الیکشن کمیشن نے کراچی میں آئندہ ماہ ہونے والے بلدیاتی انتخابات اور قومی اسمبلی کے حلقوں میں ضمنی الیکشن کی التوا کی خبروں پر وضاحت دے دی ہے۔

کراچی: الیکشن کمیشن نے ضمنی اور بلدیاتی انتخابات کے التوا کی افواہوں کی تردید کرتے ہوئے کہا ہے کہ کراچی سے قومی اسمبلی کے حلقوں این اے 237 اور 239 کے ضمنی انتخابات مقررہ تاریخ 16 اکتوبر کو ہی ہونگے۔

الیکشن کمیشن کے مطابق کراچی میں بلدیاتی انتخابات بھی 23 اکتوبر کو شیڈول کے مطابق ہوں گے اور اس کے لیے تمام تیاریاں مکمل ہیں۔

ترجمان الیکشن کمیشن کے مطابق حیدرآباد اور دیگر علاقوں میں حالات بہتر ہوتے ہی شیڈول جاری کر دیا جائے گا۔

واضح رہے کہ اس سے قبل کراچی میں بلدیاتی الیکشن غیر معمولی بارشوں کے باعث دو بار ملتوی کر دیے گئے تھے۔

حیدرآباد اور ٹھٹھہ ڈویژن میں بھی دوسرے مرحلے کے لیے بلدیاتی الیکشن ہونے ہیں تاہم وہاں سیلابی صورتحال کے باعث نئے شیڈول کا اعلان نہیں کیا گیا ہے۔

پاکستان تحریک انصاف کے قومی اسمبلی سے مستعفی ہونے والے اراکین قومی اسمبلی کو آخری بار تنخواہ اپریل 2022 میں ملی تھی۔

یہ انکشاف پاکستان تحریک انصاف کے مستعفی رکن قومی اسمبلی اور سابق وفاقی وزیر علی زیدی نے سماجی رابطوں کی ویب سائٹ ٹوئٹر پر اپنے ٹوئٹ میں کیا ہے۔

علی زیدی نے اپنے ٹوئٹ میں بلاول بھٹو کے ایک بیان پر ردعمل دیتے ہوئے کہا ہے کہ استعفیٰ دینے والے ایم این اے کو تنخواہ نہیں مل رہی تو وہ جمع کیا کرینگے؟

سابق وفاقی وزیر نے مزید کہا کہ ہمارے اکاؤنٹ میں آخری بار تنخواہ اپریل 2022 میں آئی تھی۔

علی زیدی نے اپنی ٹوئٹ میں وزیر خارجہ بلاول بھٹو کی ولسن سینٹر واشنگٹن ڈی سی میں گفتگو کی ویڈیو بھی پوسٹ کی ہے۔

اس ویڈیو میں بلاول بھٹو کہتے ہیں کہ میرا عمران خان کو مشورہ ہے کہ وہ جمہوریت کو عزت دیں، پارلیمنٹ آئیں اور اپنے ذمے داریاں ادا کریں۔

اس گفتگو میں بلاول بھٹو یہ دعویٰ بھی کرتے ہیں کہ پی ٹی آئی کے مستعفی ایم این ایز تاحال اپنی تنخواہیں وصول کر رہے ہیں لیکن پارلیمنٹ آنے سے انکار کر رہے ہیں۔

He’s lying little rat!
The MNA’s who resigned, are not getting any salaries… so what will they collect?
Last credit in our account was in April 2022! https://t.co/lY9cF0Itbr

— Ali Haider Zaidi (@AliHZaidiPTI) September 28, 2022

عوامی مسلم لیگ کے سربراہ شیخ رشید احمد نے دعویٰ کیا ہے کہ موجودہ حالات میں ڈار بھی خوار ہوگا اور الیکشن وقت سے پہلے ہی ہوں گے۔

