ساؤتھ فلم انڈسٹری کی معروف اداکارہ سامنتھا روتھ پربھو کے سابقہ شوہر و اداکار ناگا چیتنیا نے اداکارہ سوبھیتا ڈھولیپالا سے منگنی کرلی۔
ناگا چیتنیا کے والد نے سوشل میڈیا سائٹ ایکس پر اپنے بیٹے کی منگنی کی تصاویر شیئر کی ہے اور لکھا کہ ’ہمیں اپنے بیٹے ناگا چیتنیا کی سوبھیتا ڈھولیپالا سے منگنی کا اعلان کرتے ہوئے خوشی محسوس ہورہی ہے ‘۔
ناگا چیتنیا کے والد نے کہا کہ منگنی کی تقریب کا انعقاد آج صبح 9:42 بجے ہوا جس میں قریبی رشتہ داروں نے شرکت کی، ہم سوبھیتا ڈھولیپالا کو اپنے خاندان میں خوش آمدید کہتے ہیں۔
پیغام کے آخر میں انہوں نے اپنے بیٹے اور بہو کے لیے نیک خواہشات کا اظہار کرتے ہوئے کہا کہ ’ہم دونوں کیلئے زندگی بھر کی محبت اور خوشی کی خواہش کرتے ہیں ‘۔
سوشل میڈیا پر سامنے آنے والی تصاویر میں بھارتی اداکار ناگا چیتنیا اور اداکارہ سوبھیتا ڈھولیپالا کو بنے سنورے دیکھا جاسکتا ہے، ناگا چیتنیا نے اپنی منگنی پر سفید شلوار قمیص کا انتخاب کیا جبکہ سوبھیتا ڈھولیپالا کو ہلکی گلابی ساڑھی میں دیکھا جاسکتا ہے۔
خیال رہے کہ تیلگو سنیما کے اداکار ناگا چیتنیانے اداکارہ سامنتھا روتھ پربھو سے سال 2017 میں شادی کی تھی جو طلاق پر ختم ہوگئی۔
