اسلام آباد: قومی اسمبلی میں قائدِ حزبِ اختلاف خورشید کا کہنا ہے کہ وزیراعظم اسمبلی سے اکثر غیر حاضر رہتے ہیں اُن کا پسندیدہ ملک برطانیہ ہے اسی لیے اکثر وہیں رہتے ہیں، حکومت قرضوں اور قطری شہزادے کے خط پر چل رہی ہے۔
میڈیا سے گفتگو کرتے خورشید شاہ کا کہنا تھا کہ وزیراعظم نواز شریف اسمبلی بھی شاذ و نادر ہی آتے ہیں اس لیے کم کم ملاقات ہوپاتی ہے اور اسمبلی سے غیر حاضر رہنے کا یہ رجحان صحت مند نہیں، جمہوریت میں قومی اسمبلی کی اہمیت ریڑھ کی ہڈی کی مانند ہے۔
خورشید شاہ نے کہا کہ پارلیمنٹ ہی ہر مسئلے کا حل پیش کرتی ہے اور پاناما کیس کے فیصلے کے لیے بھی پارلیمنٹ بہترین فورم ہے شاید یہی وجہ ہے کہ میاں صاحب یہاں آنے سے کتراتے ہیں۔
خورشید شاہ نے ایک سوال کے جواب میں کہا کہ نواز شریف ملک کو قرضوں اور قطری شہزادے کے خط کے ذریعے چلا رہے ہیں کارکردگی تو کہیں نظر نہیں آتی۔
خورشید شاہ نے پاناما کیس کے حوالے سے پوچھے گئے سوال کے جواب میں کہا کہ قطر کے شہزادے کا خط آنے کے بعد اب کسی اور ثبوت کی ضرورت نہیں رہی۔
