اسلام آباد : وزیراطلاعات مریم اورنگزیب نے چیئرمین پی ٹی آئی عمران خان کے بیان پر کہا کہ آرام سے زمان پارک میں بیٹھو، جو آگ تم نے لگانی تھی لگالی دوبارہ نہیں لگانے دیں گے۔
تفصیلات کے مطابق وزیراطلاعات مریم اورنگزیب نے چیئرمین پی ٹی آئی عمران خان کے بیان پر ردِعمل دیتے ہوئے کہا عوام تمہاری دہشت گردی اور ملک دشمنی کا حصہ بننے کو تیار نہیں، عمران خان کس کو تیار رہنے کا کہہ رہے ہیں؟
وزیراطلاعات کا کہنا تھا کہ دہشت گرد،مسلح جتھے، غنڈے تو قانون کے مطابق گرفتار ہیں، کسے آواز دے رہے ہو؟ یادگاروں کی بے حرمتی کرنیوالے ، حساس سرکاری عمارتوں پر حملےکرنے والے اور مساجد،اسکولوں، مویشی منڈیوں،ایمبولینس کو جلانے والے تو گرفتار ہیں۔
مریم اورنگزیب نے کہا کہ آرام سے زمان پارک میں بیٹھو، جو آگ تم نے لگانی تھی لگالی دوبارہ نہیں لگانے دیں گے، عوام ملک دشمنوں اور دہشت گردوں کے ماسٹر مائنڈ کو مسترد کر چکی ہے۔
یاد رہے چیئرمین تحریک انصاف عمران خان نے سماجی رابطے کی ویب سائٹ ٹوئٹر پر اپنے بیان میں کہا تھا کہ ‘بغیرکسی تحقیقات لیڈر شپ اور7ہزارکارکنوں کو جیلوں میں بھیج دیا گیا، ان کا مقصد ملک کی سب سے بڑی وفاقی جماعت پر پابندی لگانا ہے، یہ بھی تحقیقات نہیں کی گئیں سرکاری عمارتوں پرحملے،نہتےمظاہرین کی ہلاکتوں کاذمہ دار کون ہے؟۔’
عمران خان نے مزید لکھا تھا کہ ‘اس دوران سپریم کورٹ پر قبضے،آئین کوروندنے کیلئےغنڈوں کو سہولت دی گئی، تمام پاکستانی پرامن مظاہروں کیلئے تیار رہیں ، سپریم کورٹ اور آئین کی تباہی کا مطلب پاکستان کے خواب کا اختتام ہوگا۔’
