عالمی آئل مارکیٹ میں تیل کی قیمتوں میں واضح کمی ریکارڈ کی گئی ہے۔
غیر ملکی خبر ایجنسی کے مطابق برینٹ خام تیل کی قیمت 4فیصد کمی کے بعد 77.94 ڈالر فی بیرل پر آگئی ہے۔
خبرایجنسی کے مطابق امریکی ویسٹ ٹیکساس خام تیل 74 ڈالر 42 سینٹ پر پہنچ گیا، روسی خام تیل کی برآمدات میں 4 سال میں سب سے زیادہ اضافہ ہوا۔
ذرائع کا کہنا ہے کہ پاکستان نے بھی روس سے خام تیل منگوانے کا آرڈر دے دیا ہے، پاکستان میں رواں سال مئی کے آخر تک روسی خام تیل پہنچ جائے گا۔
اسلام آباد : وزیراعظم شہباز شریف کے اعتماد کے ووٹ کا فیصلہ آج عدالتی فیصلے کے بعد ہوگا، سپریم کورٹ کے 3 رکنی بینچ نے وزیراعظم کے پاس اکثریت نہ ہونے کی آبزرویشن دی تھی۔
تفصیلات کے مطابق وزیراعظم شہباز شریف کے اعتماد کے ووٹ کے معاملے پر قومی اسمبلی سیکرٹریٹ کو آج ضمنی ایجنڈا تیار رکھنے کا حکم دے دیا گیا۔
ذرائع نے کہا ہے کہ آج عدالتی فیصلہ آنے کے بعد اعتماد کے ووٹ کافیصلہ ہوگا، اس سلسلے میں تمام حکومتی اراکین کو آج ایوان میں حاضری یقینی بنانے کا حکم دیا ہے۔
گزشتہ سماعت پر 3رکنی بینچ نےوزیراعظم کے پاس اکثریت نہ ہونے کی آبزرویشن دی تھی ، وزیراعظم کو اعتماد کے ووٹ کیلئے بھی سادہ اکثریت 172 اراکین کی ضرورت ہے، اعتماد کا ووٹ اوپن ووٹنگ کے ذریعے ہوگا۔
خیال رہے ملک میں ایک ساتھ الیکشن پر اتفاق کے لئےسیاسی جماعتوں کودی گئی مہلت ختم ہوگئی ہے، اس حوالے سے درخواستوں پر سماعت آج سپریم کورٹ ہوگی، چیف جسٹس کی سربراہی میں تین رکنی بینچ کیس کی سماعت کرے گا۔
سپریم کورٹ نے سیاسی جماعتوں کو مذاکرات میں پیشرفت کی رپورٹ جمع کرانےکا حکم دے رکھاہے، وزیراعظم نے اٹارنی جنرل کو طلب کر لیا، وہ ہدایت لے کر عدالت میں پیش ہوں گے۔
گزشتہ سماعت کے تحریری حکم میں فنڈز کی فراہمی کے بل کی عدم منظوری کو غلطی قرار دیا گیا تھا،عدالت نے کہا تھا کسی بھی قسم کے مالیاتی بل کی ایوان سے منظوری حکومت کی ذمہ داری ہوتی ہے، مالی بل ایوان سے منظور نہ ہو تو اسے وزیراعظم اور ان کی حکومت پر عدم اعتماد تصور کیا جاتا ہے۔
یاد رہے 24 اپریل کو وزیراعظم شہباز شریف نے قومی اسمبلی سے الیکشن فنڈز بل کثرت رائے سے مسترد ہونے کے بعد ایوان سے اعتماد کا ووٹ لینے کا فیصلہ کیا تھا۔
ذرائع کا بتانا تھا کہ وزیر اعظم شہباز شریف 27 اپریل کو قومی اسمبلی سے اعتماد کا ووٹ حاصل کریں گے۔
بعد ازاں وفاقی وزیر اطلاعات و نشریات مریم اورنگزیب نے وزیراعظم شہباز شریف کے اعتماد کا ووٹ لینے کی خبروں کی تردید کردی تھی۔
اسلام آباد : وفاقی وزیرخزانہ اسحاق ڈار کا کہنا ہے کہ کونسی قیامت آجائے گی اگرالیکشن تین چارماہ آگے چلے جائیں؟ ہم کیاغلام ہیں جو کہا جائے وہ مان لیں؟۔
