کراچی: میئر کراچی مرتضیٰ وہاب نے کہا ہے کہ حافظ نعیم الرحمان 4 سال شیروانی کا انتظار کریں۔
تفصیلات کے مطابق میئر کراچی مرتضیٰ وہاب نے میڈیا سے گفتگو میں کہا کہ حافظ نعیم شہر کی بہتری کے لیے بلدیہ عظمیٰ کراچی کا ساتھ دیں، شیروانی کے لیے انہیں 4 سال کا انتظار کرنا ہوگا۔
مرتضیٰ وہاب کا کہنا تھا کہ کام اچھا ہونا چاہئے اورپورا ہونا چاہئے، چیئرمین پی ٹی آئی نے وعدہ کیا تھا گجر نالے کے اطراف کی سڑکیں بھی بنائیں گے، چیئرمین پی ٹی آئی اپنے وعدے کو تکمیل کے مراحل میں داخل کیے بغیر چلے گئے۔
مرتضیٰ وہاب نے کہا پارکوں کی دیکھ بھال کے لیے بھی اقدامات اٹھا رہے ہیں، ہم سمجھتے ہیں سرکاری چیز فری ہونی چاہیے، ہمیں اپنی سوچ کو بدلنے کی ضرورت ہے، پبلک پرائیویٹ پارٹنرشپ پرپارک چلانے کی بات کرتے ہیں تو تنقید ہوتی ہے۔
میئر کراچی نے کہا کہ ہم بے ایمان نہیں اس شہر کی بہتری کے لیے کام کرینگے، ملیر والا بد قسمت واقعہ ہوا سلمان عبداللہ مراد بچے کے والد کے پاس گئے۔
مرتضیٰ وہاب نے مزید کہا کہ کھمبے، لائٹیں اور پارکوں کی گرل چوری ہورہی ہے، سب ویڈیو تو بناتے ہیں کوئی 15 کو اطلاع نہیں کرتا، پی آئی ڈی سی پل دیکھ کر تکلیف ہوتی ہے خوبصورت بنایا تھا کھمبا اٹھا کر لے گئے۔
