کراچی: پاپوش نگر میں بس ٹرمینل کی زمین کی نیلامی منسوخ کرنے کے کیس کی سماعت سپریم کورٹ کراچی رجسٹری میں ہوئی۔

تفصیلات کے مطابق پرائیویٹ کنٹریکٹر کی نیلامی منسوخ کرنے کیخلاف حکم نامے پر نظر ثانی کی درخواست کو مسترد کردیا گیا۔ سپریم کورٹ کراچی رجسٹری میں سماعت کے دوران چیف جسٹس قاضی فائزعیسیٰ نے کہا کہ بس ٹرمینل کی زمین کراچی کے عوام کی ملکیت ہے۔

چیف جسٹس قاضی فائزعیسیٰ کا کہنا تھا کہ رفاعی پلاٹ صرف عوامی مفاد کے لیے استعمال کیا جاسکتا ہے، آپ لوگوں کی ملی بھگت سے ہیر پھیر ہوجاتے ہیں۔ سرکاری افسران تک آپ لوگوں کی جیب میں ہوتے ہیں۔

حکومت کے پاس اختیار ہے وہ نیلامی کا فیصلہ واپس لے سکتی ہے، حکومت اپنے اختیارات لوگوں کے لیے استعمال کررہی ہے تو ٹھیک ہے۔

اس موقع پر وکیل درخواست گزار نے کہا کہ پاپوش نگر میں 2 ہزار گز کا پلاٹ نیلام کرنے کا فیصلہ کیا گیا، درخواست گزار نے سب سے زیادہ بولی دی اور پلاٹ کی 25 فیصد رقم جمع کرادی۔

چیف جسٹس پاکستان نے سوال کیا کہ پلاٹ ابھی کس کے پاس ہے؟ جس پر وکیل کا کہنا تھا کہ پلاٹ درخواست گزار کے پاس ہے، دکانیں بنائی گئی ہیں۔ چیف جسٹس نے کہا کہ 10 سال تک 25 فیصد رقم ادا کرکے کہتے ہیں پلاٹ آپ کے حوالے کردیا جائے؟

محکمہ ٹرانسپورٹ کے لاافسر نے بتایا کہ سندھ حکومت پاپوش نگر میں بڑا بس ٹرمینل بنانا چاہتی ہے، ٹرمینل نہ ہونے کی وجہ سے الیکٹرک بسیں سڑکوں پر کھڑی کرنی پڑرہی ہیں۔ پاپوش نگر میں بڑا بس ٹرمینل بنانے کا منصوبہ بنایا جائے گا۔

کراچی کے علاقے شانتی نگر سے ایک ماہ قبل اسکول کی طالبہ کے اغوا کا واقعہ پیش آیا تھا، جس کے بارے میں اب تک کچھ پتہ نہ چل سکا۔

تفصیلات کے مطابق مغویہ کے چچا آصف کا کہنا تھا کہ تقریباً ایک ماہ گزر گیا ہے بچی کا کچھ پتہ نہیں چلا، 15 سالہ مریم 26 مارچ کو اسکول جانے کیلئے گھرسے نکلی تھی، بچی اسکول یونیفارم میں ملبوس تھی، بیگ بھی ساتھ تھا۔

چچا آصف نے بتایا کہ بچی کے والد کا انتقال ہوچکا ہے، 3 سال سے ہمارے ساتھ رہائش پذیر تھی، عزیز بھٹی پولیس نے واقعے کا مقدمہ درج تو کیا لیکن کارروائی نہیں کی۔

انھوں نے کہا کہ عزیز بھٹی انویسٹی گیشن کے افسران مسلسل ٹال مٹول سے کام لے رہے ہیں، بچی کے اغوا کے بعد سے اہلخانہ غم سے نڈھال ہیں۔

مغویہ مریم کے اہلخانہ کی جانب سے اعلیٰ حکام سے اپییل کی گئی ہے کہ ہماری بچی کو بازیاب کرایا جائے۔

کراچی: ابراہیم حیدری میں نجی اسکول سے متعلق انکوائری کمیٹی کی رپورٹ جاری کردی گئی ہے، کمیٹی نے اسکول کا بھی دورہ کیا۔

تفصیلات کے مطابق کراچی کے نجی اسکول سے بچیوں کو نکالنے کے معاملے پر ان کے والد کی ویڈیو کے حوالے سے انکوائری کمیٹی نے اسکول کا دورہ کیا، انکوائری رپورٹ میں بتایا گیا ہے کہ طالبات کے والد نے غلط بیانی کی ہے کہ بچیوں کو اسکول سے نکالا گیا.

رپورٹ میں بتایا گیا کہ ٹیچر نے والد کو فون کیا کہ ان کی بچیاں پڑھائی پر توجہ نہیں دے رہی ہیں۔ بچیوں کے والد کو کہا گیا کہ پڑھائی نہ کرنے کی وجہ سے بچیاں فیل ہوسکتی ہیں۔

بچیوں کے والد نے اسکول میں داخل ہوکر اسٹاف سے بدتمیزی کی، کمیٹی نے بچیوں کے والد کو 4 مرتبہ فون کیا کہ وہ اپنا مؤقف پیش کریں۔

رپورٹ کے مطابق بچیوں کے والد کمیٹی کے سامنے موقف کیلئے پیش نہیں ہوئے۔ والد نے فون پر کہا کہ اسکول انتظامیہ نے مجھ سے بدتمیزی کی، انھوں نے کہا کہ اسکول انتظامیہ مجھ سے اور میرے بچوں سے معافی مانگے۔

مذکورہ اسکول انتظامیہ نے ان بچیوں کی فیس معاف کردی ہے، اسکول انتظامیہ طالبعلم سے داخلہ فیس کی مد میں فیس وصول نہیں کرتی۔