تفصیلات کے مطابق وفاقی وزیرخزانہ اسحاق ڈار نے قومی اسمبلی میں اظہار خیال کرتے ہوئے کہا کہ پنجاب اور کے پی کی اسمبلیاں تحلیل نہ کی جاتی تواتنی خرابی پیدانہ ہوتی، اسمبلیوں کی تحلیل ملک میں افراتفری پھیلانے کی کوشش تھی۔
وزیرخزانہ کا کہنا تھا کہ الیکشن کمیشن کے مطابق 47.4 ارب انتخابات پر اور دیگر اخراجات 14 ارب ہوں گے، ای سی کے مطابق عام انتخابات پرمجموعی طور پر 61 ارب سے زائد اخراجات آئیں گے۔
اسحاق ڈار نے کہا کہ آرٹیکل63 اے کے فیصلے میں آئین کو دوبارہ نہ لکھا جاتا تو اسمبلیاں موجود رہتیں، دنیا حیران ہے کہ 25 ممبران کے ووٹ شمارہی نہیں کیے گئے، عدالتی حکم اپنی جگہ مگر آئین سےانحراف کر کے فنڈز جاری نہیں کرسکتے، کابینہ یا اقتصادی رابطہ کمیٹی کی سمری کےبغیرفنڈزکی منظوری نہیں دی جاسکتی۔
ان کا کہنا تھا کہ ایوان کہتا ہے کہ ہم 4،3 کے فیصلے کو نہیں مانتے، قرارداد منظورکی گئی، دونوں اسمبلیاں نہ توڑی جاتیں تو ملک میں ایک ساتھ انتخابات ہوتے، سپریم کورٹ نے اسٹیٹ بینک کو حکم دیا کہ فنڈزجا ری کریں، اسٹیٹ بینک فنڈزروک سکتاتھالیکن الیکشن کمیشن کوریلیز نہیں کرسکتاتھا، معاملہ وزارت خزانہ میں آیا جو سمری کے بغیر فنڈز ریلیز نہیں کرسکتا تھا۔
وزیر خزانہ نے بتایا کہ ہم نے آرٹیکل81 ای کا سہارا لیا اور معاملے کو کابینہ میں لے گئے، کابینہ نے کہا کہ ہم 4،3 کا فیصلہ ہی نہیں مانتے تو فنڈز کیسے ریلیز کردیں۔
90 اسحاق ڈار کا کہنا تھا کہ کیا یہ پہلی مرتبہ ہےکہ پاکستان میں الیکشن90دن میں نہیں ہورہے، اب بھی فنڈزریلیزہوجاتےہیں تو کیا دن کی مدت پوری ہوگی ، اب بھی 90 دن پورےنہیں ہورہے کیونکہ مدت گزرگئی ہے۔
مردم شماری کے حوالے سے انھوں نے کہا وزارت خزانہ 33ارب روپے مردم شماری پرخرچ کررہاہے، مردم شماری پراعتراضات اٹھ رہےہیں، کہاگیاپرانی مردم شماری پرالیکشن کرالیں توابھی خرچہ کیوں کرارہے ہیں۔
وفاقی وزیر کا کہنا تھا پاکستان اس وقت بدترین معاشی بحران سےگزرہاہے، کیاہم اس وقت صوبائی الیکشن کرانے کے متحمل ہو سکتے ہیں، ہم نےبہترین معاشی صورتحال چھوڑی تھی آج پاکستان کہاں کھڑاہے، ہمارےدورمیں معیشت24ویں ممبرپرتھی آج47ویں نمبرپرہے۔
قومی اسمبلی میں اظہار خیال کرتے ہوئے اسحاق ڈار نے کہا کہ کیاالیکشن کی بات کررہےہیں،وٹ الیکشن،اگرالیکشن آگے چلے جائیں ؟ تو کون سی قیامت آجائےگی، ہم کیا غلام ہیں جو کہا جائے وہ مان لیں؟” الیکشن اکتوبرمیں ہوجائیں تو کیا ہوجائے گا۔
ان کا مزید کہنا تھا کہ 5سال پہلےمیری بات مانی جاتی توآج پاکستان ایسی صورتحال سےنہ گزررہاہوتا، پاناما،ڈان لیکس کے ڈرامے نہ ہوتے تو آج پاکستان ترقی کررہا ہوتا۔
