اسلام آباد: وزیر مملکت برائے خزانہ عائشہ غوث پاشا کا کہنا ہے کہ پاکستان تحریک انصاف نے اپنے 4 سالہ دور حکومت میں ملکی اور غیر ملکی اداروں سے 24 ہزار 242 ارب قرض لیا۔
تفصیلات کے مطابق وزیر مملکت برائے خزانہ عائشہ غوث پاشا نے قومی اسمبلی میں پاکستان تحریک انصاف کے دور حکومت میں لیے گئے ملکی اور غیر ملکی قرضوں کی تفصیل پیش کردی۔
وزیر مملکت کا کہنا تھا کہ تحریک انصاف دور کے قرضے ترقیاتی منصوبوں پر نہیں لگے، ملک بھر میں تحریک انصاف دور کا کوئی بڑا منصوبہ نظر نہیں آرہا۔
انہوں نے کہا کہ تحریک انصاف دور کے قرضوں کی واپسی پر بھاری سود ادا کرنا پڑ رہا ہے۔
وزیر مملکت نے قرضوں کی تفصیل بتاتے ہوئے کہا کہ تحریک انصاف حکومت نے 4 سال میں ملکی اور غیر ملکی اداروں سے 24 ہزار 242 ارب قرض لیا۔
انہوں نے بتایا کہ گزشتہ حکومت نے ملکی اداروں سے ساڑھے 14 ہزار 621 ارب اور غیر ملکی اداروں سے ساڑھے 9 ہزار ارب سے زائد قرض لیا۔
قومی اسمبلی کو مزید بتایا گیا کہ گزشتہ حکومت میں مجموعی مالیاتی خسارہ 16 ہزار 430 ارب رہا، جبکہ ساڑھے 12 ہزار کل محصولات کی جگہ 31 ہزار ارب کے اخراجات کیے گئے۔
اسلام آباد : وفاقی حکومت نے آڈیولیکس کی تحقیقات کرنے والے جسٹس قاضی فائز عیسیٰ کی سربراہی میں تین رکنی کمیشن کو مبینہ آڈیوز کا ریکارڈ فراہم کردیا۔
تفصیلات کے مطابق وفاقی حکومت نے آڈیو لیکس کی تحقیقات کرنے والے انکوائری کمیشن کو تحقیق طلب مبینہ آڈیوز کا ریکارڈ فراہم کردیا ، آڈیوز کیساتھ ٹرانسکرپٹ بھی مجاز افسر کے دستخط سے جمع کرا دیا گیا ہے۔
ذرائع نے کہا کہ مجموعی طور پر 8آڈیوز کمیشن کو جمع کرائی گئیں، آڈیوز میں موجود افراد کے نام، عہدے ،دستیاب رابطہ نمبرزبھی درج ہے۔
یاد رہے کہ آڈیو لیکس کی تحقیقات کرنے والے جوڈیشل کمیشن نے پہلے اجلاس میں تمام مبینہ آڈیوز کھلی عدالت میں چلانے کا فیصلہ کرتے ہوئےتمام مبینہ آڈیوز کا ٹرانسکرپٹ طلب کیا تھا۔
کمیشن نے مبینہ آڈیوز میں دو طرفہ گفتگو کرنیوالے افراد کو بطور گواہ طلب کرنے اور میاں ثاقب نثار سمیت مبینہ آڈیوز کا حصہ افراد کو بطور گواہ طلب کرنے کا عندیہ دیا تھا۔
اجلاس کے حکمنامے میں کہا گیا تھا کہ کمیشن اجلاس میں پنجاب فرانزک ایجنسی کا نمائندہ عدالت میں موجود رہے، کوئی فرد انکار کرے کہ میری آواز نہیں تو پنجاب فرانزک ایجنسی نمائندہ معاونت کرے۔
واضح رہے وفاقی حکومت نے 20 مئی کو عدلیہ سے متعلق متعدد آڈیو لیکس کی تحقیقات کے لیے سپریم کورٹ کے سینئر جج جسٹس قاضی فائز عیسیٰ کی سربراہی میں تین رکنی جوڈیشل کمیشن تشکیل دیا تھا۔
اسلام آباد : ملک کے مختلف ایئرپورٹس پر طیاروں سے پرندے ٹکرانے کے واقعات کے اعداد شمار جاری کردیے گئے، جس کے تحت 5ماہ کے دوران طیاروں سے پرندے ٹکرانے کے29واقعات ہوئے۔
