اسلام آباد : چیئرمین نادرا طارق ملک نے مستعفی ہونے کا فیصلہ کرلیا، وہ وزیراعظم کو اپنا استعفیٰ پیش کریں گے۔
تفصیلات کے مطابق چیئرمین نادرا طارق ملک وزیر اعظم شہباز شریف سے ملاقات کیلئے ان کے آفس پہنچ گئے۔ ذرائع کا کہنا ہے کہ خیال کیا جارہا ہے کہ طارق ملک وزیر اعظم سے ملاقات میں استعفیٰ پیش کریں گے۔
ذرائع کے مطابق وفاقی حکومت کی جانب سے چیئرمین نادرا پر مستعفی ہونے کیلئے شدید دباؤ تھا، ایف آئی اے کی جانب سے چیئرمین نادرا کیخلاف انکوائری بھی جاری ہے۔
یاد رہے کہ نادرا ٹھیکے میں مبینہ کرپشن کے انکشاف کے بعد وفاقی تحقیقاتی ادارے (ایف آئی اے) نے چیئرمین نادرا محمد طارق ملک کے اثاثہ جات کی تفصیلات حاصل کرلیں ہیں۔
ذرائع کے مطابق ایف آئی اے نے 19 مئی کو چیئرمین نادرا کو طلب کر رکھا ہے، نادرا نے مہنگے داموں ٹھیکہ من پسند بین الاقوامی کمپنی کو دیا تھا، مہنگے ٹھیکے سے قومی خزانے کو کروڑں روپے کا نقصان ہوا۔
