پاکستان کے ہیڈ کوچ گرانٹ بریڈ برن نے کہا ہے کہ بھارت میں سوئنگ کی کمی نے ون ڈے ورلڈ کپ میں پاکستان کے پیس اٹیک کو غیر موثر کردیا ہے۔
بنگلہ دیش کے خلاف میچ سے قبل بریڈ برن نے بھارت میں ذرائع ابلاغ سے گفتگو کرتے ہوئے کہا کہ ہمارے پاس پاکستان میں فاسٹ باؤلنگ ٹیلنٹ کا بہت بڑا ذخیرہ ہے۔
انھوں نے کہا کہ ہم سوئنگ پر انحصار کرتے ہیں، لیکن ہم نے یہاں بال کو زیادہ سوئنگ ہوتے نہیں دیکھا۔ یہاں گیندیں مختلف ہیں، حالات مختلف ہیں اور یقینی طور پربال یہاں کافی تیزی سے نکلتی ہے۔
انھوں نے کہا کہ ایک شعبہ جو ہمارے لیے کردار ادا کرسکتا ہے وہ یہ کہ ہمارے ٹاپ چار بلے بازوں میں سے ایک کو 40 ویں اوور تک کھیلنا ہوگا۔ ہم اس پوزیشن میں ہیں جہاں ہم کبھی بھی نہیں ہونا چاہتے تھے۔
چھ میچوں میں صرف دو میں فتح اور چار میں شکست کے بعد پاکستان کی سیمی فائنل میں پہنچنے کی امیدیں کافی مدھم پڑ چکی ہیں۔ اس ایونٹ میں پاکستان کا مضبوط شعبہ بولنگ بھی کار آمد نہیں رہا، شاہین آفریدی ٹورنامنٹ میں اب تک اپنی بہترین فارم پیش کرنے میں ناکام رہے ہیں۔
واضح رہے کہ ورلڈ کپ کے آغاز سے قبل پاکستانی فاسٹ بولر نسیم شاہ کندھے کی انجری کا شکار ہوگئے تھے تاہم ان کے متبادل کے طور پر آنے والے حسن علی اور حارث رؤف ان کے خلا کو پُرک کرنے میں ناکام رہے۔