تفصیلات کے مطابق قومی ائیرلائن کی پروازوں سے 5ماہ کے دوران پرندے ٹکرانے سے متعلق ذرائع نے بتایا ہے کہ رواں سال جنوری سے لے کر اب تک پرندے ٹکرانے کے 29 واقعات پیش آچکے ہیں۔
ذرائع کے مطابق صرف رواں ماہ میں ہی اب تک پرندہ ٹکرانے کے 10 واقعات رپورٹ ہوچکے ہیں، پرندے ٹکرانے کے زیادہ تر واقعات کراچی، لاہور، اسلام آباد ایئرپورٹ پر ہوئے۔
پرندے ٹکرانے کے واقعات فیصل آباد، سکھر، کوئٹہ، پشاور،گلگت،ملتان ایئرپورٹس پر ہوئے ہیں جبکہ سب سے زیادہ واقعات کراچی اور لاہورائیرپورٹ میں رپورٹ ہوئے۔
ذرائع کا مزید کہنا ہے کہ 7پروازوں کو جزوی اور مکمل نقصان پہنچا جبکہ 22طیارے نقصان سے بچ گئے، پرندے ٹکرانے سے پی آئی اے کو بھاری نقصان برداشت کرنا پڑتا ہے، پرندہ ٹکرانے کے سبب پروازیں عارضی طور پر گراونڈ ہوجاتے ہیں۔
اسلام آباد: قومی اسمبلی کی قائمہ کمیٹی داخلہ نے میت کو کالے جادو کیلئے استعمال کے بل میں ترمیم کا فیصلہ کرلیا، میتوں کی بے حرمتی پر سزا پر 10سال قید اور 10لاکھ جرمانہ ہوگا۔
تفصیلات کے مطابق قومی اسمبلی کی قائمہ کمیٹی داخلہ کا احمد حسین ڈیہر کی زیر صدارت اجلاس ہوا ، جس میں میت کو کالے جادو کیلئے استعمال کے بل میں ترمیم کا فیصلہ کرلیا گیا۔
کمیٹی نے فیصلہ کیا کہ میتوں کی بے حرمتی پر سزا پر 10سال قید اور 10لاکھ جرمانہ ہوگا، جس کے بعد بل ممبر کمیٹی چوہدری محمد فقیر کی طرف سے پیش کیا گیا۔
قومی اسمبلی کی قائمہ کمیٹی نےممبران کی متفقہ رائے سےبل منظور کر لیا، قادر مندو خیل نے کہا کہ شناختی کارڈ کو ہی ڈمیسائل میں شامل کیا جائے۔
وزارت قانون اورداخلہ سے کمیٹی نے مزید سفارشات بھی طلب کر لیں اور ڈومیسائل کے حوالے سے ایک نادرا کے ساتھ ایپلی کیشن بنانے کی تجویز دی۔
ایپلی کیشن کےذریعے جعلی ڈومیسائل اور دہرے ڈومیسائل کا خاتمہ کیا جا سکے گا۔
سینیٹ قائمہ کمیٹی برائے ایوی ایشن کی ذیلی کمیٹی کے اجلاس میں مشکوک لائسنس پر معطل پائلٹس کے معاملے پر سینیٹ کمیٹی اور ڈی جی سول ایوی ایشن آمنے سامنے آگئے۔
اے آر وائی نیوز کے مطابق سینیٹ قائمہ کمیٹی ایوی ایشن کی ذیلی کمیٹی کا اجلاس ہوا جس میں ڈائریکٹر جنرل سول ایوی ایشن، ایڈیشنل سیکریٹری ایوی ایشن ڈویژن، ایف آئی اے حکام نے شرکت کی۔
اجلاس میں کمیٹی نے اے ٹی پی ایل لائسنس مشکوک ہونے پر تمام لائنسس منسوخ کرنے پر تشویش کا اظہار کرتے ہوئے پائلٹس کے کلیئر لائسنس بحال کرنے اور مشکوک لائسنس پر معطل پائلٹس کا ازسر نو امتحان لینے کی سفارشات کیں جب کہ ڈی جی سول ایوی ایشن نے دوٹوک انداز میں پائلٹس کے معطل لائسنس بحال کرنے سے انکار کر دیا۔
