کراچی : محکمہ موسمیات نے کراچی میں آج اور کل گرج چمک کے ساتھ بارش کی پیش گوئی کردی ، بارش کے باعث سردی میں اضافہ متوقع ہے۔
تفصیلات کے مطابق مغربی ہواؤں کا سسٹم بلوچستان میں داخل ہوگیا اور گوادر میں بادل برس پڑے جبکہ تربت اور کیچ کے بعض علاقوں میں بھی موسلادھار بارش سے سردی کی شدت میں اضافہ ہوگیا ہے۔
محکمہ موسمیات کا کہنا تھا کہ بلوچستان میں داخل ہونے والا مغربی ہواؤں کا سلسلہ سندھ میں بھی اپنا اثر دکھائے گا، جس سے کراچی میں بھی آج اور کل گرج چمک کے ساتھ بادل برسیں گے۔
- Advertisement -
بارش کے باعث سردی میں اضافہ متوقع ہے تاہم کراچی میں آج کم سے کم درجہ حرارت اکیس ڈگری سینٹی گریڈ رہنے کا امکان ہے۔
کراچی میں بارش سے فضائی آلودگی کی صورتحال میں بہتری آنے کی بھی توقع ہے جبکہ تھر، عمر کوٹ، بدین، میرپور خاص اور جامشورو میں بارش کا امکان ہے۔
