بھارت میں سرکاری ملازمت کے حصول کے لیے جہیز نہ لینے کی شرط عائد کردی گئی۔
بھارتی میڈیا رپورٹس کے مطابق ریاست اترپردیش میں سرکاری ملازمت پانے والے نوجوانوں کے لیے دو شرائط رکھی گئی ہیں جس کے مطابق نوجوانوں کو اپنی ملکیت کے بارے میں تفصیل بتانی ہوگی اور ساتھ ہی جہیز سے متعلق ایک حلف نامہ بھی پیش کرنا ہوگا۔
اسٹیٹ اینڈ اپر سب آرڈیننٹ سروسز امتحان میں کامیابی حاصل کرنے والے نوجوانوں کو ملازمت سے پہلے کئی حلف نامے اور سرٹیفکیٹ جمع کروانے ہوں گے۔
رپورٹ کے مطابق نوجوانوں کو اپنی ملکیت سے متعلق سرٹیفکیٹ جمع کروانا ہوگا اور دوسری شرط میں جہیز نہ لینے کا حلف نامہ شامل ہے یہی نہیں امیدواروں کو تقرری سے پہلے قرض دار اور ڈیفالٹر نہ ہونے کا حلف نامہ بھی دینا پڑے گا۔
سرکاری ملازمت کے حصول کے لیے امیدواروں کو ایک سے زیادہ شوہر یا بیوی نہ ہونے کا حلف نامہ بھی پیش کرنا ہوگا۔
رپورٹ کے مطابق اترپردیش حکومت کا مقصد یہ ہے کہ وہ کسی بھی نوجوان کو ملازمت دینے سے پہلے اس کی ازدواجی حالت اور جہیز کو لے کر اس کی ذہنیت کی جانچ کرسکے۔