چیئرمین سینیٹ کمیتی نے استفسار کیا کہ اے ٹی پی ایل لائسنس جعلی نکلنے پر سی پی ایل لائسنس کیوں منسوخ کر دیا؟ اراکین کمیٹی نے بھی سوال اٹھایا کہ بی اے کی ڈگری جعلی ہونے پر ایف اے کی درست ڈگری کیسے منسوخ ہوسکتی ہے۔
ڈی جی سول ایوی ایشن نے اجلاس کے شرکا کو بتایا کہ جعلی لائسنس پر کارروائی رولز کے مطابق کی گئی، 33 پائلٹس کے لائسنس معطل جب کہ 50 کے منسوخ کیے گئے۔
چیئرمین کمیٹی نے اس موقع پر کہا کہ کمیٹی نہیں چاہتی تمام پائلٹس کو مجرم بنا دیں۔ انہوں اس حوالے سے یہ توجیح پیش کی کہ یہ ایسا کوئی جرم نہیں جو صرف پاکستان میں ہوتا ہو نہ ہی پاکستان پہلا ملک ہے جہاں چیٹنگ کی جاتی ہو، دنیا میں کئی ممالک میں ایسی چیٹنگ ہوتی ہے۔ معطلی بہت بڑی سزا ہے کیا 302 لگا کر مجرم بنانا چاہتے ہیں؟
ڈی جی سی اے اے نے جواب دیا کہ کبھی ایسا نہیں ہوا کہ ایف آئی آر دی گئی ہوں۔ جو پائلٹ آتا ہے ان کی سیکیورٹی کلیئرنس ہوتی ہے، جعلی لائسنس پر نکالے گئے پائلٹس کی سیکیورٹی کلیئرنس نہیں، 33 پائلٹس کے لائسنس مشکوک پائے گئے، مذکورہ پائلٹس کے لائسنس معطل کیے گئے، ان میں سے 27 پر مقدمات کا اندراج کیا گیا جب کہ 6 پائلٹس کے خلاف کوئی مقدمات درج نہیں ہیں۔
انہوں نے اجلاس کے شرکا کو آگاہ کیا کہ 27 پائلٹس پر جرم ثابت ہوا اور ان کی منی ٹریل پکڑی گئی۔
ایف آئی اے حکام نے کہا کہ پائلٹس کیخلاف حتمی چلان جمع کرانا ہے، ہم اس کیس میں خود سے کچھ نہیں کرسکتے ہیں سوائے اس کے کہ سول ایوی ایشن اپنی شکایت واپس لے لے۔
ڈی جی نے دوبارہ امتحان کی سفارش پر کہا کہ عدالتی معاملہ حل ہوجائے تو پائلٹس دوبارہ امتحان دے سکتے ہیں۔
وفاقی کابینہ کے حکم پر50 پائلٹس لائسنس کینسل کیے گئے، 43 پائلٹس کے لائسنس منسوخ ہو چکے ہیں جب کہ 7 پائلٹس نے عدالتوں سے حکم امتناعی لے رکھا ہے۔ ایف آئی اے نے 16 پائلٹس کو دوران تحقیقات کلیئر کر دیا، ان پر کوئی مقدمہ نہیں وہ دوبارہ فلائی کرسکتے ہیں۔
ڈی جی سول ایوسی ایشن نے پائلٹس کے معطل لائسنس بحال کرنے سے انکار کرتے ہوئے کہا کہ جن پائلٹس کے لائسنس معطل ہوئے انہیں اپنی سزا پوری کرنا ہوگی، عدالتوں میں جانے والے پائلٹس اپنی سزا پوری کریں اور واپس آجائیں۔
اسلام آباد : تحریک انصاف کے سابق رہنما فیصل واوڈا کا کہنا ہے کہ کرپشن کے اس کھیل میں سب سے زیادہ فائدہ لینے والے کا نام فیض حمید ہے۔
تفصیلات کے مطابق تحریک انصاف کے سابق رہنما فیصل واوڈا نے نیب آفس کے باہر میڈیا سے گفتگو کرتے ہوئے کہا کہ مجھے 190 ملین پاؤنڈ کی ٹرانزیکشن کیس میں نیب نے طلب کیاتھا، جب یہ معاملہ چل رہاتھا اس وقت میں وفاقی وزیرتھا، نیب کی جانب سے کافی تفصیل سے سوال جواب ہوئے ہیں۔
فیصل واوڈا کا کہنا تھا کہ میں اپنی بات پرقائم ہوں امید ہے قانون اپنا راستہ لے گا، شہزاد اکبر، خان صاحب، زلفی بخاری سمیت دیگر نام لئے جارہے ہیں لیکن کرپشن کھیل میں سب سے زیادہ فائدہ لینے والے کا نام فیض حمید ہے۔
