لاہور:  رائے ونڈ روڈ پر سیکورٹی فورسز اور مبینہ دہشت گردوں میں  دس گھنٹے سے مقابلہ جاری ہیں، فائرنگ کے تبادلے میں ایک سیکورٹی اہلکارشہید، تین زخمی ہوگئے۔

سیکیورٹی اہلکاروں کو دہشت گردوں سے نبرد آزما ہوئے دس گھنٹے ہوگئے، سیکیورٹی ادارے تاحال کامیابی حاصل نہیں کرسکے، زرائع کے مطابق رات کے دو بجے سیکیورٹی اہلکاروں نے رائے ونڈ روڈ پر پنڈ آرائیاں میں مشکوک افراد کی موجودگی کی اطلاع پر سر چ آپریشن کیا، اس دوران ایک مکان سے سیکیورٹی اہلکاروں پر فائر کھول دیا گیا، تخریب کاری کے فوری بعد اہلکاروں نے کمپاؤنڈ کو گھیرے میں لے لیا۔

پولیس کے مطابق مقابلہ رات دو بجے شروع ہوا دہشت گردوں کی فائرنگ سے ایک اہلکار شہید ہوگیا، دہشت گردوں نے مکان عبد السعد نامی شخص سے کرائے پر حاصل کیا تھا، مالک مکان کو پولیس نے حراست میں لے لیا ہے۔

صوبائی وزیر شجاع خانزادہ کا کہنا ہے کہ دہشت گردوں کی حتمی تعداد کے بارے میں کچھ نہیں کہا جا سکتا، حکمت عملی کے تحت احتیاط سے کام لے رہے ہیں، دہشت گردوں کو زندہ پکڑنا اولین ترجیح ہے، خانزادہ شجاع خانزادہ نے بتایا کہ دہشت گردوں کے پاس کافی تعداد میں اسلحہ موجود ہے۔

پولیس اور دہشت گردوں کے درمیان فائرنگ کا سلسلہ جاری ہے، پولیس نے حفاظتی حکمت عملی کے تحت آس پاس کے مکانات خالی کرالئے ہیں، مقابلے میں زخمی ہونے والے تین اہلکاروں کو جناح اسپتال لایا گیا ہے، دواہلکار دہشت گردوں کی گولیاں لگنے سے اور ایک سیڑھیوں سے گرکر زخمی ہوا۔