کراچی: پی آئی اے ہیڈ آفس میں حج آپریشن اور دیگر امور پر اہم اجلاس منعقد ہوا، نامزد اور ناتجربہ کار چیف آپریٹنگ افسر اور چیف کمرشل افسر نے تقرری کے بغیر ہی اجلاس میں شرکت کی۔
تفصیلات کے مطابق حج آپریشن اور دیگر امور طے کرنے کے حوالے سے پی آئی اے ہیڈ آفس میں اجلاس کا انعقاد کیا گیا، اجلاس کی اہم بات یہ تھی کہ پی آئی اے کے نامزد سی او او ضیا قادر قریشی اورسی سی او بلال منیر اپنی تقرری کے بغیر ہی اجلاس میں شریک ہوگئے۔
ان افسران کو تاحال تقررنامے جاری نہیں کئے گئے، ذرائع کے مطابق تقررنامے کے لئے درکار دستاویزات بھی نامزد افسران نے اب تک انتظامیہ کو فراہم نہیں کی ہیں، قواعد کے مطابق ضابطے کی مکمل کارروائی کے بغیر تقرر نامے جاری نہیں کئے جا سکتے۔
ذرائع کا کہنا ہے کہ باضابطہ تقررناموں کے بغیر افسران کی اجلاس میں شرکت بھی کمپنی قواعد کی خلاف ورزی ہے، قواعد و ضوابط کے تحت دونوں افسران تاحال ائر لائن کے ملازم نہیں ہیں۔
قواعد کے تحت نامزد افسران کو کمپنی آفر لیٹرزکے ساتھ متعلقہ دستاویزات پیش کرنا لازم ہے، ایوی ایشن تجربے سے محروم دونوں افسران کو فی کس 15لاکھ ماہانہ سے زائد تنخواہ ادا کی جائے گی۔
مزید پڑھیں: پی آئی اے حج آپریشن کی تیاریوں میں ناکام
ذرائع کے مطابق نامزد افسران کی سر پرست شخصیات کی جانب سے ان افسران کو فوری تقرر نامے اجراء کے لئے انتظامیہ پر دباؤ دالا جارہا ہے۔
اس حوالے سے ترجمان پی آئی اے کا مؤقف جاننے کے لئے بارہا ٹیلیفون کالز کی گئیں لیکن وہ دستیاب نہ ہو سکے۔