سابق رہنما نے کہا کہ تنخواہ دار بندے کے پاس 10 کروڑ کی چیز آجائے تو باقی پیچھے کیا بچ جاتاہے، یہ تو چھوٹا سا کیس ہے ابھی تو بڑے بڑے جرائم سامنے آئیں گے، میرے اندر بڑے بڑے راز موجود ہیں ابھی تو وہ بتا بھی نہیں رہا۔
ان کا کہنا تھا کہ فیض حمید کی باقیات آج بھی سینیٹ میں موجود ہے، سینیٹ کےسینیٹرز جو کرتے رہے وہ بھی بتادوں گا، پاکستان اس نہج پرپہنچ گیا کہ اس کی بقا کو پہلے رکھ کرملک کی بات کریں۔
فیصل واوڈا نے بتایا کہ اس کرپشن کاماسٹرمائنڈفیض حمیدہے، میں ابھی فیض حمید کےصرف پاکستانی اثاثوں کی بات کررہاہوں، کچھ اور لوگ گھناؤنے جرائم میں ملوث ہیں ، ان کی کرپشن داستان کی پہلی سیڑھی قوم کے سامنے رکھ دی ہے۔
سابق وفاقی وزیر کا کہنا تھا کہ عمران خان نے مجھے جو سکھایا تھا میں نے آج وہ پوراکردیا، خان صاحب آپ مجھےفلسفہ سناکربھول گئےمیں وہیں کھڑاہوں، آپ نئے والے خان صاحب ہیں میں پرانےوالےخان صاحب کےفلسفے پر چل رہاہوں۔
انھوں نے بتایا کہ جب میں پارٹی سےنکالاگیا توخان صاحب آسمانوں پرتھے، میں نےجوجوکہاتھاوہ سب کچھ8ماہ میں ہوگیا، میں نے کہا تھا کہ یہ نیب کا کیس بنے گا، فواد چوہدری اور شیریں مزاری نے بھی میرا ساتھ دیاتھا۔
فیصل واوڈا نے کہا کہ میں کسی کے باپ کا کھاتا ہوں ناپہلے کھایا نا اب کھاتا ہوں، مجھےکسی نےنہیں کہااورنہ کوئی کہہ سکتاہے،سب جانتے ہیں ، ہمیں بریف نہیں کیا گیا سیلڈ لفافہ دکھا کر معاملہ ختم کرنے کی کوشش کی گئی۔
ان کا مزید کہنا تھا کہ نیشنل کرائم ایجنسی کاپیسہ حکومت پاکستان کےاکاؤنٹ میں آناتھا، یہ 460 بلین سے اوپر کا پیسہ تھا، پہلے بھی کابینہ میٹنگ میں کہاتھا شہزاد اکبر سلطانی گواہ بن کر بھاگ جائے گا، ہمیں زبانی بتایا گیا تو کہا کیا ایسا ہوتا ہے بند لفافہ دکھا کر فیصلہ لیا جائے، اس سے بہتر خودہی فیصلہ کرلیتے۔
سابق رہنما نے کہا کہ عقل مند آدمی وہ ہوتا ہے جو ٹائم سے پہلے باتیں بتادے، اگرآپ اتنے مخلص تھے تو پہلے بتاتے، میں نے تو پابندی کا پہلے بھی بتایا تھا، خان صاحب کو بتایا تھا کچھ سانپ آگے آنا چاہتے ہیں، میں پرانے پاکستان اور پرانے خان صاحب کے فلسفے کیساتھ چل رہاہوں۔
عمران خان کے حوالے سے فیصل واوڈا کا کہنا تھا کہ عمران خان کو اللہ کی مہربانی سے کوئی آنچ نہیں آسکتی ، اللہ کی طرف سے جب باری آگئی تو آگئی، صدر صاحب نے جو کام کیا وہ کوئی دشمن بھی نہیں کرسکتا، اس میں بہت بڑارول ایوان صدر اور عارف علوی کا ہے۔
تحریک انصاف پر پابندی کے سوال پر جواب دیتے ہوئے انھوں نے کہا کہ پابندی تونہیں لگنی چاہئے مگر جو کام کرا دیے گئے وہ پابندی کیلئے کافی ہیں، پابندی سے زیادہ کام کردیےگئے ہیں۔
