مظفرآباد: سابق وزیراعظم آزاد کشمیر سردار عتیق احمدخان نے کہا ہے کہ کشمیر کی آزادی نوشتہ دیوار ہے، ہندوستان ظلم وجبر کے ذریعے کشمیریوں کو آزادی کی منزل تک پہنچنے سے نہیں روک سکتا۔
ان خیالات کا اظہار انہوں نے گزشتہ روز سابق وزیراعظم شاہدخاقان عباسی کے تایا بریگیڈیئر تاج عباسی کی تعزیت کرنے کے بعد اخباری نمائندوں سے گفتگو کرتے ہوئے کیا۔
سردار عتیق احمدخان نے کہا کہ ہندوستان اور نریندر مودی دنیا میں نے نقاب ہو چکے ہیں، سیکولرازم اور جمہورت کے دعوﺅں کی قلی کھل گئی ہے، اسی لاکھ آبادی کو یرغمال بنا کر رکھنا ہٹلر کی جارحیت کا عکاس ہے۔
انہوں نے کہا کہ پاکستان تمام تر مشکلات کے باوجود اہل کشمیر کا وحد سہارا اور وکیل ہے پاکستان اور کشمیر کے رشتے لازوال ہیں اور دنیا ان رشتوںمیں دراڑ ڈال نہیں سکتی، مقبوضہ کشمیر کے عوام سبز پرچم اٹھا کر پاکستان سے اپنی وابستگی کا اظہار کر رہے ہیں۔
سردار عتیق احمدخان کا کہنا تھا کہ اقوام متحدہ کی جنرل اسمبلی میں وزیراعظم اسلامی جمہوریہ پاکستان عمران خان کا خطاب نریندر مودی کو مزید بے نقاب کر دے گا، مودی کی گبھراہٹ اور بوکھلاہٹ کی وجہ ہی خوف ہے۔
انہوں نے کہا کہ دنیا اگر ہندوستا ن میں اٹھنے والی نفرت کی لہر کا احساس نہ کیا تو جنوبی ایشےاءکسی خوفناک حادثے کا شکار ہوسکتا ہے، ایٹمی اسلحے کا استعمال خطے کو صدیوں پیچھے لے جائے گا۔
سردار عتیق احمدخان کا مزید کہنا تھا کہ آزادکشمیر کے عوام پاک فوج کا بازوئے شمشیر زن ہیں اور وہ کسی بھی جارحیت کی صورت میں فوج کے شانہ بشانہ لڑیں گے۔
اس موقع پر ان کے ہمراہ ضلع روالپنڈی کے صدر ساجد قریشی ، یوتھ کے مرکزی رہنما نعمان عباسی کے علاوہ کارکنوں کی بڑی تعداد موجود تھی۔
