وزیراعلٰی سندھ کی زیر صدارت امن و امان سے متعلق اجلاس ہوا، جس میں پولیس اور صحافیوں پر حملوں، امن وامان کی صورتحال پر تبادلہ خیال کیا گیا۔
وزیراعلیٰ سندھ کی زیر صدارت امن وامان سے متعلق اجلاس میں ایڈیشنل چیف سیکریٹری داخلہ، آئی جی، ڈی جی رینجرز،ایڈیشنل آئی جی نے شرکت کی، اجلاس میں حساس اداروں کے نمائندے بھی شریک تھے۔
اجلاس میں پولیس اور صحافیوں پر حملوں،امن وامان کی صورتحال پر تبادلہ خیال کیا گیا جبکہ وزیراعلیٰ سندھ کو ٹارگٹڈ آپریشن سے متعلق بریفنگ دی گئی۔
وزیراعظم نواز شریف اور چیف آف آرمی اسٹاف جنرل راحیل شریف نے راولپنڈی آر اے بازار سمیت دہشت گردی کے حالیہ واقعات کی شدید مذمت کی ہے۔
سیکیورٹی فورسسز پر پے در پے حملوں کے بعد وزیراعظم نواز شریف اور آرمی چیف کے درمیان ٹیلی فونک رابطہ ہوا، دونوں سربراہان نے ملک میں دہشت گردی اور حالیہ رونما ہونے والے واقعات پر تبادلہ خیال کیا۔
وزیراعظم اور آرمی چیف نے دہشت گردی کے ان واقعات پر گہرے دکھ اور افسوس کا اظہار کیا اور ان واقعات کی مذمت کی، وزیراعظم اور آرمی چیف نے اس عزم کا اعادہ کیا دہشت گردی کے واقعات کی روک تھام کے لئے تمام وسائل بروئے کار لائے جائیں گے۔
ایم کیو ایم کے قائد الطاف حسین نے سیاسی و عسکری قیادت سے مطالبہ کیا کہ طالبان سے مذاکرات کرنے یا نا کرنے کا فیصلہ جلد کیا جائے تاکہ عوام میں خوف و ہراس کو ختم اور دفاعی اداروں کے مورال کو تباہ ہونے سے بچایا جاسکے۔
الطاف حسین نے آج صبح جی ایچ کیو کے گیٹ نمبر پانچ اور مصروف آر اے بازار چوک پر خود کش حملہ کی مذمت اورعوام سے اپیل کی کہ وہ طالبان کے وحشیانہ حملوں کیخلاف متحد ہوجائیں۔
الطاف حسین نے وزیراعظم نواز شریف، وزیر داخلہ چودھری نثار اور عسکری قیادت سے کہا کہ خدارا طالبان سے مذاکرات پر بحث اور وقت ضائع کرنے سے بہتر ہے کہ اس کا جلد فیصلہ کرلیا جائے، روز روز کے دھماکوں سے عوام میں مایوسی پھیلے گی اور قانون نافذ کرنے والوں اداروں کے خوف و ہراس میں اضافہ ہوگا۔
الطاف حسین نے کہا کہ اب طالبان سے مذاکرات یا قوم کو ساتھ لے کر ٹھوس اقدامات پر عمل شروع کردینا چاہئے تاکہ ملک کو مزید جانی و مالی نقصان اور دفاعی اداروں کے مورال کو تباہ ہونے سے بچایا جاسکے، انہوں نے شہیدوں کے لواحقین سے تعزیت، شہداء کے درجات کی بلندی اور زخمیوں کی جلد صحت یابی کیلئے دعا کی ۔
کالعدم تحریک طالبان پاکستان کی جانب سے مذاکرات پر آمادگی سے پہلے بڑے بڑے حملے کیے گئے، جن میں قبائلی علاقوں کے علاوہ شہروں کو بھی نشانہ بنایا گیا۔
طالبان نے حکومت سے ایک بار پھر مذاکرات کی آمادگی ظاہر کردی ہے، کالعدم تحریک طالبان کی جانب سے مذاکرات کی میز پر بیٹھنے کی پیشکش سے پہلے کئی بڑے حملے کئے گئے لیکن مذاکرات کی نئی پیشکش کے فوری بعد آج صبح سات بج کے چالیس منٹ پر آر اے بازار میں چوکی کے قریب ایک اور خود کش حملہ کر دیا گیا۔