سابق وزیر نے مزید کہا کہ عمران خان دلیرآدمی تھے لیکن عمران خان آج وہ آدمی نہیں جو پہلے تھے۔
اسلام آباد : پی ٹی آئی رہنماؤں کو بیرون ملک روانگی سے روکنے کیلئے اسلام آباد کی ضلعی انتظامیہ نے ان کا نام ای سی ایل میں ڈالنے کی سفارش کردی۔
اس حوالے سے ذرائع کا کہنا ہے کہ تھانہ کھنہ کے مقدمے میں گرفتار نہ ہونے والے تحریک انصاف کے رہنماؤں کا نام ای سی ایل میں ڈالنے کی سفارش کی گئی ہے۔
اسلام آباد پولیس کی جانب سے وزارت داخلہ کو باقاعدہ درخواست دے دی گئی ہے، راجہ خرم نواز، اخلاق اعوان ،علی اعوان کا نام ای سی ایل میں شامل کرنے کی درخواست کی گئی ہے۔
اس کے علاوہ وزارت داخلہ سے ملک حسنین اور ملک عامر علی کا نام بھی ای سی ایل میں ڈالنے کی سفارش کی گئی ہے۔
پولیس نے درخواست میں مؤقف اختیار کیا ہے کہ خدشہ ہے کہ مذکورہ ملزمان گرفتاری سے بچنے کیلئے ملک سے فرار ہوسکتے ہیں، بیرون ملک فرار سے روکنے کیلئے ملزمان کے نام ای سی ایل میں ڈالے جائیں۔
کرکٹ کے میدان میں کول نظر آنے والے ایم ایس دھونی بہت جذباتی بھی ہیں ہربھجن سنگھ نے ماضی کا ایک قصہ سنایا ہے جس میں دھونی رو پڑے تھے۔
سابق بھارتی کپتان ایم ایس دھونی بھارتی کرکٹ کی تاریخ میں کامیاب ترین کپتان مانے جاتے ہیں جنہوں نے اپنی قیادت میں انڈیا کو ون ڈے اور ٹی ٹوئنٹی کا عالمی چیمپئن بنایا۔ وہ کئی سالوں سے انڈین پریمیئر لیگ کی فرنچائز چنائی سپر کنگ کی قیادت بھی بخوبی نبھا رہے ہیں اور ان کی ٹیم چار بار ٹائٹل جیت چکی ہے۔
ایم ایس دھونی کو دنیائے کرکٹ میں کیپٹن کول کے نام سے جانا جاتا ہے کیونکہ حالات خواہ کیسے کیوں نہ ہوں میدان میں ان کا رویہ انتہائی کول ہوتا ہے اور وہ میچ کے دوران پل پل بدلتی صورتحال میں بھی اپنے جذبات کا اظہار کم ہی کرتے نظر آتے ہیں اور فیلڈ پر بالکل خاموش، مطمئن اور پُرسکون دکھائی دیتے ہیں۔
تاہم جذبات ہر انسان کے اندر موجود ہوتے ہیں تو ایک ایسا موقع بھی تھا جب اس کول کپتان کی آنکھوں سے آنسو چھلک پڑے تھے اور وہ ساتھی کھلاڑیوں کے سامنے رو دیے تھے۔
برسوں پرانے اس جذباتی واقعے سے ان کے ساتھی کھلاڑی سابق اسپنر ہربھجن سنگھ جو بھارت کی قومی ٹیم کے علاوہ چنائی سپر کنگ میں بھی دھونی کے ساتھ رہے ہیں نے کئی سالوں بعد پردہ اٹھایا اس انکشاف نے سننے والوں کو ورطہ حیرت میں ڈال دیا۔
یاد رہے کہ چنئی سپر کنگز اور راجستھان رائلز پر میچ فکسنگ اور بیٹںگ کے الزام میں آئی پی ایل میں کھیلنے پر 2016 اور 2017 تک پابندی عائد کی گئی تھی۔ اس پابندی کے عرصے کے دوران دھونی نے رائزنگ پونے سپر جائنٹ کی کپتانی کی تھی۔
سوشل میڈیا پر ہربھجن سنگھ اور سابق جنوبی افریقی لیگ اسپنر عمران طاہر کی کمنٹری باکس سے ویڈیو میں کی گئی گفتگو وائرل ہوئی ہے جس میں وہ اپنے ایم ایس دھونی کے بارے میں کچھ حیرت انگیز انکشاف کرتے دکھائی دے رہے ہیں۔
