متحدہ قومی موومنٹ کے قائد الطاف حسین نے حضرت امام حسین کے چہلم کے موقع پراورنگی ٹاؤن نمبر 10اور سی بریزپلازہ کے قریب ریموٹ کنٹرول بم دھماکوں کی سخت ترین الفاظ میں مذمت کی ہے اور بم دھماکوں کے نتیجے میں متعدد افراد کے شہید اورمتعدد کے زخمی ہونے پر گہرے دکھ اور افسوس کااظہارکیا ہے۔

ایک بیان میں انہوں نے کہاکہ حضرت امام حسین کے چہلم کے جلوسوں کی گزرگاہوں پر دہشت گردوں نے ریمورٹ کنٹرول بم دھماکے کرکے ثابت کردیا ہے کہ وہ فرقہ وارانہ فسادات کراکر ملک و قوم کو غیر مستحکم کرنا چاہتے ہیں۔ انہوں نے کہاکہ ملک نازک ترین صورتحال سے گزررہا ہے ۔

دہشت گرد ملک کی سالمیت کے درپے ہیں اور ایسی صورتحال میں کسی بھی دہشت گردی کے واقعہ پر تمام مکاتب فکر کے علمائے کرام اور عوام اپنے درمیان اتحاد و بھائی چارے کی فضا برقرار رکھیں ، افواہوں پر کان نہ دھریں اور آپس میں دست وگریباں ہونے کے بجائے دہشت گردوں اور انکے مذموم عزائم کا متحد و منظم ہوکر مقابلہ کریں ۔

انہوں نے بم دھماکوں نتیجے میں شہید افراد کے لواحقین سے دلی تعزیت وہمدردی کااظہار کرتے ہوئے ان کے بلند درجات اور زخمیوں کی جلد ومکمل صحت یابی کیلئے دعا بھی کی۔

الطاف حسین نے وزیراعظم نواز شریف ، وفاقی وزیر داخلہ چودھری نثار اور وزیراعلیٰ سندھ سید قائم علی شاہ سے مطالبہ کیا کہ اورنگی ٹاؤن نمبر 10اور سی بیریز پلازہ کے قریب حضرت امام حسین کے جلوس کی گزرگاہوں پر ریمورٹ کنٹرول بم دھماکوں کا سختی سے نوٹس لیاجائے اور اس میں ملوث دہشت گردوں کو فی الفور گرفتار کرکے قرار واقعی سزا دی جائے۔

سابق صدر پرویز مشرف کی جانب سے اکتیس جولائی کے فیصلے پر نظرثانی کی درخواست سپریم کورٹ نے اعتراض لگا کر واپس کردی۔

رجسٹرار سپریم کورٹ نے درخواست پر اعتراض لگاتے ہوئے کہا کہ درخواست مشرف کے وکیل شریف الدین پیر زادہ ہی دائر کر سکتے ہیں، اس درخواست پروکیل کا نام تو ہے لیکن ان کے دستخط نہیں ہیں۔

دوسری جانب پرویزمشرف نے انٹرا کورٹ اپیل دائرکرنے کا فیصلہ کرلیا، جس میں سابق صدر نے موقف اپنایا ہے کہ تین نومبر کے واقعے میں وہ اکیلے نہیں تھے بلکہ اور بھی لوگ شامل تھے، ان معاونین کا ذکر نہیں، صرف انھیں گھسیٹا جارہا ہے، ایمر جنسی متعلقہ افراد کی مشا ورت سے لگائی گئی تھی۔

حضرت امام حسین اور شہدائے کربلا کے چہلم کے موقع پرملک بھرمیں سیکیورٹی ہائی الرٹ ہے، پولیس اور رینجرز کے ساتھ ساتھ دس ہزار فوجی جوانوں کو ملک بھر کے حساس مقامات پر تعینات کیا گیا ہے۔

چہلم کے موقع پر کراچی سمیت مختلف شہروں میں جلوس کے راستوں پر کنٹینرز لگائے گئے ہیں اور سی سی ٹی وی کیمروں سے جلوسوں کی نگرانی کی جا رہی ہے، کراچی میں چہلم کے ستر سے زائد جلوس اور دوسونوے کے قریب مجالس عزا منعقد ہورہی ہیں۔

کراچی کے مرکزی جلوس کی سیکیورٹی پر پانچ ہزارسے زائد پولیس اہلکار مامور کیے گئے ہیں جبکہ شہر کے حساس مقامات پر انتظامیہ کی مدد کیلئے فوج کے دستے تعینات کردیے گئے ہیں، کوئٹہ میں پولیس، ایف سی اور بی آر پی کےپانچ ہزار سے زائد اہلکار جبکہ پہاڑوں پر لیویز کا عملہ تعینات کیا گیا ہے۔

فوج کو بھی شہر کے تین مقامات پر اسٹینڈ بائی رکھا گیا ہے، اسلام آباد سے راولپنڈی جانے والے کئی راستوں کو کنٹینرز لگا کر بند کردیا گیا ہے، فوج، رینجرز اور پولیس سمیت ساڑھے چھ ہزار سیکیورٹی اہلکارتعینات کئے گئے ہیں۔

لاہور میں نماز فجرسے مرکزی جلوس کے راستوں پر تین ہزار سے زائد اہلکارڈیوٹیاں دے رہے ہیں، ملتان میں فوج کی چار کمپنیاں اور سکھر میں پولیس، رینجرز، بم ڈسپوزل اسکواڈ اور سادہ لباس پولیس اہلکار جلوس کے مرکزی راستوں پرموجود ہیں۔

پشاور میں جلوس کی گزرگاہوں پر پولیس اور ایف سی کی نفری تعینات ہے، خیرپور میں شہر کے داخلی اور خارجی راستوں پر پولیس اور رینجرز کی پچیس چوکیاں قائم ہیں، بنوں میں آج صبح چھ بجے سے عائد کیا جانے والا کرفیو شام پانچ بجے تک نافذ رہے گا۔