کراچی: صوبائی ڈیزاسٹر مینجمنٹ اتھارٹی (پی ڈی ایم اے) نے ایک بار پھر بارشوں کا الرٹ جاری کر دیا، بارش کا نیا سسٹم سندھ بھر میں باران رحمت برسائے گا۔
تصیلات کے مطابق پی ڈی ایم اے کا کہنا ہے کہ بارش کے نئے سسٹم کے تحت سندھ میں آج سے بارش کا امکان ہے۔ کراچی، بدین، ٹھٹھہ، تھرپارکر اور عمرکوٹ میں بارش ہوسکتی ہے۔
پی ڈی ایم اے کے مطابق اسی طرح شہیدبینظیرآباد، میرپورخاص، دادو، سکھر، حیدرآباد اور لاڑکانہ میں بارش کا امکان ہے، سندھ کے شہروں میں آج اور کل کہیں تیزاور کہیں ہلکی بارش ہوسکتی ہے۔
’متعلقہ اضلاع کی انتظامیہ کو حفاظتی اقدامات کی ہدایت کی جاتی ہے‘۔
علاوہ ازیں سندھ میں سیلابی صورت حال میں این ڈی ایم اے کا امدادی اور بحالی کا کام بھی جاری ہے۔ سندھ کے سیلاب سے متاثرہ علاقوں کے لیے19ہزار خیمے بھیج دیے گئے۔
یہ خیمے5کور کی مدد سے متاثرہ علاقوں میں تقسیم کیے جائیں گے۔