اوکاڑہ: پنجاب کے شہر اوکاڑہ میں 3 سال پہلے لاپتا ہونے والے نوجوان رزاق کے بارے میں معلوم ہوا ہے کہ اسے اپنی ہی بیوی نے بدترین طریقے سے قتل کر دیا تھا۔
تفصیلات کے مطابق اوکاڑہ میں تین سال قبل لاپتا ہونے والے رزاق نامی نوجوان کے اندھے قتل کا ڈراپ سین ہو گیا ہے، ڈی پی او اوکاڑہ کا کہنا ہے کہ مقتول کی قاتل اس کی بیوی اور اس کا ساتھی نکلا۔
تین سال بعد مقتول کے ورثا نے مقامی تھانے میں مقتول کی بیوی کے خلاف درخواست دی، جس پر پولیس نے کارروائی کرتے ہوئے اسے گرفتار کر کے تفتیش کی۔
ڈی پی او کے مطابق مقتول کی بیوی اور اس کے آشنا نے پولیس حراست میں رزاق کے قتل کا اعتراف جرم کر لیا ہے، ملزمان سے آلہ قتل بھی برآمد کر لیا گیا ہے۔
قاتلوں نے بتایا کہ رزاق کو مارنے کے بعد اس کی لاش کو ایک برقی کٹر کے ذریعے ٹکڑے ٹکڑے کیا گیا اور پھر وہ ٹکڑے نہر میں بہائے گئے۔ پولیس حکام کا کہنا ہے کہ ملزمان کے خلاف مزید قانونی کارروائی کی جا رہی ہے۔
