پاکستان کے مایہ ناز نسیم شاہ نے اپنی تیز بولنگ سے دنیا کے بڑے بڑے بلے بازوں کو خوفزدہ کر رکھا ہے لیکن وہ خود ایک بلے باز کو بولنگ کرنے سے گھبراتے ہیں۔

نسیم شاہ پاکستان کے فاسٹ بولنگ اٹیک کا اہم رکن ہیں جو بدقسمتی سے ایشیا کپ کے دوران کاندھے کی انجری کا شکار ہوکر ورلڈ کپ سے باہر ہوگئے جس کا خمیازہ پاکستان کو میگا ایونٹ میں فائنل فور سے پہلے ہی باہر ہونے کی صورت میں کرنا پڑا۔

تاہم نوجوان پیسر مکمل فٹ ہونے کے بعد اس وقت پاکستان سپر لیگ میں جلوہ گر ہیں اور اپنی تیز بولنگ کی دہشت سے بیٹرز کو خوفزدہ کر رہے ہیں تاہم نسیم شاہ اعتراف کرتے ہیں کہ دنیا میں ایک بلے باز ایسا بھی ہے جس کو وہ بولنگ کرنے سے گھبراتے ہیں۔

نسیم شاہ جس بلے باز کو بولنگ کرتے ہوئے مشکل میں آتے ہیں وہ کوئی اور نہیں بلکہ عالمی نمبر ایک بیٹر اور سابق قومی کپتان بابر اعظم ہیں جن سے دنیا کے بڑے بڑے بولر بھی خوف کھاتے ہیں۔

ایک کرکٹ ویب سائٹ کو انٹرویو میں نوجوان قومی پیسر نے بابر اعظم کے خلاف بولنگ کو زبردست چیلنج قرار دیتے ہوئے رواں پی ایس ایل میں بابر اعظم کو بولنگ کے تجربے کے حوالے سے بتایا کہ انہوں نے ایک غیر معمولی یارکر کرائی لیکن بابر نے اسے مہارت سے تھرڈ مین کی جانب کھیل دیا

پی ایس ایل میں اسلام آباد یونائیٹڈ کی نمائندگی کرنے والے نسیم شاہ نے کہا کہ بابر اعظم ایسے بیٹر ہیں جو کمزور بولنگ پر بولر کو اچھے شاٹس کے ذریعے سزا دے سکتے ہیں۔

انہوں نے کہا کہ بابر اعظم کے معاملے میں اگر آپ خراب گیند کرتے ہیں تو وہ اسے باؤنڈری سے باہر پھینک دیتے ہیں لیکن اچھی گیند کے خلاف آپ کو یہ احساس نہیں ہوتا کہ وہ آؤٹ ہو جائے گا۔

نسیم شاہ نے کہا کہ بابر اعظم کی وہ کلاس ہے کہ وہ اچھی ڈیلیوری پر بھی ایسے شاٹس کھیل سکتے ہیں جو بولر کو پریشان کر دیتے ہیں، بولرز کو ان پر قابو پانے کے لیے انتہائی چالاکی سے کام لینا پڑتا ہے۔

نوجوان قومی بلے باز سعود شکیل پی ایس ایل میں کوئٹہ گلیڈیئٹر کی نائب کپتانی کر رہے ہیں کہتے ہیں قومی ٹیم کی قیادت کا موقع ملا تو چیلنج سمجھ کر قبول کروں گا۔

پاکستان کرکٹ ٹیم کے مڈل آرڈر نوجوان بلے باز سعود شکیل جن پر پہلے ٹیسٹ کھلاڑی کا ٹیگ لگا ہوا تھا تاہم اپنی کارکردگی سے انہوں نے خود کو نہ صرف ون ڈے بلکہ ٹی ٹوئنٹی فارمیٹ کا بھی اہل ثابت کیا اور رواں پی ایس ایل 9 میں وہ کوئٹہ گلیڈیئٹر کی نائب کپتانی کے فرائض انجام دے رہے ہیں۔

سعود شکیل جنہوں نے خود کو ٹی ٹوئنٹی فارمیٹ میں ڈھالنے کے لیے اپنا بیٹنگ اسٹائل تبدیل کیا اور کوئٹہ کے لیے بیٹنگ کا آغاز کرتے ہوئے رواں پی ایس ایل میں 150 سے زائد کے اسٹرائیک ریٹ سے 164 رنز بنا چکے ہیں۔

ٹیسٹ بلے باز سعود شکیل نے ٹی 20 کرکٹ کے تقاضوں کے مطابق ہونے والی ایڈجسٹمنٹ کے بارے میں کہا کہ میں زمین پر شاٹس مارنے سے لطف اندوز ہوتا تھا، لیکن میں نے اپنے کھیل کو ٹی 20 کرکٹ کے لیے ڈھال لیا ہے۔

ایک مقامی نجی ٹی وی سے گفتگو میں ان کا کہنا تھا کہ میں نے تیسرے نمبر پر فرسٹ کلاس کرکٹ کھیلی اور اب میں پانچویں نمبر پر پاکستان کی نمائندگی کر رہا ہوں لیکن پی ایس ایل میں بطور اوپنر ایک نیا کردار تفویض کیا گیا ہے۔ یہ ایک اچھی شروعات رہی ہے۔ میری انفرادی کارکردگی متاثر کن رہی ہے۔

سعود شکیل نے مستقبل میں پاکستان کرکٹ ٹیم  کی قیادت کا موقع ملنے کے سوال پر کہا کہ کپتانی سے سیکھنے کا موقع ملتا ہے میں نے انڈر 19 ٹیم کی قیادت کی تو کرکٹ میں اچھا ماحول برقرار رکھا۔ ڈریسنگ روم میں اچھی دوستی تھی۔ ایسا نہیں ہے کہ میں ہمیشہ کپتان بننا چاہتا تھا تاہم اگر مجھے پاکستان کی سینیئر ٹیم کی کپتانی کی آفر ہوئی تو قیادت کو ایک چیلنج سمجھ کر ضرور قبول کروں گا۔