دھماکے میں تیرہ افراد جاں بحق اور پچیس زخمی ہوئے، دھماکے کی ذمہ داری بھی طالبان نے قبول کرلی ہے، گزشتہ روز بھی بنوں چھاؤنی میں ہونے والے بم دھماکے میں بیس سیکورٹی اہلکار جاں بحق اور تیس زخمی ہوئے، دھماکے کی ذمہ داری تحریک طالبان پاکستان نے قبول کی۔
مذاکرات پر آمادگی سے پہلے طالبان نے قبائلی علاقوں کے علاوہ شہروں میں بھی اپنی موجودگی ظاہر کی، پہلے کراچی میں عیسی نگری کے قریب ایس پی سی آئی ڈی چوہدری اسلم کو دھماکے کا نشانہ بنایا گیا، ذمہ داری طالبان نے قبول کی، اسکے بعد کراچی میں نجی ٹی وی چینل کے تین ارکان کی ٹارگٹ کلنگ کی ذمہ داری قبول کی۔
اسی طرح پشاور میں عوامی نیشنل پارٹی کے نائب صدر میاں مشتاق کے قافلے پر حملہ کیا گیا جس میں میاں مشتاق سمیت تین افراد جاں بحق ہوئے، لگتا ہے تحریک طالبان پاکستان نے طاقت کا مظاہرہ کرکے مذاکرات کی میز پر آنے کی مشروط آمادگی ظاہر کی تاکہ بات چیت کا ماحول ان کے حق میں سازگار ہو۔
بنوں میں سیکیورٹی فورسز کے قافلے پر حملے میں زخمی ہونیوالے تین اہلکار سی ایم ایچ پشاور میں دم توڑ گئے، جس کے بعد شہید اہلکاروں کی تعداد تئیس ہوگئی ہے۔
دہشتگردوں نے گزشتہ روز بنوں چھاؤنی میں سیکیورٹی فورسز کے قافلے کو نشانہ بنایا، جس میں بیس اہلکار شہید جبکہ تیس زخمی ہوگئے تھے، دھماکے میں شدید زخمیوں کو سی ایم ایچ پشاور منتقل کیا گیا تھا۔
جن میں سے کئی کی حالت اب بھی تشویشناک بتائی جاتی ہے، دھماکے کے بعد بنوں میں سیکیورٹی انتطامات انتہائی سخت ہیں، دوسرے روز بھی بنوں میران شاہ روڈ پر کرفیو نافذ ہے جبکہ شہر کے تمام داخلی اور خارجی راستے سیل کئے گئے ہیں۔
کراچی میں مزاروں پر جانے والے غیر محفوظ ہوگئے، ملیر میں بابا ولائت شاہ کے مزار کے قریب سے تین افراد کی لاشیں ملی ہیں، تینوں کو گولیاں مار کر قتل کیا گیا۔
کراچی میں ایک نئی ٹارگٹ کلنگ بھی شروع کر دی گئی، مزار پر جانے والوں کی جانیں بھی غیر محفوظ بن چکی ہیں، کراچی میں ایک بار پھر مزار پر جانے والے نشانہ بن گئے۔
واقعہ ملیر میں بابا ولائت شاہ کے مزار کے قریب پیش آیا، جس میں تین افراد کو نشانہ بنایا گیا، پولیس کا کہنا ہے کہ تینوں افراد کو گولیاں مار کر قتل کیا گیا، یہ نئی واردات نہیں، اسی مہینے گلشن معمار میں چھ افراد کو بے دردی سے قتل کردیا گیا تھا۔
قتل ہونیوالے افراد میں مزار کا متولی اور زائرین شامل تھے، قتل ہونیوالے افراد کی جیبوں سے طالبان کی جانب سے رکھی گئی پرچیاں بھی برآمد ہوئیں تھیں، جس پر لکھا تھا کہ مزار آنے والوں کا یہی انجام ہوگا۔
سپریم کورٹ نے لاپتہ افراد کیس میں وزارت دفاع کی رپورٹ غیر تسلی بخش قرار دے دی، عدالت نےکہا ہے کہ سات ماہ سے ایک ہی رپورٹ پیش کی جا رہی ہے۔
مقدمے کی سماعت شروع ہوئی تو لاپتہ افراد سے متعلق وزارت دفاع کی جانب سے رپورٹ پیش کی گئی، جس پرجسٹس جواد نے عدم اطمینان کا اظہار کرتے ہوئے کہا کہ پچھلے سات ماہ سے ایک ہی رپورٹ پیش کی جا رہی ہے، لاپتہ افراد کی بازیابی میں سنجیدگی کا مظاہرہ نہیں کیا جارہا۔