ہربھجن سنگھ ویڈیو میں اپنے ساتھی کمنٹیٹر کو کہتے ہیں کہ میں ایک اسٹوری آپ سے شیئر کرنا چاہتا ہوں جس کے بعد وہ بتاتے ہیں کہ 2018 میں جب چنئی سپر کنگز کی ٹیم دو سال کی پابندی لگنے کے بعد دوبارہ ٹورنامنٹ میں آئی تھی اور ہم سب اکٹھے ہوئے تھے تو تو ایم ایس دھونی ٹیم ڈِنر کے دوران انتہائی جذباتی ہوگئے تھے اور رو پڑے تھے۔
اس واقعے کی عمران طاہر نے بھی تائید کی اور کہا کہ جی بالکل میں اُدھر ہی تھا، وہ اُن کے لیے کافی جذباتی لمحہ تھا اور وہاں سے مجھے اندازہ ہوا کہ یہ ٹیم ان کے دل کے کتنے قریب ہے۔ یہ ہم سب کے لیے کافی جذباتی بات تھی۔ لیکن یہ ہے کہ ان کے آنسو اور اُن کی لگن ہمارے لیے بڑی اچھی رہی کہ ہم اُس سال جیت گئے کیونکہ ہم دو سال بعد واپس آئے تھے، اس کے بعد آنا اور جیتنا ایک ناقابل فراموش لمحہ تھا۔
ہربھجن سنگھ نے مزید بتایا کہ جب وہ ٹرافی جیتے اور ٹرافی تھامی تو تقریب مکمل ہونے کے بعد سب ڈھونڈ رہے تھے کہ دھونی ہے کہاں؟ لیکن دھونی واپس ہوٹل چلے گئے۔ کہتے ہیں کہ پاجی میں وہاں مزید نہیں رہنا چاہتا تھا۔ میں نے کہا بھئی کپتان ہو، جیتے ہیں، کہتے ہیں میرا کام ہو گیا ہے۔‘
واضح رہے کہ چنئی سپر کنگز کو آئی پی ایل کی تاریخ کی دوسری کامیاب ترین ٹیم کہا جاتا ہے۔ دھونی کی اس ٹیم نے 2010، 2011، 2018 اور 2021 میں کُل چار مرتبہ آئی پی ایل ٹرافی اپنے نام کی ہے۔
کراچی : محکمہ تعلیم سندھ نے کراچی، حیدرآباد اور میرپورخاص میں انٹرمیڈیٹ کے امتحانات 30 مئی سے لینے کا اعلان کردیا، امتحانات 2 شفٹوں میں لئے جائیں گے۔
تفصیلات کے مطابق صوبہ سندھ کی 3 ڈویژن میں گیارہویں اور بارہویں کےامتحانات 30مئی سے لینے کا فیصلہ کرلیا ، صوبائی وزیراسماعیل راہو نے بتایا کہ امتحانات 2 شفٹوں میں لئے جائیں گے۔
اسماعیل راہو نے بتایا کہ کراچی میں گیارہوں اور بارہویں کے16امتحانی مراکزحساس ہیں،امتحانات کےدوران موبائل فون کے استعمال پر پابندی ہے۔
ان کا کہنا تھا کہ انٹرمیڈیٹ کے امتحانات میں تقریباً 489,000 طلباء شرکت کریں گے جبکہ کل 700 امتحانی مراکز قائم کیے گئے ہیں۔
اسماعیل راہو نے کے الیکٹرک اور وفاق سے صوبے میں امتحاناتی مراکز کے وقت لوڈشیڈنگ نہ کرنے کا بھی مطالبہ کردیا۔
میٹرک امتحانات پر تبصرہ کرتے ہوئے ان کا کہنا تھا کہ صوبہ بھر میں اب تک تقریباً 3 ہزار 565 طلباء نقل کرتے ہوئے پکڑے گئے ہیں۔
انھوں نے مزید بتایا کہ 800 سے زائد طلباء کو کسی اور کی جگہ امتحان دیتے ہوئے پکڑا گیا جبکہ 2,600 موبائل فون ضبط کر لیے گئے۔
واضح رہے کہ انٹرمیڈیٹ پارٹ ٹو کے امتحانات سکھر، لاڑکانہ اور شہید بینظیر آباد ڈویژن میں شروع ہو چکے ہیں۔