وزیر خزانہ نے کہا کہ گزشتہ حکومت کو شرم آنی چاہیے ملک کو کس نہج پر پہنچا دیا، ڈھٹائی سےسیاست کر رہے ہیں، کچھ مہینوں کی بات ہےپاکستان ترقی کرے گا، کام کرنے دیں، دیگرمعاملات میں نہ الجھائیں۔
بیجنگ: روس یوکرین جنگ کے بعد پہلی بار چینی صدر نے یوکرینی صدر کو فون کیا ہے۔
اے ایف پی کے مطابق چین کے صدر شی جن پنگ نے بدھ کے روز اپنے یوکرینی ہم منصب ولودیمیر زیلنسکی سے فون پر بات کی ہے، جو روس کے حملے کے آغاز کے بعد سے دونوں رہنماؤں کے درمیان پہلی معلوم کال ہے۔
بی بی سی کے مطابق یوکرینی صدر زیلنسکی کا کہنا ہے کہ ان کی چین کے صدر شی جن پنگ کے ساتھ فون پر ’طویل اور بامعنی‘ بات چیت ہوئی ہے، انھوں نے ٹویٹر پر کہا کہ انھیں یقین ہے کہ بیجنگ میں سفیر کی تقرری کے ساتھ ساتھ یہ فون کال دو طرفہ تعلقات بڑھانے کے لیے طاقت ور محرک ثابت ہوگا۔
صدر شی جن پنگ نے اپنی گفتگو میں مذاکرات پر زور دیا، اور کہا کہ جنگ سے نکلنے کا راستہ مذاکرات ہیں، چین امن کو فروغ دینے اور جلد از جلد جنگ بندی کی کوششیں کرے گا۔
I had a long and meaningful phone call with 🇨🇳 President Xi Jinping. I believe that this call, as well as the appointment of Ukraine’s ambassador to China, will give a powerful impetus to the development of our bilateral relations.
— Володимир Зеленський (@ZelenskyyUa) April 26, 2023
شی جن پنگ نے کہا کہ وہ یوکرین میں اپنا خصوصی نمائندہ بھیجیں گے، اور چین یوکرین تنازع کے حل کے لیے تمام فریقین سے بات چیت کرے گا۔
فرانسیسی صدر نے چینی اقدام کا خیر مقدم کیا اور کہا کہ تنازع کے حل کے لیے امن اور بات چیت کی حوصلہ افزائی کرتے ہیں۔
چین نے بھی کال کی تصدیق کرتے ہوئے کہا ہے کہ وہ ہمیشہ امن کے ساتھ کھڑا ہے۔ واضح رہے کہ مغرب کے برعکس بیجنگ نے روسی حملے پر غیر جانب دار رہنے کی کوشش کی ہے، تاہم اس نے ماسکو کے ساتھ اپنے قریبی تعلقات کو نہیں چھپایا، نہ حملے کی مذمت کی اور گزشتہ ماہ صدر شی نے روس کا دو روزہ سرکاری دورہ بھی کیا تھا۔
پاکستان تحریک انصاف کے مرکزی سیکریٹری اطلاعات فواد چوہدری نے کہا ہے کہ شہباز شریف اور بلاول بھٹو اپنی خواہشات کو آئین قرار دے رہے ہیں۔
اے آر وائی نیوز کے مطابق پاکستان تحریک انصاف کے مرکزی رہنما اور سابق وفاقی وزیر فواد چوہدری نے موجودہ سیاسی صورتحال کے حوالے سے سماجی رابطوں کی ویب سائٹ ٹوئٹر پر اپنے ردعمل کا اظہار کیا ہے۔
فواد چوہدری نے اپنے ٹویٹ میں کہا ہے کہ شہباز شریف اور بلاول بھٹو کے بیانات سے لگتا ہے کہ انہوں نے آئین کبھی نہیں پڑھا اور اپنی خواہشات کو آئین قرار دے چکے ہیں۔
