جرمنی سے تعلق رکھنے والے فارمولا ون لیجنڈ مائیکل شومارکر فرانس میں اسکیٹنگ کے دوران حادثے کے نتیجے میں شدید زخمی ہو کر کومے میں چلے گئے۔

غیر ملکی خبر رساں ادارے کے مطابق ان کے سر پر شدید چوٹیں آئی ہیں اور اُنکی حالت انتہائی تشویشناک بتائی جاتی ہے، اسکیٹنگ کے دوران سر پر گہری چوٹیں آنے کے بعد انہیں برین ہیمرج کا سامنا ہے۔

ڈاکٹر کا کہنا ہے کہ شوماکرکا فوری آپریشن کیا جائیگا، مائیکل شومار کرسات بار ورلڈ چیمپئن رہ چکے ہیں، انہوں نے فارمولا ون کو سن دو ہزار بارہ میں مکمل طور پر خیرباد کہہ دیا تھا، مُہم جو طبیعت کی وجہ سےانہیں کئی بار حادثوں کا سامنا کرنا پڑا۔
    
   

مصر میں عبوری حکومت کے خلاف مظاہروں میں تیزی آگئی، پولیس کی فائرنگ اورشیلنگ سے پانچ جاں بحق متعدد زخمی ہوگئے، تین سو طلباء کو دہشت گردی ایکٹ کے تحت گرفتار کرلیا گیا۔

   جامعہ الازہر قاہرہ کے طلباء کا عبوری حکومت کے خلاف کئی روز سے جاری احتجاج شدت اختیار کرگیا، احتجاج کے باعث جامعہ میں ہونیوالے پرچوں کے متاثر ہونے کا خدشہ پیدا ہوگیا ہے۔

گذشتہ روز پولیس نے مظاہرین کو منتشر کرنے کیلئے جامعہ الازہر پر دھاوا بول دیا، جس سے پولیس اور طلبہ کے درمیان جھڑپیں شروع ہوگئیں، پولیس نے طاقت کا استعمال کرتے ہوئے طلبہ کو تشدد کا نشانہ بنایا۔

پولیس فائرنگ اور شیلنگ میں ایک طالبعلم جان کی بازی ہارگیا جبکہ متعدد طلبہ زخمی ہوگئے، مصر کے دیگر شہروں میں بھی ہزاروں مظاہرین عبوری حکومت کے اقدامات کے خلاف سڑکوں پر سراپا احتجاج ہیں، ملک بھر میں ہلاک ہونیوالوں کی تعداد پانچ ہوگئی ہے۔

انڈونیشیا میں بے قابو پک اپ ٹرک نے اٹھارہ افراد کو روند ڈالا، حادثے کے نتیجے میں متعدد زخمی ہوگئے۔

غیر ملکی خبر رساں ادارے کے مطابق انڈونیشیا کے صوبے جاوا میں ایک پک اپ ٹرک اوور ٹیک کرتے ہوئے بے قابو ہو کر گاڑیوں پر چڑھ گیا، جس کے نتیجے میں تین کاروں میں سوار اٹھارہ افراد ہلاک ہوگئے۔

ہلاک ہونے والوں میں بچے اور خواتین بھی شامل ہیں، حکام کے مطابق گاڑیوں میں اکتالیس مسافر سوار تھے، زخمیوں کو طبی امداد فراہم کرنے کے لئے قریبی اسپتال منتقل کر دیا گیا ہے۔

بھارت اسرائیل سے بارہ ارب روپے مالیت کے پندرہ ڈرون طیارے خریدے گا, ڈرون طیارے خریدنے کی منظوری وزیراعظم من موہن سنگھ نے دے دی ہے۔

بھارت کا جنگی جنون کسی طور کم ہونے کا نام نہیں لے رہا، اسلحے کے انبار کے باوجود بھارت آئے دن ہتھیاروں کی خریداری کر کے خطے کے امن کو خطرے میں ڈالنے کا سبب بن رہا ہے۔

اب بھارت نے اپنے پڑوسی ملکوں پاکستان اور چین کی نگرانی کے لئے مزید پندرہ ڈرون طیارے خریدنے کا فیصلہ کیا ہے اور وہ یہ طیارے اسرائیل سے خریدے گا، ہیرن نامی ڈرون طیاروں کی مالیت بارہ ارب روپے ہے۔

ڈرون خریدنے کی منظوری وزیراعظم من موہن سنگھ کی سربراہی میں کابینہ کے حالیہ اجلاس میں دی گئی، بھارتی فوج کی نادرن کمانڈ نے ڈرون حاصل کرنے کا عالمی سطح پر ٹینڈر جاری کر رکھا ہے۔

بھارتی بحریہ نے مشرقی اور مغربی سمندری سرحدوں میں اسرائیلی ساختہ ڈرون کے تین آپریشنل اسکواڈرن بھی تعینات کر رکھے ہیں، چالیس سے زائد ڈرون طیاروں کا فلیٹ پہلے ہی بھارتی افواج کے زیراستعمال ہے، جسے اپ گریڈ کیا جائے گا، بھارتی فضائیہ انیس سو نوے سے ڈرون طیاروں سے سرحدوں کی نگرانی کر رہی ہے۔
       

      امریکا کی کئی ریاستوں میں برف کے طوفان نے معمولات زندگی منجمد کردیئے ہیں، بعض علاقوں میں درجہ حرارت نقطہ انجماد سے کئی درجے نیچے گرگیا۔

امریکی عوام کو انتہائی سخت موسم کا سامنا ہے، مختلف ریاستوں میں برفانی طوفان سے کاروبار زندگی معطل ہوگیا اور لوگ گھروں میں محصور ہوگئے ہیں۔

ٹیکساس ،آرکنساس اور دیگر ریاستوں میں ہزاروں افراد بجلی سے محروم سرد موسم کی سختیاں جھیلنے پر مجبور ہیں، برف کے طوفان کی وجہ سے تقریبا دو ہزار پروازیں بھی منسوخ کر دی گئیں اور ہزاروں مسافر ایئرپورٹ پر پھنسے رہے۔

سڑکوں پر برف کی وجہ سے کئی حادثات بھی ہوئے، سڑکوں سے برف ہٹانے کا کام جاری ہے، محکمہ موسمیات نے سرد موسم مزید جاری رہنے کی پیش گوئی کی ہے۔