سعودی دارالحکومت ریاض میں کل دن بھر ہونے والی بارش کے بعد ’بوابۃ الشرق‘ محلہ زیر آب آگیا۔
اخبار24 کے مطابق گرج چمک کے ساتھ بارش کا سلسلہ جمعے کی رات تک جاری رہا جس کے باعث نشیبی علاقے اور سڑکیں زیر آب آگئیں۔
رپورٹ کے مطابق شدید بارش اور گرج چمک کے باوجود مقامی شہری اور مقیم غیرملکی خوشگوار موسم سے لطف اٹھانے کے لیے جمعے کو گھروں سے باہر نکلے۔
عاجل اورالمرصد کے مطابق موسلا دھار بارش کے باعث ریاض کی وادی نمار میں سیلاب آگیا، پہاڑوں کی چوٹیوں سے آبشار کی شکل میں پانی نیچے آرہا ہے۔
ریاض کے بوابۃ الشرق محلے کی بھی ایک وڈیو سوشل میڈیا پر وائرل ہے جس میں دیکھا جاسکتا ہے کہ پورا علاقہ پانی میں ڈوبا ہوا ہے، شہری دفاع کے اہلکاروں نے گھروں میں محصور مکینوں کو کشتیوں کے ذریعے دوسری جگہ منتقل کیا۔
سعودی محکمہ موسمیات کا کہنا ہے کہ ’نجران، جازان، عسیر، باحہ اور مکہ مکرمہ میں تیز ہواؤں اور گرج چمک کے ساتھ بارش جاری رہنے کا امکان ہے جبکہ مدینہ منورہ کے جنوبی کوہستانی علاقے بھی بارش کی زد میں رہیں گے۔