پی ٹی آئی رہنما کا کہنا تھا کہ اس وقت سپریم کورٹ ہی آئین کا تحفظ کر رہی ہے ورنہ ان دونوں اور فضل الرحمان نے آئین کو دفنانے میں گورکن کا کردار ادا کیا ہے۔
بلاول بھٹو اور شہباز شریف کے بیانات سے لگتا ہے انھوں نے آئین کبھی نہیں پڑھا اور اپنی خواہشات کو آئین قرار دے چکے ہیں، اس وقت سپریمُ کورٹ ہی آئین کا تحفظ کر رہی ہے ورنہ ان دونوں اور فضل الرحمن نے پاکستان کے آئین کو دفنانے میں گورکن کا کردار ادا کیا ہے
— Ch Fawad Hussain (@fawadchaudhry) April 26, 2023
انہوں نے اپنے ایک اور ٹویٹ میں لکھا کہ جو لوگ بھی آئین کو کاغذ کا ٹکڑا سمجھ کر آئین کے اصولوں کو پامال کر رہے ہیں تاریخ انہیں معاف کرے گی اور نہ قانون۔
فواد چوہدری نے مزید کہا کہ پاکستان کی 75 فیصد آبادی اس وقت غیر آئینی حکومتوں کے زیر تسلط ہے۔ پنجاب اور کے پی میں انتخابات ہوں گے یا وزیراعظم اور ان کی کابینہ پر آرٹیکل 6 لگنا ہے۔
جو لوگ بھی آئین کو کاغذ کا ٹکرا سمجھ کر آئین کےاصولوں کو پامال کر رہے ہیں تاریخ انھیں معاف کرے گی نہ قانون، پاکستان کی پچھتر فیصد آبادی اس وقت غیر آئینی حکومتوں کے زیر تسلط ہے پنجاب اور خیبر پختونخواہ میں انتخابات ہوں گے یا وزیر اعظم اور ان کی کابینہ پر آرٹیکل چھ لگنا ہے اس کے… https://t.co/n0ChAtOeSM
— Ch Fawad Hussain (@fawadchaudhry) April 26, 2023
کراچی : سوئی سدرن گیس کمپنی (ایس ایس سی جی سی) نے میٹر رینٹ چالیس سے بڑھا کر اچانک پانچ سو روپے کر دیا اور صارفین سے میٹر رینٹ کی وصولی بھی شروع کردی۔
تفصیلات کے مطابق کراچی سمیت ملک بھر کے گیس صارفین کی جیب پر بھاری مالی بوجھ ڈال دیا گیا، کراچی والوں کو گیس مل نہیں رہی لیکن میٹر رینٹ اور گیس بلوں میں ہوشربا اضافہ کردیا گیا ہے۔
ترجمان سوئی سدرن گیس کمپنی (ایس ایس سی جی سی) کی جانب سے بیان میں کہا گیا ہے کہ حکومت نے گیس کی قیمتوں میں اضافہ کیا ہے اور گیس کے ماہانہ بلوں کی رقم میں بھی اضافہ ہوا ہے۔
ایس ایس جی سی نے گیس میٹر رینٹ خاموشی سے 40 سے بڑھاکر اچانک 500 روپے کردیا، اوگرا نے گھریلو صارفین کو پروٹیکٹڈ اور ان پروٹیکٹڈ دو کٹیگریز میں تقسیم کر دیا۔
ترجمان نے کہا کہ نومبر تا فروری 90 کیوبک میٹر گیس استعمال کرنے والے صارفین پروٹیکٹڈ کیٹگری میں ہیں ، موسم سرما کے کسی ایک ماہ میں بھی 90 کیوبک میٹر گیس استعمال کرنے والے صارفین ان پروٹیکٹڈ ہیں۔
کمپنی ترجمان کا کہنا تھا کہ گیس کے پروٹیکٹڈ صارفین سے میٹر رینٹ 50 جبکہ ان پروٹیکٹڈ صارفین سے میٹر رینٹ کی 500 روپے کی وصولی شروع کردی گئی ہے۔
شہریوں کا کہنا ہے کہ پی یو جی کے نام پر میٹر میں خرابی یا سلو میٹر کا جرمانہ بھی صارفین سے وصول کیا جا رہا ہے، پی یو جی کے نام پر بلوں میں ایک سو سینتیس اور زائد روپے کی رقم ڈالی جا رہی ہے
