ابوجا: افریقی ملک نائیجریا میں مسلح افراد نے تین چینی انجینئرز کو اغوا کرلیا ہے۔
غیر ملکی میڈیا نے مقامی پولیس ذرائع کے حوالے سے بتایا کہ وسطی نائیجیریا میں ایک ہائیڈرو الیکٹرک ڈیم پراجیکٹ سے تین چینی کارکنوں کو اغوا کر لیا گیا ہے، مغوی چینی انجینئرز پیناگوا کے پاور پراجیکٹ میں کام کررہے تھے۔
رپورٹ کے مطابق چینی انجینئرز کے اغوا سے قبل سیکیورٹی فورسز اور نامعلوم مسلح افراد کے درمیان فائرنگ کا شدید تبادلہ ہوا،جس کے نتیجے میں دو مقامی ورکرز مارے گئے، واقعے میں تین افراد زخمی بھی ہوئے جبکہ چار مزید تارکین وطن کو اغوا ہونے سے بچالیا گیا۔
یہ بھی پڑھیں: نائجیریا میں مسلح افراد کی مسجد پر فائرنگ، 18 نمازی جاں بحق، متعدد زخمی
واضح رہے کہ چینی ملازمین کو گزشتہ چند مہینوں میں نائجیریا میں متعدد بار نشانہ بنایا گیا ہے کیونکہ وہ اربوں ڈالر کے انفراسٹرکچر کے منصوبوں پر کام کرتے ہیں جن میں کان کنی، ریلوے، ہوائی اڈے اور سڑکیں شامل ہیں۔
مغویوں کو عام طور پر تاوان کی ادائیگی کے بعد رہا کردیا جاتا ہے جبکہ حکام شاذ و نادر ہی اس بات کی تصدیق کرتے ہیں، تاوان کی ادائیگی کے لیے تلاش کرنے والے مجرم گروہ اکثر افریقا کے سب سے زیادہ آبادی والے ملک کے کچھ حصوں میں انفراسٹرکچر کے منصوبوں میں غیر ملکی کارکنوں کو نشانہ بناتے ہیں۔
