کراچی : اینٹی کرپشن ٹیم نے تحریک انصاف کے رہنما حلیم عادل شیخ کو گرفتارکرلیا، حلیم عادل شیخ آج اینٹی کرپشن کورٹ میں پیشی کے لیے گئے تھے۔

تفصیلات کے مطابق تحریک انصاف کے رہنما حلیم عادل شیخ کو جامشوروکی اینٹی کرپشن ٹیم نے گرفتار کرلیا۔

حلیم عادل شیخ آج اینٹی کرپشن کورٹ میں پیشی کے لیے گئے تھے ، پی ٹی آئی رہنما کے ساتھی نے بیان میں کہا کہ ہم ذیشان میمن کو بیان دینے آئے تھے۔

ساتھی کا کہنا تھا کہ تفتیش جوائن کرنے گئے ، کسی اور کیس میں گرفتاری ڈال دی، لاہور میں جس کیس میں گرفتار کیا تھا آج اس سلسلے میں گئے تھے۔

رہنما کے ساتھی نے بتایا کہ حلیم عادل شیخ کو اس وقت تھانے میں بٹھا رکھا ہے۔

جامشورو اورحیدرآبادپولیس کی نفری اینٹی کرپشن آفس پہنچ گئی ہے ، حلیم عادل شیخ کو نامعلوم جگہ پر منتقل کیا جارہا ہے۔

حلیم عادل زمینوں کی خوردبردکیس میں بیان دینےاینٹی کرپشن کورٹ آئے تھے تاہم مذکورہ کیس میں حلیم عادل شیخ عبوری کوضمانت پر رہائی حاصل ہے۔

یاد رہے رواں ماہ تحریک انصاف کے رہنما اور سندھ میں اپوزیشن لیڈر حلیم عادل شیخ کو لاہور کے ایک نجی ہوٹل سے رات گئے گرفتارکیا گیا تھا۔

اس حوالے سے صوبائی وزیر داخلہ پنجاب عطا اللہ تارڑ کے مطابق حلیم عادل شیخ اینٹی کرپشن سندھ کو مطلوب تھے۔

بعد ازاں لاہور ہائیکورٹ نے اپوزیشن لیڈر سندھ اسمبلی حلیم عادل شیخ کی گرفتاری کو غیر قانونی قرار دیتے ہوئے انہیں فوری رہا کرنے کا حکم دیا تھا۔

لاہور : مسلم لیگ ن کے ایم پی اے اویس لغاری کے بھائی جمال لغاری کو میپکو بورڈ کا چیئرمین لگانے کا فیصلہ کرلیا اور سمری منظوری کے لئے بھجوا دی گئی۔

تفصیلات کے مطابق لیگی ایم پی اے اویس لغاری کے بھائی کو سیاسی بنیاد پر اہم عہدہ دینے کی تیاری کرلی گئی۔

ذرائع کا کہنا ہے کہ اویس لغاری کے بھائی جمال لغاری کو میپکو بورڈ کا چیئرمین لگانے کا فیصلہ کرلیا، اس سلسلے میں میپکو کا موجودہ بورڈتحلیل اور نیا بورڈ تشکیل دینے کا بھی فیصلہ کیا گیا ہے۔

ذرائع کابینہ ڈویژن نے بتایا ہے کہ وفاقی کابینہ کو سمری منظوری کےلئے بھجوادی گئی، منظوری کے بعد میپکو کے نئے بورڈ کا نوٹی فکیشن جاری کیا جائے گا۔

اسلام آباد : چیئرمین تحریک انصاف عمران خان نے پرویزالٰہی کو وزارتِ اعلیٰ کا منصب سنبھالنے پر مبارکباد دی ، جس پر چودھری پرویزالٰہی نے عمران خان کے اعتماد کے اظہار کا شکریہ ادا کیا۔

تفصیلات کے مطابق وزیراعلیٰ پنجاب پرویزالٰہی عمران خان سے ملاقات کیلئے بنی گالہ پہنچے ، مونس الٰہی نومنتخب وزیر اعلی ٰپنجاب کی گاڑی چلا رہے تھے، اس موقع پر پرویزالٰہی نے وکٹری کا نشان بنایا۔

چیئرمین تحریک انصاف عمران خان سے وزیراعلیٰ پنجاب چودھری پرویزالٰہی اور سابق وفاقی وزیر مونس الٰہی نے بنی گالہ اسلام آباد میں ملاقات کی، ملاقات میں ڈاکٹر شہباز گل بھی موجود تھے۔

عمران خان نے پرویزالٰہی کو وزارتِ اعلیٰ کا منصب سنبھالنے پر مبارکباد دی ، جس پر چودھری پرویزالٰہی نے عمران خان کے اعتماد کے اظہار کا شکریہ ادا کیا۔

ملاقات میں ملکی موجودہ سیاسی صورتحال پر تفصیلی گفتگو کی گئی اور پنجاب میں پی ٹی آئی رہنماوں کے خلاف بلاجواز مقدمات درج کرنے والے افسروں اور بیورو کریسی میں تقرر تبادلوں کے حوالے تبادلہ خیال کیا گیا۔

دوران ملاقات صوبائی کابینہ کی تشکیل اورممکنہ وزراکے ناموں کے ساتھ ساتھ اسپیکر اور ڈپٹی اسپیکر کے لیے ناموں پر بھی غورکیا گیا۔

کراچی : عامر لیاقت کے ورثاء نے دانیہ ملک کیخلاف کارروائی کیلئے ایف آئی اے سے رجوع کرلیا ہے، دانیہ نے عامر لیاقت کی نازیبا ویڈیوز سوشل میڈیا پر وائرل کیں۔

تفصیلات کے مطابق سیشن جج جنوبی میں عامر لیاقت کی سابق اہلیہ دانیہ ملک کے خلاف سائبر کرائم ایکٹ کے تحت کاروائی سے متعلق درخواست کی سماعت ہوئی۔

ایف آئی اے کی جانب سے رپورٹ عدالت میں پیش کی گئی، عامر جمیل ورک ایڈووکیٹ نے عدالت کو بتایا کہ ایف آئی سائبر کرائم ایکٹ کی سیکشن 20 ون ڈی کے زمرے میں آتا ہے۔

عامر جمیل کا کہنا تھا کہ کسی کی برہنہ ویڈیو وائرل کرنے کی سزا پانچ سال قید اور جرمانہ ہے اور کسی کی بھی شہری کو حق ہے جس نے ویڈیو دیکھی ہو ایف آئی آر کے لیے رجوع کر سکتا ہے۔

ایف آئی اے نے عدالت میں کہا کہ عامر لیاقت کے ورثاء نے ایف آئی اے سے رجوع کرلیا ہے ، درخواست اور دستیاب مواد کی روشنی میں اعلیٰ حکام سے مشاورت کے لیے مہلت دی جائے۔

عامر جمیل وکیل درخواست گزار کا کہنا تھا کہ عدالت ایف آئی اے کو دانیہ ملک کے خلاف کارروائی کا حکم دے، دانیہ نے عامر لیاقت کی نازیبا ویڈیوز سوشل میڈیا پر وائرل کیں۔

عدالت نے درخواست کی مزید سماعت 30 جولائی تک ملتوی کردی گئی ، سماجی تنظیم نے دانیہ ملک کے خلاف سیشن عدالت میں درخواست دائر کر رکھی ہے۔