں غیرقانونی امیگریشن کیس میں گرفتار ملزمان سے متعلق جی پی او میرپورخاص سے حاصل کیے گئے ریکارڈ سے اہم انکشافات کیے ہیں۔
اس حوالے سے ایف آئی اے حکام کا کہنا ہے کہ اسرائیل میں غیرقانونی امیگریشن کیس میں اہم پیشرفت ہوئی ہے جی پی او میرپورخاص سے حاصل کردہ ریکارڈ میں اہم انکشاف سامنے آئے ہیں۔
ترجمان ایف آئی اے کے مطابق پانچوں ملزمان کے دیگر رشتے داروں نے بھی اسرائیل کا دورہ کیا،
ملزمان نے اسرائیل سے جی پی او میرپورخاص1کروڑ13لاکھ کی ٹرانزیکشنز کیں، ملزمان کی جانب سے مجموعی طورپر 108ٹرانزیکشنز کی گئیں۔
ملزمان سے بک کرائے گئے ٹکٹوں سے متعلق ریکارڈ کیلئے رابطہ کیا گیا، کینیا،سری لنکا، سوئٹزر لینڈ، یو اے ای سفارت خانوں سے موفا کےذریعے رابطہ کیا گیا، سفارت خانوں کے ذریعے ملزمان کو جاری ویزوں سے متعلق ریکارڈ لیا جاسکے گا۔
ترجمان کے مطابق لین دین کے ریکارڈ کیلئے جی پی او حیدرآباد اور جی پی او میرپورخاص سے بھی رابطہ کیا گیا، کاؤنٹر پارٹیز کو اسرائیل سے موصول ترسیلات زر کےسلسلے میں جانچا گیا ہے۔،
ترجمان ایف آئی اے کا کہنا ہے کہ ڈیٹا کو آئی بی ایم ایس کے ساتھ شیئر کیا گیا ہے، ملزمان کے خاندانوں کی مکمل سفری تاریخیں حاصل کی جاسکیں گی، ملزمان سینٹرل جیل میرپورخاص میں عدالتی تحویل میں ہیں۔
یاد رہے کہ ایف آئی اے نے ایجنٹ کی مدد سے ’غیرقانونی امیگریشن‘ حاصل کرکے اسرائیل میں ملازمت کرنے والے 5 پاکستانیوں کو گرفتار کرنے کا دعویٰ کیا تھا، ان پانچوں ملزمان کا تعلق صوبہ سندھ کے علاقے میرپور خاص سے ہے۔
ایف آئی اے سندھ کے ڈائریکٹر(زون II)ذرائع نے میڈیا کو بتایا کہ ایف آئی اے کرائم سرکل میرپورخاص نے پانچ ملزمان نعمان صدیقی، کامل انور، محمد ذیشان، محمد کامران صدیقی اور محمد انور کو گرفتار کیا۔
