قومی ٹیم کے کپتان مصباح الحق نے سری لنکا کیخلاف تیسرے ٹیسٹ میچ کی جیت کوچ ڈیو واٹمورکے نام کردی ہے ,دبئی میں سری لنکا کیساتھ سیریز کھیلنے کے بعد ٹیسٹ اسکواڈ میں شامل مصباح الحق ،محمد حفیظ ،سعید اجمل ،عبدالرحمن ،اظہر علی، احمد شہزاد، راحت علی، محمد طلحہ وطن واپس پہنچ گئے۔

اس موقع پر میڈیا سے گفتگو کرتے ہوئے مصباح الحق کا کہنا تھا کہ تیسرے ٹیسٹ میچ میں سری لنکا کیخلاف جیت ٹیم ورک کا نتیجہ ہے۔ اظہر علی اور سرفراز نے شاندار کھیل کا مظاہرہ کیا لیکن اس فتح کو ٹیم ورک قرار دیتے ہیں۔

مصباح نے کہا کہ گرائونڈ میں مونچھوں کو تائو دینے کا اشارہ ڈیو واٹمور کیلئے کیا تھا کہ یہ جیت آپ کے نام ہے۔ نوجوان بلے باز محمد اظہرنے گفتگو کرتے ہوئے کہا کہ ہم میچ جیتنے کی کوشش کے ساتھ ہی میدان میں اترے تھے ہمارے لئے مرنے یا مارنے سی صورتحال تھی۔

ٹارگٹ بیشک زیادہ تھا لیکن مصباح الحق اور منیجر نے کہا تھا کہ ہار سے نہیں ڈرنا اور صرف جیت کیلئے گرائونڈ میں جانا ہے۔ کپتان مصباح کا کہنا ہے کوچ کوئی بھی ہو سیکھنا ٹیم نے خود ہی ہوتا ہے۔

کرکٹ آسٹریلیا نے جنوبی افریقہ کے خلاف ٹیسٹ سیریز کے لئے پندرہ رکنی اسکواڈ کا اعلان کردیا۔

آسٹریلیا اور جنوبی افریقہ کے درمیان تین میچز کی ٹیسٹ سیریز کا آغاز آئندہ ماہ بارہ فروری سے سینچورین میں کھیلے جانے والے ٹیسٹ سے ہوگا، طویل دورانیئے کی سیریز کے لئے آسٹریلیا نے پندرہ رکنی اسکواڈ کا اعلان کردیا ہے۔

انگلینڈ کے خلاف ایشیز سیریز میں مایوس کن پرفارمنس کے باعث جارج بیلے کو ڈراپ کردیا گیا ہے، شان مارش اور ایلکس ڈولن پندرہ رکنی اسکواڈ میں جگہ بنانے میں کامیاب ہوگئے، ٹیم کی قیاد ت مائیکل کلارک کریں گے، بریڈ ہیڈن ان کے نائب ہوں گے۔

انگلش پریمئیر لیگ فٹبال میں چیلسی نے مانچسٹر یونائیٹڈ کو ایک کے مقابلے میں تین گولز سے شکست دے دی۔

اسٹیمفورڈ برج پر کھیلے گئے اہم میچ میں چیلسی نے سیمیول ایٹو کی ہیٹرک کی بدولت مانچسٹر یونائیٹڈ کو زیر کیا۔ چیلسی نے کھیل کا عمدہ آغاز کیا اور سترویں منٹ میں ایٹو کے گول کی بدولت برتری حاصل کی۔ پہلے ہاف کے اختتام پر ایٹو نے چیلسی کی برتری کو دگنا کردیا۔

دوسرے ہاف میں بھی چیلسی کا پلڑا بھاری رہا۔ انچاسویں منٹ میں سیمیول ایٹو نے ہیٹرک گول کرتے ہوئے میچ میں ٹیم کی پوزیشن مضبوط بنادی۔ اٹھترویں منٹ میں چیلسی کے اسٹرائیر ہرنینڈز نے گول کرکے خسارہ کم کیا لیکن ٹیم کو شکست سے نہ بچاسکے۔ اس ناکامی کے بعد مانچسٹر کی ٹیم ٹائٹل کی دوڑ سے باہر ہوگئی ہے۔

آسٹریلین اوپن ٹینس ٹورنامنٹ میں اپ سیٹ کا سلسلہ جاری ہے۔ عالمی نمبر ایک امریکہ کی سرینا ولیمز اور روس کی ماریہ شراپوا شکست کے بعد ٹورنامنٹ سے باہر ہوگئیں۔

میلبورن میں جاری سال کے پہلے گرینڈ سلم ایونٹ کے چوتھے راؤنڈ کے میچ میں عالمی نمبر ایک امریکہ کی سرینا ولیمز کا مقابلہ فورٹینتھ سیڈ سربیا کی اینا ایوانووچ سے تھا، امریکی کھلاڑی نے کھیل کا آغاز تو جیت کے ساتھ کیا لیکن وہ اختتام فتح کے ساتھ نہ کرسکیں۔ سرینا نے پہلا سیٹ چار چھ سے جیت کر برتری حاصل کی۔ جس کے بعد ایوانووچ نے بھرپور کم بیک کیا اور یک کے بعد دیگرے دونوں سیٹس چھ تین اور چھ تین سے جیت کر کوارٹرفائنل میں جگہ بنالی۔

ایک اور میچ میں سلواکیہ کی ڈومینیکا سبلکووا نے تھرڈ سیڈ روس کی ماریہ شراپوا کو اپ سیٹ کردیا۔ سلواکین کھلاڑی نے ایک سیٹ کے خسارے میں جانے کے باوجود شراپوا کو تین چھ، چھ چار اور چھ ایک سے قابو کرلیا۔ مینز سنگلز میں عالمی نمبر دو سربیا کے نوواک جوکووچ نے اٹلی کے فیبیو فوگنینی کو زیر کرتے ہوئے آخری آٹھ کھلاڑیوں تک رسائی حاصل کی۔

کسٹم کرکٹ اکیڈمی کے ہیڈ کوچ جلال الدین کی نگرانی میں جاری فاسٹ باولنگ کیمپ میں شہر بھر سے پندرہ نوجوان کرکٹر حصہ لے رہے ہیں، کیمپ میں موجود کھلاڑیوں کی عمر تیرہ سے اکیس سال کے درمیان ہے، کیمپ کے دوران کھلاڑیوں کو لائن اور لینتھ کے علاوہ ان سوئنگ آوٹ سوئنگ کے گر بھی سکھائے جارہے ہیں۔

ہیڈ کوچ جلال الدین کا کہنا ہے کہ کیمپ میں صرف بولنگ ٹیکنیک ہی نہیں بولرز کو پچ ریڈنگ بھی بتائی جارہی ہے، نوجوان کھلاڑیوں نے کہاکہ ا س کیمپ سے انکی صلاحیتوں میں بے پناہ اضافہ ہوا ہے۔

خصوصی طور پر کیمپ میں شامل کی جانے والی خاتون کھلاڑی نے کہا کہ کوچز نے فٹنس کے حوالے سے بھی ٹپس دی ہیں۔  شرکا کا کہنا ہے کہ صرف بولنگ نہیں بلکہ کرکٹ کے دیگر شعبوں کو نکھارنے کے لئے اس طرح کے کیپمس کا انعقاد ہونا چاہیے۔