رہنما تحریک انصاف لطیف کھوسہ نے کہا ہے کہ پی ٹی آئی کے لوگوں کا انتخابی نشان کے نام پر مذاق اڑایا جارہا ہے۔
تفصیلات کے مطابق لطیف کھوسہ نے کہا کہ صبح سے مغرب تک ہم عدالتوں میں پیش ہی ہوتے رہتے ہیں۔ ہم تو شفاف الیکشن اور لیول پلیئنگ فیلڈ لینے آئے تھے۔ ہم سے تو فیلڈ ہی چھین لی گئی ہے۔
پی ٹی آئی کے رہنما کا کہنا تھا کہ سپریم کورٹ کے فیصلےسے جمہوریت کو نقصان پہنچا ہے۔ جمہوریت کو نقصان کا خمیازہ ہماری نسلیں بھگتیں گی۔
لطیف کھوسہ نے کہا کہ بلے کا نشان نہ دے کر 220 ممبرز کو ہم سے چھین لیا گیا۔ کیا کبھی دنیا میں سنا ہے کہ آئینی ادارہ چل کر جیل جائے اور فرد جرم لگائے۔
انھوں نے کہا کہ الیکشن کمیشن پر عدم اعتماد کی درخواست واپس لے لی۔ عوام دو تہائی سے زیادہ لوگ منتخب کریں گے۔
پاکستان تحریک انصاف کے رہنما کا کہنا تھا کہ دنیا کے کسی ملک میں آئینی ادارہ فرد جرم لگانے جیل نہیں جاتا۔ یہ پی ٹی آئی نہیں بلکہ 25 کروڑ عوام کا حق رائے دہی چھینا گیا ہے۔
