کراچی : سندھ میں گیس کا ایک اور ذخیرہ دریافت کرلیا گیا، جس سے یومیہ 6.57 ملین اسٹینڈرڈ کیوبک فٹ گیس ملے گی۔
تفصیلات کے مطابق ماری پٹرولیم لمیٹڈ کی جانب سے غازیج فارمیشن سندھ میں گیس دریافت کر لی گئی۔
پاکستان اسٹاک مارکیٹ کی ویب سائٹ پر کمپنی کے اعلامیہ میں کہا گیا ہے کہ ماری پٹرولیم نے غازیج کے مقام پر دوسری جگہ ایک ہزار چودہ میٹر تک کی گہرائی کھدائی کی، جس کے بعدیومیہ چھ اعشاریہ پانچ سات ملین اسٹینڈرڈکیوبک فٹ گیس ملے گی۔
غازیج فارمیشن ٹو میں گیس کا پریشر تین سو چھ پاؤنڈ فی اسکوائر انچ بتایا جا رہا ہے، ماری پٹرولیم کے اس علاقے میں 100 فیصد ورکنگ شیئرز ہیں۔
گذشتہ ماہ صوبے سندھ کے علاقے ڈھرکی میں گیس کا ذخیرہ دریافت کیا گیا تھا ، جس سے یومیہ سترہ ملین اسٹینڈرڈ کیوبک فٹ گیس حاصل ہوگی۔
کمپنی نے ڈھرکی کے علاقے میں سترہ سو چالیس میٹر تک کھدائی کی، کمپنی کی اس علاقے میں یہ تیسری گیس کی دریافت ہے۔
