کشمور: عید الاضحیٰ کے روز گدو پاور پلانٹ میں آتشزدگی کی تحقیقاتی رپورٹ تیار کرلی گئی، پلانٹ کی 3 ٹربائنز کی اوور ہالنگ کی ضرورت تھی جسے مؤخر کیا جاتا رہا۔
تفصیلات کے مطابق گدو پاور پلانٹ میں آتشزدگی کی ابتدائی تحقیقاتی رپورٹ تیار کرلی گئی، رپورٹ کے مطابق واقعے میں مجرمانہ غفلت پائی گئی۔
ذرائع کا کہنا ہے کہ رپورٹ کے مطابق جنوری 2022 میں پاور پلانٹ کی 3 ٹربائنز کی اوور ہالنگ ضروری تھی، ڈیڑھ سال پہلے اوور ہالنگ کا عمل شروع ہونا تھا۔
رپورٹ میں کہا گیا کہ اوور ہالنگ کا کیس بورڈ آف مینجمنٹ میں اگست 2020 سے تھا۔ پاور پلانٹ میں ایک سال سے چیف ایگزیکٹو بھی تعینات نہیں کیا گیا۔
ذرائع کا کہنا ہے کہ گدو پاور پلانٹ میں آگ لگنے سے قومی خزانے کو 20 ارب روپے نقصان کا سامنا ہوا، جل جانے والے گدو پاور پلانٹ کی بحالی میں سال بھر لگ سکتا ہے۔
ذرائع کے مطابق گدو پاور پلانٹ کی بندش سے نیشنل گرڈ 747 میگا واٹ سستی بجلی سے محروم ہوگیا ہے، عید سے ایک روز قبل نیلم جہلم ہائیڈرو پراجیکٹ بھی فنی خرابی کے باعث بند ہو گیا تھا۔
