کراچی: محکمہ ریلوے کو لاکھوں روپے کا نقصان پہنچانے والا تین رکنی گینگ گرفتار کر لیا گیا۔
تفصیلات کے مطابق ریلویز پولیس کی جانب سے اسمگلنگ اور چوروں کے خلاف کارروائیاں جاری ہیں، ریلویز پولیس لاہور ڈویژن کی ایک بڑی کارروائی میں ریلوے ڈیزل شیڈ لاہور سے ٹرین انجنوں سے قیمتی تانبے کی تار چوری کرنے والا گینگ گرفتار کر لیا گیا۔
ڈیزل شیڈ سے تین ملزمان کو ریلوے مٹیریل سمیت رنگے ہاتھوں پکڑا گیا ہے، تینوں ملزمان کے قبضے سے ریلوے کی لاکھوں روپے مالیت کی تار برآمد کی گئی، ملزمان کے قبضے سے ایک پسٹل بھی برآمد ہوا ہے۔
ملزمان پر پہلے بھی متعدد مقدمات درج ہیں، جن کے خلاف تھانہ ریلویز پولیس لاہور میں مقدمہ درج کر لیا گیا، اور ان سے مزید تفتیش کی جا رہی ہے۔
ریلویز پولیس اسپیشل برانچ نے سکھر میں بھی ایک بڑی کارروائی کی ہے، جس میں ٹرین جعفر ایکسپریس سے مضر صحت بڑی مقدار میں بھارتی گٹکا برآمد کیا گیا، ریلویز پولیس اسپیشل برانچ نے ٹرین جعفر ایکسپریس میں مشکوک شخص کی تلاشی لی تھی، جس پر ملزم کے سامان سے مضر صحت گٹکے کے پیکٹ برآمد ہوئے۔
ملزم کے خلاف تھانہ ریلویز پولیس روہڑی میں مقدمہ درج کر کے تفتیش شروع کر دی گئی ہے۔