حکومتی نااہلی سمیت گیس سیکٹر کا اربوں روپے کا گردشی قرضہ اور آئی ایم ایف شرائط گیس بلوں میں اضافے کی وجوہات ہیں۔
کراچی : کراچی میں دندناتے ڈاکوؤں نے ایک اور گھر میں صف ماتم بچھا دیا، موٹرسائیکل نہ دینے پر نوجوان کے سر پر گولی مار دی گئی۔
تفصیلات کے مطابق شہر قائد میں ڈاکوؤں کی وارداتوں کا سلسلہ رکنے کا نام نہیں لے رہا، آئے دن مزاحمت پر شہریوں کو فائرنگ کا نشانہ بنا دیا جاتا ہے۔
کراچی میں لٹیروں نے ایک اور ماں کی گود اجاڑ دی، کورنگی میں ڈکیتی مزاحمت پر سترہ سال کے نوجوان کو قتل کردیا گیا، مسلح لٹیروں نے حذیفہ کو موٹرسائیکل نہ دینے پر سر پر گولی ماری۔
کورنگی میں ڈکیتی کے دوران ڈاکؤں کی فائرنگ سے جواں سال نوجوان زخمی ہوا تاہم دوران علاج جاں بحق ہوگیا۔
واقعہ کے خلاف مشتعل افراد نے کورنگی نمبر دو کی مرکزی سڑک پر احتجاج کر کے روڈ کو ٹریفک کے لیے بند کردیا، حذیفہ کی نماز جنازہ گھر سے متصل سڑک پر ادا کی گئی، جس میں اہل خانہ سمیت علاقہ مکینوں کی بڑی تعداد نے شرکت کی۔
حذیفہ کی ماں کا کہنا ہے کہ سب کچھ لوٹ کربھی میرے بچے کی جان لے لی جبکہ بھائی نے کہا کہ آج میرابھائی گیا،کل کسی اور کا جائے گا۔
ریاض: سعودی خاتون فوجی کی اس تصویر نے دنیا بھر میں لوگوں کے دلوں کو پگھلا دیا ہے۔
تفصیلات کے مطابق سوڈان میں جاری لڑائی کے دوران غیر ملکی افراد کے انخلا میں سعودی عرب کے خصوصی کردار کی زبردست تعریف کی جا رہی ہے۔
انسانی ہمدردی پر مبنی اس کارروائی کے دوران دلوں کو پگھلا دینے والا ایک منظر سوشل میڈیا پر وائرل ہو گیا ہے، سوڈان سے جدہ جانے والے بحری جہاز پر سوار وزارت دفاع کی ایک خاتون فوجی اہلکار نے ایک چھوٹے بچے کو تھام رکھا ہے، جو اس کی گود میں سو گیا ہے۔
The humanity in picture 😍 A child falls asleep in the arms of an employee in the #Saudi of the Ministry of Defense, after the arrival of the Saudi evacuation ship from Sudan to Jeddah. pic.twitter.com/8JhsI516Cp
— Life in Saudi Arabia (@LifeSaudiArabia) April 25, 2023
یہ تصویر سوشل میڈیا پر وائرل ہوئی تو اس کی دھوم مچ گئی ہے، دنیا بھر سے صارفین سعودی خاتون فوجی کی انسانی ہمدردی پر مبنی رویے کی تعریف کر رہے ہیں۔
Saudis and non-Saudis arrive in Jeddah following their evacuation from Sudan 🇸🇦pic.twitter.com/wc4cdqOjOt
— Saud Salman AlDossary | سعود بن سلمان الدوسري (@999saudsalman) April 22, 2023
پاکستان تحریک انصاف کے مرکزی سیکریٹری جنرل اسد عمر نے کہا ہے کہ زرداری، فضل الرحمان اور مریم نواز شہباز شریف کی قربانی دینے کو تیار ہیں۔