وزیراعظم اور اور وزیراعلی خیبر پختو نخوا سے جواب طلب کیا جائے گا، جسٹس جواد نے کہا کہ عدالت کے احکامات پر عمل درآمد نہیں کیا جارہا، حکومت لاپتہ افراد کو بازیاب کرانے میں ناکام ہو چکی ہے، پینتیس میں سے اب تک صرف سات افراد کو بازیاب کرایا گیا ہے۔
عدالت کے طلب کرنے پر اٹارنی جنرل سلمان اکرم بٹ بھی عدالت میں پیش ہوئے، سماعت بائیس جنوری تک ملتوی کردی گئی۔
راولپنڈی آر اے بازار چوک کے قریب خود کش دھماکے پر سیاسی قائدین اور رہنمائوں نے سخت مذمت کی ہے ۔
راولپنڈی آر اے بازار قریب ہونے والے خود کش دھماکے پر وزیراعلیٰ پنجاب شہباز شریف نے مذمت کی، وزیراعلیٰ پنجاب نے زخمیوں کے بہترین علاج کی ہدایت کی اور دھماکے میں قیمتی انسانی جانوں کے ضیاع پر اظہار افسوس کیا۔
وزیر قانون پنجاب رانا ثناءاللہ نے راولپنڈی دھماکے کی بھرپور مذمت کی، وزیراعلیٰ خیبر پختونخوا پرویز خٹک نے خودکش دھماکے کی مذمت کرتے ہوئے کہا کہ سابق حکمرانوں کی غلط پالیسیوں کی وجہ سے دہشتگردی کی عفریت پروان چڑھی۔
جنرل ہیڈ کوارٹر راولپنڈی کے گیٹ نمبر پانچ پر کئے جانے والے خود کش حملہ پر ایم کیو ایم کے قائد الطاف حسین نے اظہار مذمت کیا، سنی اتحاد کونسل کے رہنما صاحبزادہ حامد رضا کی جانب سے راولپنڈی میں خودکش حملے پر اظہار مذمت کیا، انھوں نے کہا کہ مذاکرات کی رٹ چھوڑ کے دہشت گردوں کی خلاف آپریشن کیا جائے۔
ڈاکٹر طاہرالقادری نے دھماکے کی مزمت کرتے ہوئے کہا کہ دہشتگردی کے خاتمے کیلئے حکومت کی کوئی پالیسی ہی نہیں، قائد ملت جعفریہ علامہ ساجد علی نقوی کی طرف سے راولپنڈی بم دھماکے کی مذمت کی۔
شیعہ علما کونسل پنجاب نے دہشت گردوں کے خلاف فوجی آپریشن کا مطالبہ کردیا، پاکستان تحریک انصاف کے چیئرمین عمران خان اور رہنما شاہ محمود قریشی کی جانب سے بھی راولپنڈی دھماکے کی شدید الفاظ میں مذمت کی گئی، امیر جماعت الدعوة حافظ محمد سعید نے بھی دھماکے کی شدید مذمت کی۔
پاکستانی فلم وار کے چرچے دنیا بھر میں ہونے لگے، فلم وار برمنگھم میں ریلیزہوئی تو سنیما ہائوس فل ہوگئے۔
لالی ووڈ فلم وار دنیا بھر میں کمال کرگئی، فلمی تاریخ میں ایسی ملی پذیرائی کہ سب کے سب سنیما کا رخ کرنے لگے، فلم وار نے پاکستان میں تو کامیابی کے پرانے ریکارڈز توڑے تو دنیا بھر میں سپرہٹ ہوئی۔
فلم وار برمنگھم میں ریلیزہوئی تو سنیما گھر کھچا کھچ بھر گئے، وار نے شاندار بزنس کیا، برمنگھم میں رہنے والے اردو فلم میں اس قدر ٹیکنالوجی دیکھ کر بےحد خوش ہوئے، شائقین فلم پاکستان میں فلم کے ریویوز سن کر فلم وار کے شدت سے منتظر تھے، جونہی فلم آئی سنیما کا رخ کیا۔
جدید ٹیکنالوجی ،بہترین اسکرپٹ سے بھرپور اے آروائی فلمز کی پیشکش فلم وار کو بیرون ممالک میں خوب سراہا جارہا ہے۔
