لاہور: مغلپورہ میں موٹرسائیکل سوار کی مسلسل لاپرواہی پر 1 لاکھ 54ہزار روپے جرمانہ عائد کردیا گیا، جو کسی بھی موٹر سائیکل سوار کو ہونے والا یہ سب سے بڑا جرمانہ ہے۔

تفصیلات کے مطابق لاہور میں ٹریفک قوانین کی خلاف ورزی پر ہونیوالے ای چالان نادہندگان کیخلاف گھیرا تنگ کر دیا گیا۔

مغلپورہ میں موٹرسائیکل سوار کی مسلسل لاپرواہی پر ایک لاکھ چوؤن ہزار روپے جرمانہ عائد کر دیا گیا، موٹر سائیکل سوار کو 86 مرتبہ خلاف ورزی پر ایک لاکھ چوؤن ہزار روپے جرمانہ عائد کیا گیا۔

موٹر سائیکل سوار نے مسلسل تہتر بار ہیلمٹ کی خلاف ورزی کی، سی ٹی او لاہور عمارہ اطہر نے بتایا کہ نو بار ٹریفک سگنل، تین بار ون وے اور ایک بار لین لائن کیخلاف ورزی کی، جس پر موٹر سائیکل کو تھانے بند کروا دیا گیا ہے۔

عمارہ اطہر کا کہنا تھا کہ چالان جمع کرانے کے بعد موٹر سائیکل حوالے کی جائے گی، کسی بھی موٹر سائیکل سوار کو ہونے والا یہ سب سے بڑا جرمانہ ہے۔

انھوں نے بتایا کہ ٹریفک قوانین کی انیس خلاف ورزیوں پر ای چالان کا سلسلہ جاری ہے، آرٹیفشل انٹیلی جنس سسٹم سے بلاتفریق کارروائیاں جاری ہیں۔

ملتان : نشتراسپتال ملتان سے نامعلوم خاتون دو روز کے نومولود بچہ اغوا کرکے فرار ہوگئی، تاہم پولیس نے تحقیقات شروع کر دی ہیں۔

تفصیلات کے مطابق ملتان میں نشتر اسپتال وارڈ نمبر 16 سے نامعلوم خاتون نے نومولود کو اغواکر لیا، اغوا کرنے والی خاتون کی سی سی ٹی وی ویڈیو منظرعام پر آگئی ہے۔

ویڈیومیں خاتون کو بچے کو اٹھائےاوروارڈ سے باہرجاتےدیکھاجاسکتا ہے ۔ کبیر والا کے رہائشی ستار کے ہاں گزشتہ روز بچے کی پیدائش ہوئی تھی۔

والد نے بتایا کہ نامعلوم خاتون بیٹے کی پیدائش پر مبارک باد دینے آئی تھی اور بچہ اٹھا کر پیار کرنے لگی، جس کے بعد نامعلوم خاتون بچے کو اپنے شوہر کو دکھانے وارڈ کے دروازے تک لے گئی اور موقع پا کر بچے کو لیکر فرار ہوگئی۔

پولیس کا کہنا ہے کہ مغوی بچے کے والد کی درخواست پرتھانہ کینٹ میں مقدمہ درج کرادیا ہے ، جس کے بعد تحقیقات شروع کر دی گئیں ہیں۔

یاد رہے گذشتہ ماہ پولیس نے شیخ زید ویمن اسپتال سے نومولود کو اغوا کرنے والی ملزمہ کو کراچی سے گرفتار کیا تھا، ایس ایس پی نے بتایا تھا کہ لاڑکانہ پولیس نے کراچی بلدیہ ٹاؤن میں گھر پر چھاپا مار کر بچی کو بازیاب کرایا تھا، ملزمہ نے 18 نومبر کو اسپتال سے نومولود بچی کو اغوا کیا تھا۔

اسلام آباد وزیراعظم کے مشیر برائے سیاسی امور رانا ثنا اللہ نے کہا ہے کہ پی ٹی آئی کے اسٹیبلشمنٹ سے مذاکرات ہو رہے ہیں نہ حکومت سے، محض کسی سے غیر رسمی بات چیت کومذاکرات نہیں کہا جاسکتا۔

تفصیلات کے مطابق وزیراعظم کے مشیر برائے سیاسی امور رانا ثنا اللہ نے اے آر وائی نیوز کے پروگرام خبر محمد مالک کے ساتھ گفتگو میں کہا کہ پی ٹی آئی نے مذاکرات کیلئے وزیراعظم کو کال اور خط یاک وئی رابطہ نہیں کیا، پی ٹی آئی قیادت نے اب تک اسپیکرآفس کو مذاکرات کیلئے کال کی اور نہ ملاقات کی، پی ٹی آئی قیادت رابطہ کرے گی تو ہماری پارٹی کی جانب سے جواب مثبت ہوگا۔

وزیراعظم کے مشیر کا کہنا تھا کہ پی ٹی آئی کے اسٹیبلشمنٹ سے مذاکرات نہیں ہورہے، محض کسی سےرسمی بات کرنے کو مذاکرات نہیں کہا جاسکتا، فاصلے کم ہو سکتے ہیں لیکن پی ٹی آئی کو اپنے رویے میں تبدیلی لانا ہوگی۔

انھوں نے کہا کہ بانی پی ٹی آئی کا رویہ نفرت آمیز ہوتا ہے انہیں اپنا رویہ تبدیل کرناچاہیے، پی ٹی آئی نے بات کرنی ہے تو سیاسی جماعتوں کیساتھ بیٹھ کر بات کرے۔

یاد رہے وفاقی وزیراطلاعات عطا تارڑ نے بھی پی ٹی آئی سے مذاکرات کی خبروں کی تردید کرتے ہوئے کہا تھا کہ پی ٹی آئی سے باضابطہ طور پرکوئی مذاکرات شروع نہیں ہوئے تاہم غیر رسمی ملاقاتیں ضرورہورہی ہیں۔

انھوں نے بتایا تھا کہ کمیٹیوں کی بھی کوئی ملاقات نہیں ہوئی اور نہ ہی اسپیکر کے گھر وزیراعظم یا اسپیکر کی کوئی ملاقات ہوئی۔