اے آر وائی نیوز کے مطابق پاکستان تحریک انصاف کے مرکزی سیکریٹری جنرل اسد عمر نے انسداد دہشتگردی عدالت لاہور کے باہر میڈیا سے گفتگو کرتے ہوئے کہا کہ کل پارلیمان میں اعلان بغاوت کیا گیا اور ایک بار پھر ذاتی حملے ہوئے۔ سپریم کورٹ کے کسی جج سے متعلق پارلیمان میں بحث ہو ہی نہیں سکتی۔
اسد عمر نے کہا کہ جس ملک میں آئین کو اعلانیہ توڑا جا رہا ہو وہاں کیا قانون ہوگا۔ لگتا ہے کہ زرداری، فضل الرحمان اور مریم نواز فیصلہ کرچکے اور وہ شہباز شریف کی قربانی دینے کو تیار ہیں۔ اب یہ فیصلہ شہباز شریف کو کرنا ہے کہ وہ اپنی قربانی دینے کیلیے تیار ہیں یا نہیں۔
ان کا کہنا تھا کہ سپریم کورٹ نے بڑے تحمل کا مظاہرہ کیا ہے، اب عدالت عظمیٰ کے فیصلے پر عمل درآمد کروانے کا وقت آچکا ہے۔
پی ٹی آئی رہنما کا کہنا تھا کہ اگر آئین کو توڑا گیا تو اسکا مطلب ہے ہر پاکستانی کے حق پر ڈاکا ڈالا گیا۔ پاکستان کے عوام آئین کا دفاع کر کے دکھائیں گے۔ عوام آئینی حقوق اور اس کے دفاع کے لیے باہر نکلیں گے۔
فرخ حبیب کا کہنا تھا کہ ایک سال کےدوران قانون اور آئین کی دھجیاں اڑائی گئی ہیں اور پوری قوم کی نظریں اب سپریم کورٹ پر ہیں۔ ن لیگ انتخابی عمل سے فرار چاہتی ہے اگر سپریم کورٹ کے احکامات پر عمل نہیں ہوگا تو پھر فیصلہ سڑکوں پر ہوگا۔
ان کا کہنا تھا کہ ہم نے 297 سیٹوں پر ٹکٹ جاری کر دیے ہیں۔ ان لوگوں کو آئین کو روندنے کی اجازت نہیں دیں گے۔ مسلم لیگ میں ن اور ش کی لڑائی اتنی بڑھ گئی ہے لگتا ہے شہباز شریف کو نااہل کرانا چاہتے ہیں۔
انسداد دہشتگردی کی عدالت نے کینال روڈ پر جلاؤ گھیراؤ اور پولیس تشدد کیس میں پی ٹی آئی رہنماؤں اسد عمر، فرخ حبیب اور یاسمین راشد کی عبوری ضمانت میں 6 مئی تک توسیع کردی ہے۔
اے آر وائی نیوز کے مطابق انسداد دہشتگردی کی عدالت میں کینال روڈ پر جلاؤ گھیراؤ اور پولیس پر تشدد کیس کی سماعت ہوئی۔ پی ٹی آئی رہنما اسد عمر، یاسمین راشد، فرخ حبیب، مسرت چیمہ اور عمیر نیازی عدالت میں پیش ہوئے جب کہ جے آئی ٹی کے سربراہ آفتاب پھلروان بھی عدالت میں پیش ہوئے۔
انسداد دہشتگردی عدالت کے جج نے استفسار کیا کہ تفتیش میں کیا پیش رفت ہوئی ہے؟ جس پر سربراہ جے آئی ٹی نے عدالت کو آگاہ کیا کہ فرخ حبیب اور مسرت چیمہ نے تاحال تفتیش جوائن نہیں کی ہے۔
مسرت چیمہ کے وکیل نے عدالت کو بتایا کہ ہم نے جے آئی ٹی کو چیلنج کیا ہوا ہے۔
اے ٹی سی جج نے کہا کہ اگر جے آئی ٹی ختم بھی ہوجاتی ہے تو بیان تو ریکارڈ کرانا ہے۔ عدالت نے مسرت چیمہ اور فرخ حبیب کو آج ہی انویسٹی گیشن جوائن کرنے کی ہدایت کی اور اسد عمر، یاسمین راشد، فرخ حبیب کی عبوری ضمانت میں 6 مئی تک توسیع کردی۔
