پاکستان نے آسٹریلیا کو 22 سال بعد اسی کی سر زمین پر ون ڈے سیریز ہرا دی کپتان محمد رضوان نے اس فتح کا کریڈٹ پوری ٹیم کو دیا ہے۔

میچ کے بعد گفتگو کرتے ہوئے محمد رضوان نے کہا کہ آسٹریلیا کو اس کے گھر پر ہرانا کبھی بھی آسان نہیں ہوتا۔ فاسٹ بولرز نے سیریز میں شاندار پرفارمنس دکھائی جب کہ صائم ایوب اور عبداللہ شفیق نے ٹیم کو اچھے اسٹارٹ دیے۔

محمد رضوان نے کہا ک ہماری ٹیم نے توقعات کے مطابق پرفارم کیا۔ میری ٹیم کا ہر کھلاڑی کپتان ہے اور ہم یہ سیریز سب کے مشوروں سے جیتے ہیں۔

ان کا یہ بھی کہنا ہے کہ فینز ہمیں ہر جگہ سپورٹ کرتے ہیں، چاہے موسم جیسا بھی ہو یا ہم جیتں یا ہاریں۔

واضح رہے کہ محمد رضوان کا وائٹ بال کپتان مقرر ہونے کے بعد پہلا اسائنمنٹ دورہ آسٹریلیا ہے۔ کینگروز کے دیس آنے سے قبل انہوں نے کہا تھا کہ آسٹریلیا میں کافی عرصے سے نہیں جیتے تو اس کا مطلب یہ نہیں کہ کبھی نہیں جیت سکتے۔

رضوان نے جو کہا وہ کر دکھایا اور سیریز میں دو صفر سے فتح اپنے نام کی۔ اب ان کا دوسرا امتحان تین ٹی 20 میچوں کی سیریز ہے جس کا آغاز 14 نومبر سے ہوگا۔

پہلا میچ برسبین میں 14 نومبر کو، دوسرا میچ سڈنی میں 16 نومبر جب کہ تیسرا اور آخری میچ ہوبارٹ میں 18 نومبر کو کھیلا جائے گا۔ تینوں میچز پاکستانی وقت کے مطابق دوپہر ایک بجے شروع ہوں گے۔

محمد رضوان ورلڈ چیمپئنز کو اُن ہی گھر پر زیر کرنے والے دوسرے کپتان

پاکستان کرکٹ بورڈ کے چیئرمین محسن نقوی نے آسٹریلیا کو اسی سر زمین پر ون ڈے سیریز میں شکست دینے پر پاکستانی ٹیم کو مبارک باد پیش کی ہے۔

پاکستان کرکٹ بورڈ کے چیئرمین محسن نقوی نے پاکستان ٹیم کے نام تہنیتی پیغام میں کہا ہے کہ آسٹریلیا جیسی مضبوط ٹیم کو شکست دے کر کھلاڑیوں نے قوم کا سر فخر سے بلند کر دیا ہے۔ اس تاریخی جیت پر تمام کھلاڑی اور منیجمنٹ تعریف کے مستحق ہیں۔

محسن نقوی نے کہا کہ یقین ہے کہ جذبے، محنت اور عزم سے ہر کام میں کامیابی ملتی ہے۔ 8 وکٹوں سے کامیابی ٹیم ورک کا نتیجہ ہے۔ قومی ٹیم نے فیلڈنگ، باؤلنگ اور بیٹنگ میں آسٹریلیا کو آؤٹ کلاس کیا۔ آج کی فتح نے پوری قوم کے چہروں پر خوشیاں بکھیر دی ہیں۔

ان کا مزید کہنا تھا کہ پہلے نسیم شاہ، شاہین شاہ آفریدی اور حارث رؤف نے عمدہ بولنگ کی۔ پھر صائم ایوب اور عبداللہ شفیق نے ذمے داری سے بلے بازی کی جب کہ بابر اعظم اور محمد رضوان نے بھی بہترین بیٹنگ کا مظاہرہ کیا۔

پاکستان نے 22 سال بعد آسٹریلوی قلعہ فتح کر لیا، ون ڈے سیریز جیت لی

پاکستان کے فاسٹ بولر حارث رؤف آسٹریلین آل راؤنڈر گلین میکسویل کے لیے ڈراؤنا خواب بن گئے اور سیریز میں تینوں بار ان ہی کی وکٹ بنے۔

گلین میکسویل کا شمار موجودہ کرکٹ میں دنیا کے بہترین آل راؤنڈرز میں ہوتا ہے۔ انہوں نے آسٹریلیا کو کئی بار تن تنہا میچز جتوائے اور گزشتہ سال ون ڈے ورلڈ کپ میں چھٹی بار چیمپئن بننے کے پیچھے بھی ان کی آل راؤنڈ پرفارمنس شامل تھی۔

تاہم پاکستان کے خلاف تین ون ڈے میچوں پر مشتمل سیریز گلین میکسویل کے کیریئر کی سب سے خراب سیریز ثابت ہوئی جس میں وہ نہ صرف ہر فیلڈ میں ناکام رہے بلکہ حارث رؤف ان کے لیے ڈراؤنا خواب بن گئے۔

آسٹریلوی آل راؤنڈر جنہوں نے تین میچز کی تین اننگز میں صرف 16 رنز ہی بنائے انہیں تینوں بار حارث رؤف نے آؤٹ کیا اور دو بار تو رنز کا کھاتہ کھولنے کا موقع ہی نہ دیا۔

جارح مزاج بلے باز نے حارث رؤٖ کی نو گیندوں کا سامنا کیا۔ میلبرن میں کھیلے گئے پہلے میچ میں وہ بغیر کوئی رن بنائے آؤٹ ہوئے۔ محمد رضوان نے وکٹوں کے عقب میں ان کا کیچ لیا۔

ایڈیلیڈ میں کھیلے گئے دوسرے میچ میں وہ 16 رنز تک ہی پہنچے تھے کہ حارث رؤف کے آتے ہی ایسے اوسان خطا ہوئے کہ اسی اسکور پر وہ چلتے بنے۔

اس میچ میں انہوں نے اپنے کیریئر میں دوسری بار ون ڈے میچ میں پانچ وکٹیں لینے کا اعزاز بھی اپنے نام کیا تھاْ

آج پرتھ میں فیصلہ کن میچ بھی وہ صرف دو گیندیں کھیل کر صفر پر حارث رؤف کی وکٹ بنے۔

واضح رہے کہ حارث رؤف تین میچوں میں 10 وکٹیں لے کر سیریز کے سب سے کامیاب  اور سیریز کے بہترین بولر قرار پائے ہیں۔

پاکستان نے 22 سال بعد آسٹریلوی قلعہ فتح کر لیا، ون ڈے سیریز جیت لی