بھارتی فلم انڈسٹری کی معروف اداکارہ کترینہ کیف کو بھارت میں فلموں کی کامیابی کی ضمانت سمجھا جاتا ہے، مگر اداکارہ خود کون سی اداکارہ کو رول ماڈل سمجھتی ہیں اس حوالے سے انہوں نے اپنے چاہنے والوں کو آگاہ کیا۔
بھارتی میڈیا کے مطابق کترینہ کیف نے اس حوالے سے انکشاف کرتے ہوئے کہا کہ وہ حادثاتی طور پر ادکاری کے شعبے میں آئیں، دراصل وہ ماڈل بننا چاہتی تھیں اور ملائیکہ اروڑا اُن کے لیے ایک رول ماڈل اداکارہ تھیں۔
حال ہی میں ایک انٹرویو کے دوران کترینہ کیف کا کہنا تھا کہ وہ شوبز کی دنیا میں قدم رکھنے کے بعد صرف ماڈل بننا چاہتی تھیں، وہ صرف ماڈلنگ کے لیے ہی ممبئی آئی تھیں، اس دوران اُن کی رول ماڈل اداکارہ و سپر ماڈل ملائیکہ اروڑا تھیں۔
کترینہ کا کہنا تھا کہ ’جب میں نے بمبئی میں ایک ماڈل کے طور پر اپنے کیریئر کا آغاز کیا تھا، اس دوران میں صرف ایک ماڈل بننے کا ہی ارادہ رکھتی تھی، میرا اداکاری کرنے کا کوئی ارادہ نہیں تھا۔‘
والدہ سری دیوی سے ناروا سلوک رکھنے پر جھانوی کپور نے کیا کہا؟
اداکارہ کا مزید کہنا تھا کہ ’کیریئر کے آغاز میں میری رول ماڈلز مدھو سپرے اور لکشمی مینن تھیں، یہ اُس وقت کی سپر ماڈل تھیں اور اصل میں ملائیکہ اروڑا بھی، ملائیکہ اروڑا اُس وقت بھی ماڈلنگ کر رہی تھیں، یہ وہ ماڈلز تھیں جنہیں میں نے دیکھا اور ان ہی کی طرح میں بھی ایک ماڈل بننا چاہتی تھی۔‘
