کراچی: اورنگی ٹاؤن میں منشیات فروشوں کے خلاف کارروائی کے دوران اڈے پر موجود پیسے بٹورنے والے پولیس اہلکاروں کو رنگے ہاتھوں گرفتار کرلیا گیا۔
تفصیلات کے مطابق کراچی آپریشن جاری رہنے کے باوجود آج بھی شہر قائد میں منشیات کے اڈے قائم ہیں جو پولیس کی سرپرستی میں چل رہے ہیں اور ان سے ماہانہ، ہفتہ وار یا روزانہ کی بنیاد پر پولیس کی بھتہ وصولی جاری ہے۔
اورنگی ٹاؤن تھانے کی حدود میں واقع ایک منشیات کے اڈے پر تھانے کی پولیس کارروائی کرنے پہنچی تو پتا چلا وہاں متعلقہ تھانے کے تین اہلکار پہلے سے موجود تھے جو منشیات فروشوں سے پیسے بٹور رہے تھے۔
پولیس حکام نے تینوں اہلکاروں کو گرفتار کرکے تحقیقات کیں تو پتا چلا کہ تینوں اہلکار منشیات فروشوں سے ملے ہوئے تھے، ہیڈ محرر نے تینوں اہلکاروں کو منشیات کے اڈے سے پیسے لینے بھیجا تھا۔
حکام نے اورنگی ٹاؤن تھانے کے ہیڈ محرر،اے ایس آئی اور 2 اہل کاروں کے خلاف مقدمہ درج کرلیا، پولیس افسران کا کہنا ہے کہ تمام اہلکار منشیات فروشوں کی سرپرستی کر رہے تھے۔
