مانسہرہ: 5 ہزار جرمن ٹراؤٹ مچھلی کے بچے دریائے کنہار میں چھوڑ دیے گئے، ٹراؤٹ فِش کی افزائش سے علاقے کی سیاحت کو فروغ حاصل ہوگا۔
تفصیلات کے مطابق کاغان ڈویلپمنٹ اتھارٹی کی جانب سے مانسہرہ کے پُر فضا سیاحتی مقام ناران کے دریائے کنہار میں پلنے والی نایاب براؤن ٹراؤٹ کی افزائش کے لیے خصوصی اقدامات اٹھائے جا رہے ہیں۔
مانسہرہ کے سیاحتی مقام ناران کو بے پناہ خوب صورتی کی وجہ سے ارض پاک پر قدرت کا ایک انمول تحفہ سمجھا جاتا ہے، جب کہ برفانی پانی میں پیدا ہونے والی دنیا کی نایاب ٹراؤٹ مچھلی کو یہاں کی قیمتی اور بہترین سوغات تصور کیا جاتا ہے۔
چیئرمین کاغان ڈویلپمنٹ اتھارٹی ڈاکٹر ایمل زمان کی جانب سے عطیہ کی گئی براؤن ٹراوٹ مچھلی کی نسل بڑھانے کے لیے دوسرے مرحلے میں پانچ ہزار جرمن ٹراؤٹ مچھلی کے بچے دریائے کنہار میں چھوڑے گئے۔
ڈاکٹر ایمل زمان کے مطابق ٹرؤاٹ مچھلی کی افزائش بڑھانے سے ناران میں سیاحت کو بین الاقوامی سطح پر فروغ کے لیے دور رس نتائج مرتب ہوں گے۔
