کابل: افغانستان میں گر کر تباہ ہونے والے طیارے کے 4 مسافروں کے زندہ ہونے کا انکشاف ہوا ہے، یہ بھی معلوم ہوا ہے کہ طیارہ ایک روسی مریضہ کو لے کر تھائی لینڈ سے ماسکو جا رہا تھا۔
تفصیلات کے مطابق شمالی افغانستان کے صوبے بدخشاں میں گر کر تباہ ہونے والے طیارے کے چار مسافر زندہ ہیں، یہ چھوٹا روسی مسافر طیارہ ہفتے کی شام ضلع کوو میں اس وقت گر کر تباہ ہوا تھا، جب یہ ہندوستان سے روس جا رہا تھا، اس کی وجوہ ابھی تک واضح نہیں ہیں۔
اس طیارے کا ملبہ کل افغان سیکیورٹی فورسز کی جانب سے تلاش کیے جانے کے بعد رات کو دیر سے دریافت ہوا تھا، شمالی افغانستان میں بدخشاں کے مقامی اہلکار خان محمد حاجی اسد کے مطابق طیارے کا ایک پائلٹ اور 3 مسافر زندہ بچ گئے۔
طیارے کے گرنے کے بعد روسی ایوی ایشن اتھارٹی نے کہا تھا کہ اس کے دو مسافر روسی تھے، افغانستان کی وزارت ہوا بازی نے یہ بھی اعلان کیا کہ اس چھوٹے طیارے میں عملے کے چار ارکان اور دو مسافر سوار تھے۔
بدخشاں میں مسافر طیارہ اونچے پہاڑوں سے ٹکرا گیا
وزارت نے یہ بھی کہا کہ یہ طیارہ افغانستان کے سسٹم میں رجسٹرڈ نہیں تھا، ابھی تک طیارہ گرنے کی وجہ واضح نہیں ہو سکی ہے۔ دوسری جانب بدخشاں سے مقامی افغان حکام نے اطلاع دی ہے کہ اس طیارے کے چار بچائے گئے مسافروں کو جائے وقوعہ سے نکال لیا گیا ہے اور وہ محفوظ ہیں۔
