عمان کی جانب سے مسقط انٹرنیشنل ایئرپورٹ پر اہم کارروائی کی گئی، اس دوران بچوں کی اسمگلنگ کی کوشش کو ناکام بنادیا گیا جبکہ 2 افراد کو حراست میں لے لیا گیا۔
بین الاقوامی خبر رساں ادارے کی رپورٹ کے مطابق مسقط کے بین الاقوامی ہوائی اڈے پر دو افریقی باشندوں کو افریقہ سے ایک بچے کی اسمگلنگ کی کوشش کرنے پر حراست میں لے لیا گیا ہے۔ رائل عمان پولیس (آر او پی) کی جانب سے ملزم کی گرفتاری کی تصدیق کردی گئی ہے۔
انٹرنیشنل کریمنل پولیس آرگنائزیشن (انٹرپول) کے تعاون سے عمان کے جنرل ڈپارٹمنٹ آف کریمنل انویسٹی گیشن کی قیادت میں کی گئی یہ کارروائی انسانی اسمگلنگ سے نمٹنے اور کمزوروں کی حفاظت کے لیے ایک وسیع تر اقدام کا حصہ تھا۔
آر او پی کے جاری کردہ بیان میں بچے کی عمر یا جنس کی وضاحت نہیں کی گئی لیکن انسانی اسمگلنگ کے جرائم سے نمٹنے اور ان سے نمٹنے کے لیے بین الاقوامی تعاون کی اہمیت کو اجاگر کیا گیا۔
اس سے قبل ایف آئی اے انٹرپول پاکستان نے قتل کے سنگین مقدمے میں پنجاب پولیس کو مطلوب ملزم کو مسقط سے گرفتار کیا تھا۔
ترجمان ایف آئی اے کے مطابق اشتہاری ملزم عبداللہ پنجاب پولیس کو مطلوب تھا، ملزم کو مسقط سے گرفتار کر کے لاہور ایئرپورٹ منتقل کر دیا گیا، ملزم عبداللہ کے خلاف قتل کی دفعات کے تحت مقدمہ درج تھا۔
ایف آئی اے این سی بی انٹرپول پاکستان نے ملزم کی گرفتاری کے لئے ریڈ نوٹس جاری کیا تھا، بعد ازاں ایف آئی اے امیگریشن نے ملزم کو متعلقہ پولیس کے حوالے کر دیا۔
