پاکستان ٹیم کے ہیڈ کوچ ثقلین مشتاق کا کہنا ہے کہ سیریز میں تو شکست ہوگئی لیکن آخری میچ میں فتح حاصل کرکے انگلینڈ کو پھرپور جواب دینا چاہیں گے۔
ثقلین مشتاق نے نجی چینل سے گفتگو کرتے ہوئے کہا کہ خوش ہوں لیکن بدقسمتی سے نتیجہ ہمارے حق میں نہیں آیا، کراچی کی وکٹ بھی اسپنرز کے لیے سازگار ہوں گی۔
انکا کہنا تھا کہ انگلینڈ کی ٹیم تجربہ کار کھلاڑیوں پر منحصر ہے لیکن ملتان ٹیسٹ میں قومی ٹیم کے کھلاڑیوں کی کارکردگی سے خوش ہوں۔
ہیڈ کوچ کا کہنا تھا کہ پاکستانی کھلاڑیوں کے پاس ریڈ بال کا زیادہ تجربہ نہیں ہے، سعود شکیل اور محمد نواز کی جتنی تعریف کی جائے کم ہے انہوں نے ملتان ٹیسٹ بہت اچھا کھیلا ہے۔
ثقلین مشتاق نے کہا کہ امام الحق اسپتال سے آئے اور اچھی بیٹنگ کی، ہم کھیل میں یا تو جیتتے ہیں یا سیکھتے ہیں، امید ہے کھلاڑیوں نے بہت کچھ سیکھا ہوگا، جو غلطیاں ہوئیں اس کا جائزہ لیں گے۔
ٹی وی امپائر جول ولسن کی جانب س سعود شکیل کو آؤٹ دینے پر ثقلین مشتاق نے کہا کہ سعود کے کیچ پر دنیا تبصرہ کررہی ہے، امپائر کے فیصلے ماننے ہوتے ہیں اور صرف ایک کیچ کو لے کر ہی نہیں بیٹھ جانا، ہمیں آگے بڑھنا ہوگا۔
