وفاقی وزیرمذہبی امور سردارمحمد یوسف نے کہا ہے کہ تحریک طالبان سامنے آئے تو بات چیت ہو ٹیلی فون پر کیسے معاملات طے ہونگے۔

حیدرآباد میں میڈیا سے گفتگو میں وفاقی وزیرمذہبی امورسردارمحمد یوسف کا کہنا تھا کہ تحریک طالبان سامنے آئے تو بات چیت ہو ٹیلی فون پر معاملات کیسے طے ہوں گے۔

ان کا کہنا تھا کہ ملک میں فرقہ وارانہ ہم آہنگی کیلئے ضابطہ اخلاق مرتب کیا جارہا ہے، لسانی بنیادوں پر صوبوں کی تشکیل کے حامی نہیں ہیں، انتظامی لحاظ سے صوبہ ہزارہ بنانے کے حق میں ہیں۔

کراچی میں خود کش حملے میں شہید ہونے والے ایس پی سی آئی ڈی چوہدری اسلم کو خراج تحسین پیش کرتے ان کا کہنا تھا کہ چوہدری اسلم شہید بہادر آدمی تھے، ان کی قربانی رائیگاں نہیں جائے گی۔
   

خصوصی عدالت کی جانب سے سابق صدر مشرف کیخلاف غداری مقدمے میں ضابطہ فوجداری کے اطلاق کا عندیہ دئیے جانے کے بعد مغربی میڈیا میں مشرف کے ملک چھوڑنے پرنئی بحث چھڑگئی۔

اسلام آباد کی خصوصی عدالت میں جاری مشرف غداری کیس کی سماعت پر مغربی میڈیا خاصی دلچسپی لیتی دکھائی دے رہی ہے، مغربی میڈیا کے مطابق غداری کیس سے سابق صدر کی آزادی کے تمام راستے بند ہوتے دکھائی دے رہے ہیں اور عدالت سے باہر بھی تصفیہ نظر نہیں آتا۔

لاس انجلس ٹائمز اپنی رپورٹ میں لکھتا ہے کہ ایسا لگ رہا ہے کہ پاکستان میں جنرل مشرف کے دن پورے ہونے والے ہیں، جرمن میڈیا کی ویب سائٹ پر جاری رپورٹ کے مطابق مشرف کے علاج پر نواز حکومت اور سابق جنرل میں ڈیل کی قیاس آرائیاں بھی کی جارہی ہیں۔

مشرف کی سولہ جنوری کو عدالت میں عدم پیشی ان کیلئے مشکلات میں اضافہ کرسکتی ہے اور اس پر ان کے وارنٹ گرفتاری بھی جاری ہوسکتے ہیں، رپورٹ کے مطابق مشرف کے معاملے پر فوج کی ناراضگی سے بچنے کیلئے نواز حکومت محتاط انداز اپنائے ہوئے ہے۔

دوسری جانب پاکستان میں ماضی کی جمہوری اتحادی جماعتوں نے حکومت کی مشکلات کے ساتھ سابق فوجی صدر پرویز مشرف کے لئے سازگار ماحول فراہم کرنے کی کوشش کی، جس میں تاحال وہ کامیاب ہوتے دکھائی نہیں دے رہے۔
   

سپریم کورٹ نے لاپتا افراد کیس میں وفاقی حکومت سے سترہ جنوری تک تفصیلی رپورٹ طلب کرلی، جسٹس جواد کا کہنا تھا کہ معلوم نہیں کہ لاپتا افراد کے لئے قائم کمیٹی کب کام کرے گی۔

سپریم کورٹ میں لاپتہ افراد کیس کی سماعت جسٹس جواد ایس خواجہ کی سربراہی میں دو رکنی بنچ نے کی، وزارت دفاع کی جانب سے انیس دسمبر دو ہزار کو رجسٹرار کو جمع کرائی گئی لاپتہ افراد سے متعلق رپورٹ عدالت کے سامنے پیش کر دی گئی۔

جسٹس جواد خواجہ نے کہا کہ خفیہ رپورٹ میں کوئی نئی بات نہیں، حکومت ملک دشمن عناصر کے خلاف کارروائی کرے، ملک دشمن عناصر آئین توڑ رہے ہیں، حکومت بتائے کہ کیا وہ خود آئین کی پاسداری کر رہی ہے، لاپتہ افراد کی بازیابی کے حکم پر عملدرآمد کیوں نہیں کیا گیا۔

