امریکی محکمہ خارجہ کی ترجمان ٹیمی بروس کا کہنا ہے کہ غزہ میں حالات معمول پر لانے کے لیے حماس کو ہتھیار ڈالنا اور مغوی رہا کرنا ہوں گے۔

ترجمان امریکی محکمہ خارجہ ٹیمی بروس کا کہنا ہے کہ غزہ کی صورت حال کی ذمہ دار حماس ہے، حماس نے جنگ بندی کے معاہدے کو متعدد مرتبہ توڑا ہے۔

انہوں نے کہا کہ صدر ٹرمپ کہہ چکے کہ عرب شراکت داروں کے ساتھ مل کر غزہ کی تعمیر نو کی جائے گی، وہ غزہ میں جنگ بندی کے لیے پرامید ہیں۔

ٹیمی بروس کا کہنا تھا کہ ہم نے تمام تنازعات میں شہریوں کی ہلاکت کی مذمت کی ہے۔

ان سے سوال کیا گیا کہ کیا امریکا کی یوکرین کو ہتھیاروں کی فراہمی روکنا مسائل پیدا نہیں کرے گی؟ جواب میں ٹیمی بروس نے کہا کہ ہتھیاروں کی فراہمی میں وقفہ کیا گیا ہے لیکن ساتھ دیگر اقدامات جاری ہیں۔

ترجمان امریکی محکمہ خارجہ نے کہا کہ چاہتے ہیں یورپ بھی اب اس معاملے میں مزید اقدامات کرے اور آگے آئے، مشرق وسطیٰ ہمیشہ کے لیے تبدیل ہوگیا ہے۔

ترکیہ نے شامی فوج کو کوبرا اور کیڈیلیک گیج کمانڈو بکتربند گاڑیاں فراہم کر دیں۔

بین الاقوامی میڈیا رپورٹس کے مطابق ترکیہ کی فراہم کردہ بکتربند گاڑیاں حلب میں76ویں ڈویژن کی پاسنگ آؤٹ تقریب میں دکھائی گئیں۔

کیڈیلیک گیج کمانڈو گاڑیاں عام طور پر داخلی سیکیورٹی اور پولیسنگ کیلئے استعمال ہوتی ہیں۔ شامی حکومت کا کہنا ہے کہ ترکیہ سے بات چیت میں فوجی تربیت اور تعاون کے نئے شعبے زیرغور ہیں۔

ترک حکام پہلے ہی شامی فوج کی تربیت اور اسلحہ فراہمی کے منصوبے کا اعلان کر چکے تھے۔ ترکیہ کو شامی فضائی حدود استعمال کرنے اور ایئربیسز کے قیام کی پیشکش کی ہے۔

نئے معاہدے کے تحت ترکیہ کو بیرونی خطرات کی صورت میں شام کو دفاعی تعاون دینا ہو گا۔ شامی حکومت روسی افواج کی جگہ ترک فوجی موجودگی پرغور کر رہی ہے۔

برطانیہ نے فلسطین ایکشن گروپ کو دہشتگرد تنظیم قرار دیتے ہوئے پابندی کی منظوری دے دی۔

برطانوی قانون سازوں نے فلسطین ایکشن گروپ پر پابندی عائد کرنے کے حق میں ووٹ دیا ہے اور اسے ایک دہشت گرد تنظیم قرار دیا ہے۔

ہاؤس آف کامنز نے 385-26 ووٹوں میں منظوری دی ہے۔

قانون سازوں کا کہنا ہے کہ اس گروپ کی حمایت کرنا ایک مجرمانہ فعل ہے اور اسے داعش (ISIS) اور القاعدہ جیسے متشدد گروپوں کے زمرے میں شامل کیا جائے گا۔

فلسطین ایکشن کے کچھ کارکنوں نے برطانیہ کے سب سے بڑے ایئر فورس اسٹیشن آکسفورڈ شائر میں آر اے ایف برائز نورٹن میں گھس کر "اسرائیل کی نسل کشی میں برطانیہ کی حکومت کی ملی بھگت” کی وجہ سے دو فوجی طیاروں پر سرخ رنگ کا اسپرے کیا تھا۔

اس نے اسرائیلی ہتھیار بنانے والی کمپنی Elbit Systems کی تنصیبات پر کارروائیوں میں بھی خلل ڈالا تھا۔

فلسطین ایکشن کو "دہشت گرد” گروپ کے طور پر نامزد کرنے کے دباؤ نے شہری آزادیوں اور فلسطینی حقوق کے حامیوں کے درمیان خطرے کی گھنٹی بجا دی ہے، جو اسے غزہ میں اسرائیل کی جنگ کے خلاف اختلاف رائے کو مجرمانہ بنانے کی مہم میں اضافہ قرار دیتے ہیں۔

گزشتہ منگل کو اقوام متحدہ کے ماہرین نے برطانیہ پر زور دیا کہ وہ دہشت گردی ایکٹ 2000 کے تحت فلسطینی گروپ ’’ڈائریکٹ ایکشن‘‘ پر دہشت گرد تنظیم کے طور پر پابندی نہ لگائے۔

اقوام متحدہ کی نمائندہ خصوصی فرانسسکا البانیز نے برطانیہ کو تنبیہ کی کہ سیاسی احتجاج کو دہشت گردی کہنا آزادی اظہار کے لیے خطرہ ہے، فلسطین ایکشن گروپ کی سرگرمیاں انسانی جانوں کے لیے خطرناک نہیں ہیں، پرامن سیاسی احتجاج کو دہشت گردی کے زمرے میں نہ لایا جائے۔

دوسری طرف یو این ماہرین نے کہا ’’ہمیں سیاسی احتجاجی تحریک کو بلا جواز ’دہشت گرد‘ کے طور پر پیش کرنے پر تشویش ہے۔ بین الاقوامی معیار کے مطابق احتجاج کی ایسی کارروائیاں جن میں املاک کو نقصان پہنچایا جاتا ہے، لیکن ان کا مقصد لوگوں کو مارنا یا زخمی کرنا نہیں ہے، دہشت گردی کے زمرے میں نہیں آتیں۔‘‘