شیخ رشید نے سماجی رابطوں کی ویب سائٹ ٹوئٹر پر نئے وزیر خزانہ اسحاق ڈار کے حوالے سے ٹوئٹ کرتے ہوئے کہا ہے کہ موجودہ حالات میں ڈار بھی خوار ہوگا اور الیکشن وقت سے پہلے ہی ہوں گے۔

ان کا کہنا تھا کہ 15 اکتوبر سے 15 تک نومبر تک تمام اہم فیصلے ہو جائیں گے۔

سابق وفاقی وزیر نے کہا کہ بجلی، آٹا اور گیس عوام کا مسئلہ ہے جب کہ آڈیو ویڈیو انکی سیاست کو لے ڈوبے گی، جو آڈیو ویڈیو کا کام کرتے تھے وہ اب خود اس میں پھنس گئے ہیں۔

ڈار بھی خوار ہوگا۔الیکشن وقت سے پہلے ہونگے۔بجلی آٹا گیس عوام کا مسئلہ ہےآڈیو ویڈیو اِن کی سیاست کو لے ڈوبے گی۔جو آڈیو ویڈیو کا یہ کام کرتے تھے اُس میں خود پھنس گئے ہیں15 اکتوبر سے 15 نومبر تک تمام اہم فیصلے ہو جائیں گے۔آج 2 بجے مظفر آباد پریس کلب میں پریس کانفرس سےخطاب کروں گا

— Sheikh Rashid Ahmed (@ShkhRasheed) September 28, 2022

پی ٹی آئی سینیٹر فیصل جاوید نے اسحاق ڈار کے وزیر خزانہ کا حلف اٹھانے کے بعد کہا ہے کہ یہ بجلی کے بل اور بڑھائیں گے، غربت میں اور اضافہ کریں گے، یااللہ رحم۔

پاکستان تحریک انصاف کے سینیٹر فیصل جاوید نے سماجی رابطوں کی ویب سائٹ ٹوئٹر پر اپنے ٹوئٹ میں طنزیہ انداز میں کہا ہے کہ دنیا کے چوٹی کے وزیر خزانہ کہتے ہیں پچھلے وزیر خزانہ نے پوری کوشش کی۔

فیصل جاوید نے مزید لکھا کہ یہ کہتے ہیں ہم ’’اور‘‘ آگے کریں گے، یعنی ’’اور‘‘ مہنگائی کریں گے، یہ اشیائے خور ونوش کی قیمتوں میں ’’اور‘‘ اضافہ کریں گے۔ یعنی یہ بجلی کے بل "اور” بڑھائیں گے، غربت میں "اور” اضافہ کریں گے۔

پریس کانفرنس میں دنیا کے چوٹی کے وزیر خزانہ کہتے ہیں کہ پچھلے وزیر خزانہ نے پوری کوشش کی ہم "اور" آگے کریں گے – یعنی "اور" مہنگائی کریں گے – اشیاء خوردونوش کی قیمتوں میں "اور" اضافہ کریں گے- بجلی کے بل "اور" بڑھائیں گے- غربت میں "اور" اضافہ کریں گے –
یا اللہ رحم

— Faisal Javed Khan (@FaisalJavedKhan) September 28, 2022

واضح رہے کہ اسحاق ڈار نے وزیر خزانہ کا حلف اٹھانے کے بعد میڈیا سے گفتگو کرتے ہوئے اپنی ترجیحات بتائیں۔

یہ بھی پڑھیں: نئے وزیر خزانہ اسحاق ڈار نے اپنی ترجیحات بتا دیں

ایک سوال پران کا کہنا تھا کہ پیٹرول کی قیمتوں پر ابھی کچھ نہیں کہہ سکتا مجھےدو چار دن دیں ، پہلی ترجیح کرنسی بہتر بنانا اور دوسری مہنگائی پر قابو پانا ہے، محمد زبیر عمر اور مفتاح اسماعیل نے بہترین کام کیا۔