کراچی : سابق صدر آصف علی زرداری کہتے ہیں کہ انصاف کا ترازو لے کر سیاست کی بات کرنیوالوں نے ڈاکہ مارا، انتخابات میں ووٹ چوری کئے گئے، ملک میں اگر کچھ چلے گا تو جمہوریت ہی چلے گی، اللہ نے پاکستان کو وسائل سے مالا مال کیا ہوا ہے، ہم میں کسی چیز کی کمی ہے تو وہ ہے مل بیٹھ کر مسائل حل کرنے کی عقل، کل کا پاکستان بہتر کرنے کیلئے آواز بلند کررہا ہوں، عوام ایک سوچ پر کھڑے ہوئے تو کسی کی ضرورت نہیں ہوگی، الطاف بھائی کو بھی سمجھانا ہے کہ ہمیں ساتھ مل کر رہنا اور کام کرنا ہوگا۔

کراچی میں پیپلزپارٹی کے جلسے سے خطاب کرتے ہوئے سابق صدر اور شریک چیئرمین آصف علی زرداری نے کہا کہ ہر جگہ پیپلز پارٹی کا جھنڈا ہے، انصاف کا ترازو لیکر سیاست کی بات کرنیوالوں نے ڈاکہ مارا، اسپتال بنا کر لوگوں کو بے وقوف بنایا جاسکتا ہے ہمیں نہیں، اللہ نے پاکستان کو وسائل سے مالامال کیا، مگر ہم میں مل بیٹھ کر مسائل حل کرنے کی عقل نہیں ہے۔

وہ کہتے ہیں کہ ہماری حکومت نے قانون اور عوام کی خدمت کی، اللہ نے اقتدار کا موقع دیا تو ہر کسان کے پاس ٹیوب ویل ہوگا، گندم، کپاس اور چینی کی امدادی قیمت میں اضافہ کریں گے، عوام ایک سوچ پر کھڑے ہوئے تو کسی کی ضرورت نہیں ہوگی۔

سابق صدر نے کہا کہ ایل او سی پر جوان شہید ہورہے ہیں اور اسلام آباد میں مداریوں کا کھیل جاری ہے، آئیں کوئی مثبت اور خدمت کی بات کریں، اس دن سے ڈرتا ہوں جب عوام شیطان کے ہاتھوں میں ہاتھ ڈالیں، کل کا پاکستان بہتر کرنے کیلئے آواز بلند کررہا ہوں، انتخابات میں ووٹ چوری کئے گئے، میں ماضی کی نہیں آنیوالے کل کی بات سننا چاہتا ہوں۔

شریک چیئرمین پی پی پی کہتے ہیں کہ پاکستان بے نظیر کا پاکستان بن کررہے گا، ایسا نہ ہوکہ کوئی تحریر اسکوائر بنانا پڑے، ملک میں اگر کچھ چلے گا تو جمہوریت ہی چلے گی، اس شہر کے لیڈر الطاف بھائی کو بھی سمجھانا ہے کہ ہمیں مل جل کر کام کرنا ہے۔

عمران خان پر تنقید کرتے ہوئے ان کا کہنا تھا کہ ریفرنڈم میں آمر کو ووٹ دیکر آپ نے گناہ کیا، کیا اس پر معافی مانگ لینا کافی ہے؟، آپ کس کس غلطی کی معافی مانگیں گے؟، اتنے بڑے جلسے کون فائنانس کررہا ہے؟، آپ کے پاس مال کہاں سے آرہا ہے؟