رپورٹ میں نہیں بتایا گیا کہ لاپتہ افراد کے غیر آئینی احکامات کا ذمہ دار کون ہے، ایڈیشنل اٹارنی جنرل نے کہا ان کے پاس کوئی جواب نہیں، حکومت نے لاپتہ افراد کے لئے کمیٹی تشکیل دے رکھی ہے، جسٹس جواد ایس خواجہ کا کہنا تھا کہ معلوم نہیں کہ کمیٹی کب بیٹھے گی اور کب کام کرے گی، عدالت نے تفصیلی رپورٹ طلب کرتے ہوئے سماعت ملتوی کردی۔
    
    
    
    
   

دہری شہریت کے حامل اعلیٰ سرکاری افسران کی رپورٹ سینیٹ میں پیش کر دی گئی، مختلف سرکاری محکموں میں گریڈ اٹھارہ سے اوپر چالیس سرکاری ملازمین کی دہری شہریت ہے۔

چیرمین سینٹ نیئر حسین بخاری کی صدارت میں ہونے والے اجلاس میں دہری شہریت کے حامل اعلیٰ سرکاری افسران کی رپورٹ سینیٹ میں پیش کی گئی، کابینہ ڈویژن نے دہری شہریت پر سینیٹ کو تحریری جواب دیا، جس کے مطابق مختلف سرکاری محکموں میں گریڈ اٹھارہ سے اوپر چالیس سرکاری ملازمین کی دہری شہریت ہے۔

آڈٹ آفس کا ایک، ریوینیو آفس کے چار، ٹیکسٹائل انڈسٹری کے چھ افسران کی دہری شہریت ہے، اسٹیٹ بینک کا ایک، وزارت ہاؤسنگ کے چھ  اور او پی ایف کا ایک سرکاری افسر بھی دہری شہریت کا حامل ہے، صنعت و پیداوار کے دو، سی ڈی اے اور مواصلات کا ایک ایک افسر بھی دہری شہریت کے حامل ہیں۔

چیئرمین نادرا طارق ملک سمیت نادرا کے سات افسران دہری شہریت کے حامل ہیں جبکہ بلوچستان حکومت کے چھ ،ریلوے کے دو، پنجاب حکومت کا ایک افسر بھی دہری شہریت کا حامل ہے، دہری شہریت کے حامل افسران کے بارے میں مکمل معلومات فراہم نہ کرنے پر چیئرمین نے برہمی کا اظہار کیا اور کہا کہ ایوان کو مکمل تفصیلات فراہم کی جائیں، سرکاری افسران کی دہری شہریت کا معاملہ استحقاق کمیٹی کے سپرد کر دیا گیا۔

جشن عید میلادالنبی کے سلسے میں ملک بھر میں تیاریاں زور و شور سے جاری ہیں، عاشقان رسول اپنے اپنے انداز میں رسول کریم ﷺ سے اپنی محبت اور عقیدت کا اظہار کر رہے ہیں۔

آمد عید میلاد النبی کے سلسلے میں پاکستان بھر میں جلوس اور مشعل بردار رلیاں نکالی جارہی ہیں، گلی کوچوں کو خوبصورت روشنیوں اور رنگ بہ رنگی جھنڈیوں سے سجادیا گیا ہے۔

کراچی میں جشن عید میلاد النبی ﷺ کے سلسلے میں سرکاری و نجی عمارتوں، شاہراہوں ،مساجد کو دلہن کی طرح سجادیا گیا ہے، لاہور میں داتا دربار سمیت اہم شاہراہوں اور مساجد کو برقی قمقموں سے سجا دیا گیا ہے۔

فیصل آباد میں عید میلادالنبی کے سلسلے میں ملک بھر کی طرح محافل میلاد منعقد کروائی جا رہی ہیں، ملتان میں بازاروں کیساتھ شاہراہوں اور مساجد کو برقی قمقموں سے روشن کردیا ہے۔

گوجرانوالہ میں جشن عید میلاد النبی ﷺ کے سلسلہ میں مشعل بردار جلوس نکالا گیا، جس میں ہزاروں کی تعداد میں عوام الناس میں شرکت کی ، جلوس کے شرکاء موٹر سائیکلوں اور گاڑیوں پر سوار تھے اور انہوں نے انتہائی خوبصورت انداز میں مشعلیں اٹھا رکھیں تھیں، ریلی نے ہر طرف روشنیاں بھکیر دیں۔

سکھر میں ربیع الاول کی مناسبت سے مختلف مذہبی جماعتوں نےایوب گیٹ سے گھنٹہ گھر تک ریلیاں نکالی گئیں، حیدرآباد میں جشن عید میلاد النبی ﷺ کی تیاریاں دیگر شہروں کی طرح جاری ہیں، شہریوں نے گھروں اور گلیوں کو بڑی خوبصورتی سے سجایا ہے۔